UMIKHA 2 - IsiNdebele 2012 Translation

Ukugwetjwa kwabathelisi

¹ Bazazizwa labo abatlama ikohlakalo ebusuku, iye, abogalajanaba! Kuthi ekuseni bayenze ngombana kusemandlenabo.

² Nabakhanuka amasimu bayawahluthula, nabarhalela izindlu, bayazithatha. Bagalaja isakhamuzi umzaso, basidlelezele ilifa laso.

³ Yeke uSomnini wathi: “Qala, nginitlamela ikohlakalo nina sigungu ndina. Kuzakuphela ukukhambela phezulu ngombana nizabe nibotjhelelwe ejogini isiphelani. Ngambala kuzabe kusikhathi esimasikizi kini.”

⁴ Mhlokho, abantu bazaniphoqa, babhine ingoma yesililo ngani bathi: “Siyavuma, sirhurhutjhiwe! USomnini uhlukanisa ilifa labantu bekhethu. Maye, ulihluthule kangangani kithi! Wabela abadududu inarhethu.”

⁵ Yeke anizukuba nomjameli phambi kwakaSomnini nakwabiwa inarhenu ngefumbe.

Abathelisi baphikisa uMikha nabantu bakhe

⁶ “Ningaphikeleli ukuphorofida. Aninalungelo lokuphorofida njalo, isiphoqweso asizukusehlela;

⁷ ngombana uSomnini uthembise indlu kaJakopo; uMoya wakaSomnini uyabekezela; uSomnini akenzi izinto ezinjalo.” Awa, amezwami amenzela okuhle olungileko.

UMikha uyaphendula

⁸ Kodwana nina nibe sisitha sabantu bekhethu najamelana nabathanda ukuthula. Niwunawune abantu abazidlulela ngendlela abangananturhu namuntu benabahlubulisa, nathatha izambatho zabo.

⁹ Niqotjha abafazi babantu bekhethu ezindlini abazithandako; nithathela abantwababo isabelo benibatlhagise isiphelani.

¹⁰ Zilungiseleleni ukukhamba ngombana akusiyo indawenu yokuphumula le. Ukusilaphala kwenu kuyonile. Maye kubuhlungu kangangani ukonakala kwayo!

¹¹ Nami bengingaphorofida kini ngewayini nangotjwala obunengi; kodwana umuntu kaMoya akaleyi amala. Nokho isigungu sabaphorofidi benwesi sithi:

¹² “USomnini wathi: ‘Ngambala ngizababuthelela ndawonye boke abantu bakaJakopo, iinzukulwana zaka-Israyeli. Ngibaragele esibayeni njengezimvu, iye, njengeenkomo emrageni; babe liwoma bahumuzele.’ ”

¹³ Begodu bathi: “Loyo oliVulandlela uzabarhola. Bazakufahla baphume esangweni; batjhaphuluke. Ikosabo izabakhomba indlela, ibe yihlokwabo.”