UMTJHUMAYELI 7 - IsiNdebele 2012 Translation

Isiyeleliso esihle

¹ Ibizo elihle lingcono kunamakha akhethekileko nelanga lokufa lingcono kunelokubelethwa.

² Kungcono ukuya ekumbeni yesililo kunokuya ekumbeni yokugidinga ngombana ikumba yesililo isiphetho sabo boke abantu. Abasaphilako kumele bakucabangisise lokhu.

³ Isizi lingcono kunesihleko ngombana ubuso nabunyukubeleko, ihliziyo yenamile.

⁴ Ihliziyo yohlakaniphileko ingekumbeni yesililo, kodwana yesidlhadlha ingekumbeni yokwethaba.

⁵ Kungcono ukulalela ukukhalima komuntu ohlakaniphileko kunokulalela umbhino weendlhadlha.

⁶ Njengokuhlihlitha kwameva ngaphasi kwembiza sinjalo nesihleko sesidlhadlha. Nalokhu kulilize:

⁷ Ukusabisa kungenisa ohlakaniphileko ebudlhayeleni nokufunjathiswa konakalisa ingqondo.

⁸ Isiphetho sendaba singcono kunesithomo sayo, nokubekezela kungcono kunokuziphakamisa.

⁹ Ungarhabi ukuthukuthela ehliziywenakho ngombana itukuthelo ihlala esifubeni seendlhadlha.

¹⁰ Ungabuzi uthi, “Kubayini amalanga waphambilini angcono kunawanjesi?” ngombana akusikho ukuhlakanipha ukubuza lokho.

¹¹ Ukuhlakanipha kanye nepahla kuyinto ehle begodu kububhadekelo kabaphilako

¹² ngombana ukuhlakanipha kusiphephelo. Imali nayo isiphephelo, kodwana ubuhle belwazi ngilokhu: Ukuhlakanipha kunikela ipilo kilabo abanakho.

¹³ Yelela lokho uZimu akwenzileko! Mbala, ngubani ongagobulula lokho akugobanisileko na?

¹⁴ Ngesikhathi esihle, jabula, kodwana ngesikhathi esimbi, yelela ngombana uZimu ukwenze kokubili ukuze umuntu angazi litho ngelingomuso lakhe.

¹⁵ Epilwenami engatjho litho le, ngibone koke lokhu: Kukhona olungileko obhubha ngokulunga kwakhe nokhohlakeleko ophila isikhathi eside ngobukhohlakali bakhe.

¹⁶ Ungazenzi olunge khulu, godu ungabi ngohlakaniphe ngokweqileko. Uzibhubhiselani na?

¹⁷ Ungabi ngokhohlakele khulu, godu ungabi sidlhadlha. Ufelani ngaphambi kwesikhathi sakho na?

¹⁸ Kuhle ukukakarela isiyeleliswesi, godu ungalisi lesiya. Owesaba uZimu uzazigega zombili iingozi zakhona.

¹⁹ Ukuhlakanipha kwenza ohlakaniphileko abe namandla khulu kunababusi abalitjhumi edorobheni.

²⁰ Ngambala, akunamuntu olungileko ephasini owenza okuhle kwaphela, angoni nakanye.

²¹ Ungathatheli ehloko woke amezwi akhulunywa babantu ukuze ungezwa isisebenzi sakho sikuthuka

²² ngombana uyazi ehliziywenakho kobana kwawena uthuke abanye kanengana.

²³ Koke lokhu ngikuzizinye ngokuhlakanipha bengathi, “Ngizimisele ukuhlakanipha”, kodwana lokhu kube ngaphezu kwami.

²⁴ Okwenzekako kukude begodu kuzike kokuzika: Ngubani ongakufumana na?

²⁵ Godu ngabuya ngacabangisisa ekwazini kobana ngihlolisise bengirhubhulule ubuhlakani ngifunyane isiphetho; iye, nokwazi ubukhohlakali bobudlhadlha kanye nobudlhadlha bokutlhoga ingqondo.

²⁶ Ngafumana okumunyu khulu kunokufa: umfazi osithiyo, ohliziywakhe isirhurhulanede nezandla zakhe ziziinkhungo. Umuntu okara uZimu uyaphunyurha kuye, kodwana isoni sona sizakubambeka kuye.

²⁷ Mina Mtjhumayeli ngithi: Qala, ngilokho engikufumeneko lokha nangibeka koke ngenaneko, kobana ngifunyane isiphetho.

²⁸ Lokho ingqondwami ebeyihlala ikufuna ngesikhathi soke, kodwana ingahlathi iqiniso lakhona, ngilokhu: Ngafunyana yinye indoda eqotho hlangana nekulungwana, kodwana azange ngifunyane namunye umfazi onjalo phakathi kwabo boke.

²⁹ Qala, ngafunyana lokhu kwaphela: UZimu wenze abantu baba qotho, kodwana bona bazifunela amaqhinga amanengi.