UMTJHUMAYELI 5 - IsiNdebele 2012 Translation

Isikhathi sokukhuluma nesokuthula

¹ Tjheja amagadangwakho nawuya ekumbeni kaZimu. Ukuya kiyo kobana uyokulalela kungcono kunokunikela umhlabelo weendlhadlha ngombana azilemuki bonyana ziyona.

² Ungabi namawala ngomlomakho, ungarhabi ehliziywenakho ukukhupha ilizwi phambi kwakaZimu. UZimu usezulwini, wena usephasini, yeke, bala amezwakho.

³ Njengombana ibhudango liza nemicabango eminengi nekulumo yesidlhadlha iza namezwi amanengi.

⁴ Nawenza isithembiso phambi kwakaZimu, ungariyadi ukusifeza. UZimu akathatjiswa ziindlhadlha, ngalokho zalisa isithembiso sakho.

⁵ Kungcono ukungathembisi kunokwenza isithembiso ungasasigcini.

⁶ Ungavumeli umlomakho ukudosele ekoneni; ungathi kumphristi kaZimu “Sekwaba yipazamo” UZimu uzakuthukuthela ngalokho okutjhoko, atjhabalalise umsebenzi wezandla zakho.

⁷ Emabhudangweni amanengi kunemicabango, ngokunjalo amezwi amanengi abanga umonakalo. Ngalokho yesaba uZimu.

Umnono ulilize lakolize

⁸ Ungarareki lokha nawubona ukugandelelwa kochakileko nokwephulwa kokulunga nepatho efaneleko embusweni: Isikhulu esiphezulu sivikelwe ngesingaphezu kwaso godu kunezinye ngaphezu kwazo.

⁹ Ipumelelo yenarha kikho koke lokhu isekosini enakelela amasimu.

¹⁰ Othanda imali akaneliseki ngayo nothanda umnono akaneliseki ngomvuzo. Nalokho kulilize!

¹¹ Nakwanda umnono nabawudlako bayanda. Kumbhadekela ngani umniniwo ngaphandle kokuwuqala nje?

¹² Ubuthongo besisebenzi bumnandi, nanyana sigoma kancani nanyana khulu, kodwana ukusutha kwenjinga kuyenza ingabi nobuthongo.

¹³ Kunobumbi obuzwisa ubuhlungu engakhe ngabubona ngaphasi komthunzi welanga: Umnono obulungiweko, oliliva kumniniwo.

¹⁴ Umnono lowo ulahleka ngemisebenzi emimbi, kuthi lokha nabeletha indodana angabi nalitho alitjhiyela yona.

¹⁵ Njengombana umuntu abuya esibelethweni abulanzi, ngendlela enjalo uzakukhamba njengokuza kwakhe. Iye, akunalitho alibutheleleko ngokutjhabatjheka kwakhe azakukhamba nalo.

¹⁶ Mbala lokho bubumbi obuzwisa ubuhlungu! Njengombana ezile uzakukhamba anjalo! Alo, kumsizani umuntu ukujulukela ummoya nje?

¹⁷ Yoke imihla yokuphila kwakhe ugoma kanzima, ngesizi elikhulu, ngokuhlupheka nangokukhathazeka.

¹⁸ Qala, okuhle engakubonako ngilokhu: Kuhle ukugoma, ukusela nokuzithabisa ngezinto ezihle phakathi kokutjhabatjheka kwalokho umuntu akujulukeleko ngaphasi komthunzi welanga, emalangeni ambalwa wokuphila kwakhe awaphiwe nguZimu ngombana lokho kusisabelo sakhe.

¹⁹ Iye, kusisipho esivela kuZimu lokha napha umuntu umnono nelifa, amvumele kobana azanelise ngakho, umuntu loyo akwamukele lokho kube sisabelo sakhe, azithokozise ngokutjhabatjheka kwakhe.

²⁰ Angeze acabanga khulu ngamalangakhe wokuphila ngombana uZimu uhlala amthabisa ngokwenama kwehliziywakhe.