UMTJHUMAYELI 12 - IsiNdebele 2012 Translation

¹ Khumbula umdali wakho emalangeni wobutjha bakho, kungakafiki imihla emimbi nokutjhidela kweminyaka ozakutjho ngayo uthi, “Anginakwenama ngayo.”

² Iye, ngaphambi kobana ilanga nomkhanyo, inyezi neenkwekwezi kube mnyama, namafu asabuthile ngemva kwezulu,

³ mhla abaqaphi bekumba bathuthumelako, neendlakela zithoma ukukhokhoba, nabagayikazi bangasagayi ngebanga lokuba mbalwa, nabahlola ngamafesidere sele bafiphele.

⁴ Iye, mhlana iminyango ngaphandle ivaliwe, kunciphe netjhada lokugaya, lokha iphimbo seliphakama njengelenyoni, kodwana ukuzwakala kwalo sekuphasi;

⁵ lokha umuntu angakesabi iindawo eziphakamileko nalokha kunezinto ezethusako endleleni; iye, lokha nakuthuthumba umuthi we-alimondi nentethe sele irhurhuba nomvusakunzi ungasasebenzi. Ngambala, umuntu uya endawenakhe yanini nanini nabalilako behla benyuka endleleni.

⁶ Iye, mkhumbule umdali wakho kungakaqhusuki intambo yesiliva, ithunga legolide lingakaphahlaki, umjeka ungakaphadlheki emthonjeni nevili lingakaphukeli ngepetsini,

⁷ ithuli lingakabuyeli equlwanini njengombana lalinjalo nomphefumulo wokuphila ungakabuyeli kuZimu owawunikelako.

⁸ Kulilize lakolize! Iye, uMtjhumayeli uthi: “Yoke into ililize!”

Isiphetho sendaba

⁹ Isengezo: UMtjhumayeli gade angakahlakaniphi kwaphela, kodwana gade afundisa nabantu ilwazi. Walinganisa izinto wahlolisisa bewahlela kuhle izaga ezinengi.

¹⁰ UMtjhumayeli wafunisisa kobana afumane amezwi afaneleko nokutlola amezwi weqiniso ngobuqotho.

¹¹ Amezwi wohlakaniphileko anjengesitlhorholojakomo nezinto eziqakathekileko, zinjengeenkhonkhwani ezimanyene nesitlhorholojakomo. Lokho kuvela kumelusi munye.

¹² Isengezo esinye: Ndodanami, yewuyelele! Ukwenza iincwadi ezinengi akunasiphetho begodu ukufunda khulu kukhathaza umzimba.

¹³ Ekugcineni, koke okuzwakeleko kufanele kunakekelwe: Yesaba uZimu ulonde imiyalwakhe; lokho kungokomuntu woke

¹⁴ ngombana uZimu uzokugweba yoke imisebenzi, ngitjho nakho koke okufihlakeleko, nanyana kukuhle, nanyana kukumbi.