UMIKHA 5 - IsiNdebele 2012 Translation

¹ USomnini wathi: “Kodwana wena, Bhethe-Lehema yakwa-Efratha, nanyana umncani eenkorweni zakwaJuda nje, phakathi kwakho kuzakuphuma othileko ozakuba mbusi kwa-Israyeli ebizweni lami; ondabuko yakhe yavela phambilini ekadeni, ngowakhula inarha isalele.”

² Nje-ke uSomnini uzakunikela abantu beJerusalema ezandleni zezitha; kufikela lapha kubelethwa khona othileko, bese abafowabo abasekuthunjweni babuye bazihlanganise namanye ama-Israyeli.

³ Uzakujama begodu eluse abantu bakhe emandleni kaSomnini, ebizweni eliphakamileko lakaSomnini uZimakhe. Abantu bakhe bazakuhlala bavikelekile; ngambala uzakuduma iphasi loke.

Abathelisi bayaphendula godu

⁴ Awa, umbusethu akazukuthinteka. Nakuma-Asiriya wona, nange angalinga ukungena enarhenethu bese atjhagala emarholwenethu, sizawahlanganisa nabelusi abalikhomba nabarholi ababunane bezizwe ezinye.

⁵ Bazakudla inarha ye-Asiriya ngesabula, iye, inarha kaNimrodi ngesabula erhwatjhiweko. Yeke umbusethu uzasisindisa ema-Asiriyeni lokha nakalinga ukungena enarhenethu, nanyana atjhagala emkhawulwenethu.

UMikha wabaphendula

⁶ Iinzukulwana zakaJakopo phakathi kwezizwe zoke zizakuba njengombethe ovela kuSomnini, njengamathosi wezulu phezu kotjani obuhlaza. Azizukuthembela ebantwini begodu azizukurhuluphela ezizweni ezinye.

Abathelisi bathi

⁷ Awa, iinzukulwana zakaJakopo phakathi kwezizwe zizakufana nengwenyama phakathi kweenyamazana, njengebhubezana hlangana nomhlambi wezimvu. Zizakukhamba zigadanga, zirathula kungabi nosindisako.

⁸ Yewuphakamise isandla sakho wena muntu kaJakopo ujamelane nezitha zakho ukuze zirhayileke zoke.

⁹ USomnini wathi malungana nezitha zethu: “Mhlokho ngizakurhayila iinjomani zenu bengibhidlize neenkarana zenu zepi.

¹⁰ Ngizakurhayila amadorobho wenarhekhenu bengibhuruze woke amadorobhenu anemithangala.

¹¹ Ngizakurhayila ubuloyi benu beningasaba nababoni.

¹² Ngirhayile nabosingazimu benu ababaziweko namatjenu eniwalotjhako; angekhe benisakhothamela izinto enizibumbe ngezandla zenu.

¹³ Ngizakuruthula nesithombe senu u-Atjhera bengibhidlize neendawo zenu ezicwengileko.

¹⁴ Ngizazibuyiselela ngobukhali nangetukuthelo phezu kwezizwe ngendlela ezingazange ziyibone.”