UMTJHUMAYELI 1 - IsiNdebele 2012 Translation

Amezwi woMtjhumayeli

¹ Lawa mamezwi woMtjhumayeli, indodana kaDavida, ikosi yeJerusalema:

² “Kulilize lakolize!” Iye, uMtjhumayeli uthi: “Kulilize lakolize! Yoke into ililize!”

³ Kumbhadekela ngani umuntu ukutjhabatjheka kwakhe; akujulukela ngaphasi komthunzi welanga na?

⁴ Iinzukulwana ziyafika zibuye zidlule, kodwana iphasi linzinzile nini nanini.

⁵ Ilanga liyaphuma libuye litjhinge; lirhabe libuyele lapha liphume khona.

⁶ Ummoya uphembethela ngesewula, ubuye ujikele ngetlhagwini; ujikeleze njalo njalo, godu ubuyele emzombenawo.

⁷ Yoke imilambo igelezela ngelwandle, nanyana kunjalo alizali. Lapho imilambo igelezela khona ibuya igelezele lapho.

⁸ Zoke izinto ziyakhathaza, azihlathululeki emuntwini. Amehlo akadeli ukubona neendlebe azidinwa kulalela.

⁹ Okwakhe kwaba khona, kusazakuba khona godu; nokwakhe kwenziwa kusazakwenziwa godu, akunalitho elitjha ngaphasi komthunzi welanga.

¹⁰ Ingabe ikhona into ekungathiwa ngayo, “Qalani lapha, lokhu kutjha!” Kwabe kukhona kwekadeni, iye, ekadeni ngaphambi kwethu.

¹¹ Kwekadeni akusakhunjulwa, ngitjho nokusezako asoze kusakhunjulwa ngilabo abalandelako.

UMtjhumayeli uzizinya izinto

¹² Mina Mtjhumayeli nangisese yikosi phezu kwaka-Israyeli eJerusalema,

¹³ ngazinikela ekurhubhululeni nekuhlolisiseni ngokuhlakanipha koke okwenziwa ngaphasi komthunzi welanga. Maye, ubudisi kangangani umthwalo uZimu awethwese abantu kobana abatshwenye ngawo!

¹⁴ Ngibone koke okwenziwa ngaphasi komthunzi welanga: Yoke into ililize! Kukugijimisa ummoya!

¹⁵ Okusonganisiweko angeze kwathatjululwa, okutlhayelako angeze kwabalwa.

¹⁶ Ngadlumbana ngathi, “Qala, mina ngikhule benganda nokuhlakanipha ngaphezu kwabo boke abakhe babusa eJerusalema ngaphambi kwami. Nginelemuko elinengi ngokuhlakanipha nangelwazi.”

¹⁷ Nje-ke ngazinikela kobana ngazi ukuhlakanipha nokwazi kanye nokutlhoga ingqondo nobudlhadlha. Ngalemuka bonyana nakho lokho kukugijimisa ummoya:

¹⁸ Ekuhlakanipheni okunengi kunesizi elinengi, nokwanda kwelwazi kukwanda kokuhlupheka.