UMTJHUMAYELI 10 - IsiNdebele 2012 Translation

¹ Njengombana iimpukani ezifileko zonakalisa isizeso somdidiyeli kobana sinuke besibe nesivunda, ngokunjalo nobudlhadlha obuncani bubhedlha ukuhlakanipha nedumo.

² Ihliziyo yohlakaniphileko inqomba ngesidleni, kodwana yesidlhadlha inqomba ngesinceleni.

³ Nanyana isidlhadlha sikhamba endleleni, asinambono; sikhamba sikhombisa woke umuntu kobana sidlhayele.

⁴ Lokha umbusi nakubhokela ngobukhali, ungasuki endawenakho ngombana ukuzotha kugegeda iimphoso ezinengi.

⁵ Kunobumbi engikhe ngabubona ngaphasi komthunzi welanga, okumhlobo wephoso evela kumbusi:

⁶ Isidlhadlha sibekwa eenkhundleni eziphezulu, khibe iinjinga ziseenkhundleni eziphasi.

⁷ Ngibone amakhoboka akhwele iinjomani, khibe amakhosana ayabhadula inga makhoboka.

Iingozi angeze zabalekelwa

⁸ Owemba umgodi, angarhohlomela ngakiwo nogiriza umthangala angalunywa yinyoka.

⁹ Okghadlha amatje angalinyazwa ngiwo nophadlhula iinkuni zingaba yingozi kuye.

¹⁰ Nakube izembe libuthuntu, alisalolwa, kudingeka amandla amanengi, kodwana ikghono liletha ipumelelo.

¹¹ Nakube inyoka iluma ngaphambi kokwenziwa komlingo, khona-ke akusizi ukuba nosomlingo.

¹² Amezwi wohlakaniphileko anesisa, kodwana isidlhadlha siqedwa mlomaso.

¹³ Sithoma ngokukhuluma ubudlhadlha; sigcine ngekulumo embi enganangqondo

¹⁴ begodu sikhuluma khulu. Akunamuntu owaziko okuzokwenzeka. Ngubani ongamtjela bona kuzokwenzakalani ngemva kwakhe na?

¹⁵ Ukutjhabatjheka kweendlhadlha kuzenza zidinwe ngombana azifikeleli emgomenazo.

¹⁶ Maye kuwe narha, nakube ikosakho isese siratjhana nalokha amakhosakho agidinga ekuseni!

¹⁷ Ubusisiwe wena narha nakube ikosakho ingusaziwako nalokha amakhosakho agidinga ngesikhathi esifaneleko, kobana abe namandla ingasi ubudakwa.

¹⁸ Ngebanga lobubozi ibhaluga lekumba liyabhecenyeka, ngokulembelela kwezandla ikumba iyanethela.

¹⁹ Umgidi wenzelwa ukwenama, iwayini lenza ipilo ibe mnandi nemali iyipendulo yakho koke.

²⁰ Ungathuki ikosi ngitjho nemkhumbulwenakho, nanyana uthuwelelise injinga nawungelawini lakho ngombana inyoni yomkayi ingathatha amezwakho, iye, isiphaphi singabika okutjhwileko.