UMTJHUMAYELI 2 - IsiNdebele 2012 Translation

¹ Ngadlumbana ngathi, “Angizizizinye ngokuzithabisa; ngizithokozise.” Kodwana nakho lokho kulilize!

² Mayelana nesihleko ngathi “Sibudlhadlha!” namayelana nokuzithabisa ngathi “Kunanzuzo bani na?”

³ Ngazimisela ngehliziyo ukunikela umzimbami ewayinini, khibe umkhumbulwami ungihlahla ngokuhlakanipha. Ngaleyondlela ngathanda ukungena ebudlhayeleni ukuze ngifunyane bonyana yini okuhle abantu abakwenza ngaphasi komthunzi welanga emalangeni ambalwa wokuphila kwabo.

⁴ Ngenza imisebenzi emikhulu: Ngazakhela iinkumba begodu ngatjala neendiribe.

⁵ Ngalungisa iimvande neendawo zokuphumula, ngatjala kiyo yoke imihlobo yemithi yeenthelo.

⁶ Godu ngazenzela imiphathamanzi kobana ngisezele imithi ehlumako ngemisele.

⁷ Ngathenga amakhoboka namakhobokakazi begodu benginalawo abelethelwe kwami. Godu gade nginemihlambi eminengi yeenkomo, yeembuzi neyezimvu ukudlula boke abangandulela eJerusalema.

⁸ Ngazibuthelelela isiliva negolide kanye nepahla evela emakhosini neemfundeni. Ngazifumanela amadoda nabafazi ababhinako kanye nalokho okuthokozisa indoda, okutjho idwendwe leentombi!

⁹ Ngadlondlobala ukudlula boke abangandulela eJerusalema. Kikho koke lokhu ukuhlakanipha kwami kwahlala kukimi.

¹⁰ Azange ngizidime litho elikhanukwa mamehlwami; ihliziywami azange ngiyigodlele ukuzithabisa ngombana yathokozela koke ukutjhabatjheka kwami. Lokhu kwaba yikokhelwami ngawo woke umjulukwami.

¹¹ Nje-ke ngaqalisisa woke umsebenzi wezandla zami nokutjhabatjheka koke engikujulukeleko. Qala, koke kulilize! Kukugijimisa ummoya! Akukho okungazuzwa ngaphasi komthunzi welanga.

¹² Ngatjhugulula umkhumbulwami kobana ngitjheje ukuhlakanipha, ukutlhoga ingqondo nobudlhadlha: Kuzakuthiwani ngomuntu owandulela ikosi na? Kwaphela, lokho esele kwenziwe!

¹³ Ngalemuka bonyana ukuhlakanipha kunenzuzo kunobudlhadlha, njengombana nomkhanyo unenzuzo kunobumnyama:

¹⁴ Ohlakaniphileko ukhupha amehlo enyameni, khibe isidlhadlha sona sikhamba ebumnyameni. Godu ngilemukile bonyana bobabili njalo behlelwa sisehlo esifanako.

¹⁵ Ngadlumbana ngathi: “Okwehlele isidlhadlha nami kuzangehlela. Alo, ngizuzani-ke ngokuba nokuhlakanipha okukhulu na?” Godu ngadlumbana ngathi: “Nakho lokhu kulilize!”

¹⁶ Ngambala ekugcineni akukho ukukhunjulwa kohlakaniphileko kanye nosidlhadlha. Emalangeni ezako bobabili njalo bazabe sele balitjalwa. Maye ohlakaniphileko ufa njengesidlhadlha!

¹⁷ Nje-ke nganyenya ipilo ngombana kimi gade umumbi umsebenzi owenziwa ngaphasi komthunzi welanga. Mbala, yoke into ililize! Ikugijimisa ummoya!

¹⁸ Nganyenya koke ukutjhabatjheka kwami engakujulukela ngaphasi komthunzi welanga ekumele ngikutjhiyele engimandulelako.

¹⁹ Ngubani owaziko bonyana uzakuba ngohlakaniphileko nanyana ngosidlhadlha na? Khonapho uzakuba namandla phezu kwakho koke ukutjhabatjheka kwami engikujulukele ngokuhlakanipha kwami ngaphasi komthunzi welanga. Nalokho kulilize!

²⁰ Yeke ihliziywami yathoma ukulahla ithemba ngakho koke ukutjhabatjheka kwami engikujulukele ngaphasi komthunzi welanga.

²¹ Kunomuntu otjhabatjheka ngokuhlakanipha, ngelwazi nangekghono, kodwana ekugcineni anikele koke lokho njengelifa emuntwini ongazange alijulukele. Nalokho kulilize nelitjhwa elikhulu!

²² Uzuzani umuntu ngakho koke ukutjhabatjheka nangokuzikhandla akujulukela ngaphasi komthunzi welanga na?

²³ Yoke imihla yakhe inobuhlungu nomsebenzakhe unesizi, ngitjho nebusuku uyahlubayela. Nalokhu kulilize!

²⁴ Ayikho into umuntu angayenza ngcono, ngaphandle kokugoma nokusela, azithabise ngokutjhabatjheka kwakhe. Nakho lokho ngalemuka bonyana kusesandleni sakaZimu

²⁵ ngombana ngaphandle kwakhe, ngubani ongabetha esimonyongwana, ajekezele na?

²⁶ Umuntu othokozisa uZimu, uZimu umupha ukuhlakanipha, ilwazi nethabo; kodwana nakusisoni sona usinikela umsebenzi wokubuthelela nokwenza isithala somnono, kobana awudlulisele kothabisa uZimu. Nalokho kulilize! Kukugijimisa ummoya!