UMTJHUMAYELI 11 - IsiNdebele 2012 Translation

Ikusasa alaziwa

¹ Nawuthumela inzuzwakho phezu kwamanzi, kungenzeka uyifumane godu ngemva kwamalanga amanengi.

² Ipahlakho ungayaba kalikhomba nanyana kabunane, kodwana awuyazi ihlekelele engahle yehlele inarha.

³ Amafu nazele amanzi, athululela izulu ephasini. Nakube umuthi uzokuwela ngesewula nanyana ngetlhagwini, lapha uzokuwela ngakhona, uzokulalela ngapho.

⁴ Ophika nommoya angeze atjala, oqala amafu angeze avuna.

⁵ Njengombana ungazi ukungena komphefumulo ehlwilini lesibeletho somfazi ozithweleko, ngokunjalo angeze wawuzwisisa umsebenzi kaZimu, owenza izinto zoke.

⁶ Tjala imbewakho ekuseni, entambama izandla zakho zingaphumuli ngombana awazi bona ngiyiphi ezakuphumulela, kungaba ngile nanyana kube ngileya, nanyana ziphumelele zombili.

Khumbula umdali wakho ebutjheni bakho

⁷ Ukukhanya kumnandi, kuhle emehlweni ukubona ilanga.

⁸ Nakube umuntu angaphila iminyaka eminengi, akazithokozise ngayo yoke, nokho akakhumbule imihla yobumnyama kobana izakuba minengi. Koke okusezako kulilize.

⁹ Jabula muntu omutjha ebutjheni bakho, ihliziywakho ikuphe ukwenama emalangeni wobutjha bakho. Landela iimfiso zehliziywakho, nalokho okubonwa mamehlwakho, kodwana yazi bona kikho koke lokho uZimu uzakugweba.

¹⁰ Yeke, tjhidisa isizi ehliziywenakho, udlulise woke amahlungu emzimbenakho, kodwana yazi bona ubutjha, iye, ngitjho nobutjha ebuncanini bulilize.