UMIKHA 4 - IsiNdebele 2012 Translation

Ipendulo yabathelisi

¹ Kuzakufika isikhathi lapha intaba yethempeli lakaSomnini izakunzinza khona esiqongolweni seentaba; izakuphakanyiswa yengamele imibundu yoke; yeke izizwe zizayirhuluphela.

² Izizwe zoke zizakuhlangana zithi: “Nambani sikhambeni, senyukeleni entabeni kaSomnini, ekumbeni kaZimu wakaJakopo. USomnini uzasifundisa imithetho yakhe; ukuze sikhambe ngeendlela zakhe.” Ngambala kuzakubethwa umthetho eZiyoni, kuphume ilizwi lakaSomnini eJerusalema.

³ USomnini uzakugweba izizwe zoke begodu ararulule imiraro yezizwe ezinengi eziseduze nezikude. Zizakuthatha iinsabula zazo zenze ngazo amalembe wokulima; zithathe nemikhonto yazo zenze imikhwa yokuqopha imithi. Izizwe angeze zisaphakamiselana iinkhali, namkha zizibandulele ipi.

⁴ Woke umuntu uzazigedla ngaphasi kwesidiribe sakhe, nanyana ngaphasi komuthakhe wamakhiwani. Yeke akunamuntu ozabethusa. Ngambala uSomnini uSomandla ukhulumile.

⁵ Ngitjho nanyana izizwe zoke zingathembela kibosingazimu bazo, kodwana thina sizakuthembela kuSomnini uZimethu nini nanini.

⁶ USomnini wathi: “Mhlokho, “ngizakubuthelela abatshinyekileko; ngihlanganise ndawonye abaphadlhalajiweko nalabo engabazwisa ubuhlungu.

⁷ Abatshinyekileko ngizabenza isizwe esikhulu, abaqotjhiweko ngibenze isizwe esinamandla. USomnini uzakubusa phezu kwabo entabeni yeZiyoni kusuka mhlokho bekube nini nanini.

⁸ Wena-ke Sithala sokwelusa umhlambi, wena Ntatjana yendodakazi yeZiyoni, umbuso waphambilini uzakubuyiselwa kuwe, ngitjho ubukhosi bendodakazi yeJerusalema.”

Amezwi kaMikha

⁹ Alo, urhahlawulelani-ke gadesi Jerusalema, nangabe unekosi na? Kghani umlulekakho uhlongakele, nawulokhu uzibinyabinya inga umfazi oseenhlungwini zokubeletha nje na?

¹⁰ Yewuzibinyabinye urhuwelele njengomfazi obelethako wena ndodakazi yeZiyoni ngombana ngambala uzakuphuma ngedorobhenapha ukhambe uhloma umtlhatlhana emmangweni bewuyokufika eBhabheli. Lapho uzakwenyulwa; khonapho uSomnini uzakuhlenga esandleni sezitha zakho.

Abathelisi bayaphendula godu

¹¹ Ngambala izizwe ezinengi zihlangene ngawe Ziyoni, zithi: “Ayirhubutjhwe iZiyoni le, ukuze siyibone kuhle!”

¹² Kodwana izizwezi aziwazi umkhumbulo kaSomnini namaqhingakhe aziwalimuki. Ngambala uzazibuthelela njengeenqwambe zekoroyi eselelweni,

¹³ bese uthi: “Sikima ugadange, ndodakazi yeZiyoni ngombana ngizakuhlomela iimpondo zesimbi, ngikufake iinqatha zekoporo bese upitliza izizwe ezinengi. Ulethe kimi iinzuzo zazo ezizifumene ngobugirikijani, kimi mina Kosi yephasi loke.”

UMikha uphendula ukuzikhohlisa kwabo

¹⁴ Lokha nawubuthelela amabuthwakho, Dorobho lemigulukudu, izitha zizabe zisizombelezile. Zizakusawula umbusi wakwa-Israyeli emhlathini ngentonga.