UMTJHUMAYELI 4 - IsiNdebele 2012 Translation

¹ Godu ngaqala ngabona loke igandelelo ebegade lenzeka ngaphasi komthunzi welanga: Qala bekuneenyembezi zabagandelelweko, gade banganamduduzi; amandla alele kubagandeleli, ngalokho abagandelelweko batlhoga umduduzi.

² Ngadlumbana bona abahlongakala kade, banetjhudu ukudlula abaphilako, iye, ukudlula abasaphilako.

³ Begodu ongcono kunabo bobabili ngiloyo ongakabi ukuba khona; iye, ongazange akhe abone ubumbi, obenziwa ngaphasi komthunzi welanga.

Ukusebenza kulilize

⁴ Godu ngabona bonyana koke ukutjhabatjheka nekghono lomsebenzi: Lokho sesikhwele somunye komunye Nalokho kulilize! Kukugijimisa ummoya!

⁵ Isidlhadlha sisonga izandla, sizimunye iingazi.

⁶ Singcono isandla sinye esizele ukuzotha, kunezimbili ezizele ukutjhabatjheka kanye nokugijimisa ummoya.

⁷ Godu ngabuye ngabona okuthileko okulilize ngaphasi komthunzi welanga:

⁸ Kwakunendoda enguyedwana, gade inganamnakwabo nanyana indodana. nokho ukutjhabatjheka kwayo gade kunganasiphetho, beyinehliziyo ede inganeliswa mnonwayo. Yabuza yathi: “Ngizakuthi ngijulukela bani bengizidime ubumnandi na?” Nalokho kulilize nomthwalo obudisi!

⁹ Ububili bubulala inyoka ngombana abantu nabababili, banomvuzo omuhle ngomsebenzabo:

¹⁰ Omunye nawako, umnganakhe uyamvusa. Kodwana maye emuntwini othi nawileko, aswele umuntu ongamvusa!

¹¹ Godu ababili nabalele ndawonye, bayafuthumezana, kodwana uyedwana yena angazifuthumeza njani?

¹² Umuntu nakayedwa angahlulwa, kodwana nabababili bayazivikela. Intambo enemitiya emithathu ayiqhusuki lula.

Ipumelelo ililize

¹³ Ungcono umuntu omutjha ochakileko khisibe uhlakaniphile, kunesidlhadlha sekosi elupheleko engasakwazi nokwamukela isiyeleliso.

¹⁴ Omutjha loyo waphuma esikhungweni waba mbusi, ngitjho nanyana abelethwe asichaka embusweni wekosi leyo.

¹⁵ Ngabona bonyana boke abaphila ngaphasi komthunzi welanga bebangehlangothini lomutjha owathatha isikhundla sekosi agade angaphasi kwayo.

¹⁶ Bekunganasiphelo esiqubuthwini sabantu ebegade asirhola; kodwana labo abeze muva azange bamdumise. Nalokho kulilize! Kukugijimisa ummoya!