UMTJHUMAYELI 3 - IsiNdebele 2012 Translation

Koke kunesikhathi sakhona

¹ Yoke into inesikhathi ebekelwe sona, iye, kunesikhathi sayo yoke into ngaphasi komthunzi welanga:

² Kunesikhathi sokubeletha nesikhathi sokufa, isikhathi sokutjala nesikhathi sokusiphula okutjaliweko;

³ isikhathi sokubulala nesikhathi sokuphilisa, isikhathi sokugiriza nesikhathi sokwakha;

⁴ isikhathi sokulila nesikhathi sokuhleka, isikhathi sokuzila nesikhathi sokugida;

⁵ isikhathi sokulahla amatje nesikhathi sokuwabuthelela, isikhathi sokugona nesikhathi sokufulathela;

⁶ isikhathi sokufuna nesikhathi sokulahla, isikhathi sokugodla nesikhathi sokusaphaza;

⁷ isikhathi sokudabula nesikhathi sokuthunga, isikhathi sokuthula nesikhathi sokukhuluma;

⁸ isikhathi sokuthanda nesikhathi sokuzonda, isikhathi sepi nesikhathi sokuthula.

⁹ Isisebenzi sizuzani ekutjhabatjhekeni kwaso na?

¹⁰ Ngibone umthwalo uZimu awethwese abantu kobana abatshwenye ngawo:

¹¹ Wenze yoke into yafaneleka ngesikhathi sayo. Godu wanikela abantu ilwazi lokulemuka iinkhathi, kodwana abatlhadlhuleki ngomsebenzi uZimu awenza ekuthomeni bekube sekupheleni.

¹² Ngilemukile bonyana ayikho into ethokozisa umuntu ngaphandle kokuzijabulisa nokuzenzela okuhle nasaphilako,

¹³ okutjho bona woke umuntu kufanele agome, asele abe azikholise kikho koke ukutjhabatjheka kwakhe. Lokho kusisipho esibuya kuZimu.

¹⁴ Ngilemukile bonyana koke uZimu akwenzako kuzakuhlala isiphelani, akunanto engangezelelwa nanyana iphungulwe kilokho. UZimu wenza lokho ukuze umuntu amesabe.

¹⁵ Okukhona, kwakhe kwaba khona nokusazakuba khona, kukhona. UZimu ubuyekeza okwadlulako.

Ukungalungi esikhundleni sokulunga

¹⁶ Godu kukhona engakubona ngaphasi komthunzi welanga: Esikhundleni sokugweba ngeqiniso, kuhlezi ubukhohlakali nesikhundleni sokulunga, kuhlezi ubukhohlakali.

¹⁷ Ngadlumbana ngathi: “UZimu uzakugweba olungileko nokhohlakeleko ngombana kunesikhathi sayo yoke into nesawo woke umsebenzi.”

¹⁸ Godu ngadlumbana ngathi: “Kungebanga labantu kobana uZimu abazizinye ukuze babone bonyana sebayafana neenlwana.”

¹⁹ Okwehlela iinlwana kwehlela nabantu. Iye, behlelwa sisehlo esifanako: Njengombana iinlwana zifa nabantu bayafa. Koke kunomphefumulo ofanako; umuntu akasingcono kunesilwana ngombana koke kulilize.

²⁰ Koke kuya endaweni yinye; koke kwavela ethulini, ngokunjalo koke kuzakubuyela ethulini.

²¹ Ngubani owaziko bonyana umphefumulo wabantu utjhinga phezulu, weenlwana utjhinge phasi na?

²² Yeke ngabona bonyana akunanto engcono emuntwini kunobanyana azikholise ngomsebenzakhe ngombana lokho kusisabelo sakhe. Ngubani ongambonisa kobana kwenzakalani ngemva kokufa kwakhe na?