UMIKHA 6 - IsiNdebele 2012 Translation

Umphorofidi ubiza u-Israyeli bonyana azoziphendulela

¹ Akhese nilalele okutjhiwo nguSomnini. Uthe kimi: “Sikima, umangalele iintaba; imibundu ayizwe ubufakazi bakho.

² Yizwani nina ntaba ukumangala kwakaSomnini, lalelani nina nsekelo zephasi ezinini nanini. Ngambala uSomnini umangalela abantu bakhe, ubiza u-Israyeli bona azoziphendulela:

³ ‘Bantu bami, nginone ngani? Kghani nginidisibeze ngani na? Fakazani ngami-ke!

⁴ Iye, nganikhupha eGibhide; nganihlenga enarheni yobukhoboka. Nganithumela uMosi, u-Aroni noMeriyamu kobana banirhole.

⁵ Bantu bami, akhese nikhumbule bona uBhalakhi, ikosi yakwaMowabi, gade arerani ngani; nokobana uBhiliyamu, indodana kaBhewori, wamphendula wathini. Khumbulani bona kwenzekani ngani phakhathi kweTjhitimu neGiligali ukuze namukele imisebenzi elungileko eyenziwa nguSomnini.’ ”

Ipendulo yabantu

⁶ Ngizakulethani kuSomnini nangikhothamela uZimu ophakamileko? Kghani ngizakuletha phambi kwakhe umnikelo wokutjhiswa, ngizibike ngeenkunzana?

⁷ USomnini angathabela ikulungwana yamaqama neenkulungwana ezilitjhumi zemilambo yamafutha na? Kghani ngizakunikela ngezibulo lami bona ngihlawule imitjhapho yami, ngithathe indodanami ngihlawule ngayo izono zehliziywami?

Ipendulo yomphorofidi

⁸ USomnini ukwazisile wena muntu lokho okulungileko. Yini-ke okhunye uSomnini akulindele kuwe ngaphandle kokwenza akutjhwileko nokwethembeka esivumelwaneni sakhe bewukhambe noZimakho ngokutjhejisisa na?

Isigwebo seSamariya

⁹ Ilizwi lakaSomnini likhuluma nedorobho; kukuhlakanipha ukwesaba ibizo lakhe. USomnini wathi: “Lalela wena sephulamthetho ndina, mdlelezeli!

¹⁰ Wenandlu yokonakala benginganyamezelela isilinganiso sakho sobukhohlakali; nginyamezelele isilinganiso segagogo odlelezela ngaso na?

¹¹ Ngingathethelela umuntu okala imilandu yabantu ngesikala samanga nangomgodla onobudisi obuzele ikohliso na?

¹² Ngambala, iingwili zedorobho zinenturhu, izakhamuzi zakhona zibomalakazi namalimazo azele ikohliso.

¹³ Ngebangelo-ke sebengithomile ukukumukula wena dorobho, nokukurhayila ngebanga lezono zakho.

¹⁴ Uzakudla, kodwana ungasuthi; (Lokha naniya emabhayini imbewakho ayizukuba nepilo, nakungenzeka ibe nepilo ngizayinikelela ngekemba.)

¹⁵ Uzakutjala ungavuni litho, uminye ama-oliva, kodwana ungazizesi ngamafuthawo, nizakutlhodlha amadiribe kodwana ningarhamuli iwayini lakhona.

¹⁶ Neenthombe zabosingazimu baka-Omri zizakususwa, kuthi yoke imisebenzi yezandla yendlu ka-Ahabi isiphulwe ngombana ulandele iinluleko zabo. Ngebangelo-ke mina Somnini ngizakwenza amarubhi, izakhamuzi zakho ngizenze isiga; uzakuthwala isiphoqo esinqophiswe ebantwini bami.”