UMTJHUMAYELI 6 - IsiNdebele 2012 Translation

¹ Ngibone obunye ubumbi ngaphasi komthunzi welanga, bumuthwalo obudisi ngaphezu kwabantu:

² UZimu unikela umuntu umnono, ilifa nedumo ukuze angasweli litho alifisako. Kodwana uZimu akamvumeli bonyana azanelise ngalokho ngombana kurhiribidelwa ngotjhili. Lokhu kulilize, yihlupheko enesizi.

³ Lokha umuntu nanabantwana abalikhulu aphile iminyaka eminengi, iye, aphile isikhathi eside, kodwana angazanelisi ngokuhle begodu angabulungwa ngesizotha, ngithi umntwana obelethwe ahlongakele ungcono khulu kunaye.

⁴ Ufika alilize, anyamalale ebumnyameni nebizo lakhe litjhabalalele futhi.

⁵ Nanyana angazange abone ilanga nanyana azi okuthileko, nokho unokuthula okwedlula umuntu loyo.

⁶ Kuzamsiza ngani umuntu ukuphila iminyaka eyikulungwana ephindwe kabili, kodwana angakghoni ukuzanelisa ngokuhle na? Angitjho boke njalo baya endaweni yinye?

⁷ Koke ukutjhabatjheka komuntu kungekomlomakhe, kodwana iphango lakhe alaneliseki.

⁸ Ungcono ngani ohlakaniphileko kunesidlhadlha na? Kusisizani isichaka ukuziphatha kuhle phambi kwabantu na?

⁹ Kungcono okubonwa mamehlo kunalokho okukhanukelwa ngugilo. Nalokho kulilize! Kukugijimisa ummoya!

¹⁰ Koke okukhona kwathiywa ibizo nalokho umuntu angikho kuyaziwa: Akakwazi ukujamelana noSomandla.

¹¹ Ukwanda kwamezwi kukukwanda kokungatjho litho. Kumsiza ngani umuntu lokho?

¹² Ngubani owazi okulungele umuntu epilweni, nakube emalangeni ambalwa nangatjho litho udlula njengesithunzi na? Ngubani ongamtjela bonyana kuzokwenzakalani ngaphasi komthunzi welanga ngemva kokukhamba kwakhe na?