UMATEWU 9 - IsiNdebele 2012 Translation

UJesu upholisa umuntu orhwahlapheleko

¹ UJesu wangena ngemkhunjini, wayamela ngaphetjheya kwelwandle waya edorobheni lekhabo.

² Qala abantu baletha kuye umuntu okhubazekileko, alele emkghadini. Kwathi bona uJesu abone ukukholwa kwabo, wathi emuntwini okhubazekileko loyo: “Qina isibindi, ndodana, izono zakho zicolelwe.”

³ Qala, abanye babafundisi bomthetho bathi omunye komunye: “Umuntu lo ukhuluma ihlamba!”

⁴ Ngokwazi imizindlo yabo, uJesu wathi: “Kubayini nizindla ngokumbi eenhliziyweni zenu na?

⁵ Ngikuphi okulula kini ukuthi, ‘Izono zakho zicolelwe’, nokuthi, ‘Sikima, ukhambe’ na?

⁶ Ngizanibonisa-ke bona iNdodana yoMuntu inamandla ephasinapha wokucolela izono.” Yeke wathi emuntwini okhubazekileko: “Sikima, uthathe umkghadakho ukhambe uye ekhaya!”

⁷ Umuntu loyo wasikima waya ekhaya.

⁸ Kwathi bonyana abantu bakubone lokho, besaba, badumisa uZimu ophe abantu amandla angaka.

Ukubizwa kwakaMatewu

⁹ UJesu wathi nasuka lapho; wabona umuntu ekuthiwa nguMatewu, ahlezi ngekumbeni yomthelo. Wathi kuye: “Ngilandela.” UMatewu wasikima wamlandela.

¹⁰ Kwathi uJesu asagoma ngekumbeni kaMatewu, kwafika abathelisi abanengi nezoni, bahlanganela noJesu nabafundi bakhe ekudleni.

¹¹ Lokha abaFarisi nababona lokhu babuza abafundi bakhe bathi: “Kubayini umfundisenu agoma nabathelisi nezoni na?”

¹² UJesu nezwa lokhu wabaphendula wathi: “Abantu abaphilileko abayidingi inyanga, kodwana ifunwa ngabagulako kwaphela.

¹³ Kodwana khambani niyokufunisisa bona umtlolo lo uthini lokha usithi, ‘Ngilulukela ukwethembeka, ingasi umhlabelo.’ Angikazeli ukuzokubiza abantu abalungileko, kodwana ngizele ukuzokubiza izoni.”

Umbuzo ngokuzila ukudla

¹⁴ Yeke abalandeli bakaJwanisi beza kuJesu bambuza bathi: “Kubangelwa yini thina nabaFarisi sizila ukudla, kodwana abafundi bakho bona abazili ukudla na?”

¹⁵ UJesu wabaphendula wathi: “Abayeni bomkhwenyana bangazila njani khisibe usesenabo na? Isikhathi sizakufika sokobana umkhwenyana asuswe kibo, ngesikhatheso-ke, bazakuzila ukudla.

¹⁶ “Akakho otjheza isambatho esidala ngesitjheza esitjha ngombana isitjheza esitjha sizakurharhabuluka esambathwenapho, sidale itjhuba eledlula lokuthoma.

¹⁷ Godu akuthelwa iwayini elitjha ngeenkhwameni ezidala zewayini, nakungasinjalo iinkhwama zizakurathuka, iwayini liphalake, konakale iinkhwamezo. Kunalokho iwayini elitjha lithelwa ngeenkhwameni ezitjha, kulondeke kokubili.”

Umntazana ohlongakeleko nomfazi ogulako

¹⁸ Kwathi uJesu asakhuluma lokhu, kweza umphathi wesinagogi wafese waguqa phambi kwakhe, wathi: “Indodakazami iqeda ukuhlongakala, yewuze uzoyibeka izandla khona izakuphila.”

¹⁹ Yeke uJesu wasikima wamlandela nabafundi bakhe bakhamba naye.

²⁰ Khonapho umfazi obekaphopha iingazi iminyaka elitjhumi nambili weza ngemva koJesu, wafika wakghwatha umphetho wesambatho sakhe.

²¹ Wazitjela wathi: “Nange ngingakghwatha nje isambatho sakhe kwaphela, ngizakuphola.”

²² UJesu waphenduka, wambona, wathi: “Yiba nesibindi, ndodakazi! Ukukholwa kwakho kukupholisile.” Nje-ke umfazi loyo waphola khonokho.

²³ Kwathi uJesu nangena ngekumbeni yomphathi wafumana ababethi beempalapala nesiqubuthu ebesenza itjhada,

²⁴ wathi: “Phumani noke! Umntazana akakafi, ulele.” Kodwana bamhleka.

²⁵ Kwathi bona kukhutjhelwe isiqubuthu ngaphandle, uJesu wangena ngelawini lomntazana wambamba ngesandla, wavuka.

²⁶ Iindaba ngalokhu zarhatjheka nesifundeso soke.

UJesu upholisa isiphofu nesimumu

²⁷ UJesu nasuka lapho walandelwa madoda amabili aphopheleko amrhuwelela athi: “Ndodana kaDavida, sirhawukele!”

²⁸ Kwathi bona angene ngekumbeni, iimphofu ezimbili zeza kuye, wazibuza wathi: “Niyakholwa bona ngingakghona ukwenza lokho na?” Zamphendula zathi: “Iye, Kosi!”

²⁹ Yeke uJesu wakghwatha amehlwazo wathi: “Akwenzeke njengokukholwa kwenu!”

³⁰ Zaphophuluka. UJesu waziyelelisa khulu, wathi: “Qinisekisani bona kungabi namuntu owazi ilitho ngalokhu!”

³¹ Kodwana zakhamba zarhatjha iindaba ngaye kiso soke isifunda.

³² Kwathi lokha nabaphumako, kwalethwa kuJesu umuntu ogade anedimoni begodu asimumu.

³³ Ngemva kobana idimoni liqotjhiwe, umuntu obegade asimumu wakhuluma. Isiqubuthu sarareka sabe sathi: “Into enje azange kheyibonwe kwa-Israyeli!”

³⁴ Kodwana abaFarisi bathi: “Uqotjha amadimoni ngombusi wamadimoni.”

Iinsebenzi nokuvuna

³⁵ UJesu wadabula imizi nemizana, wafundisa ngemasinagogini wabo, watjhumayela ivangeli lombuso kaZimu, wapholisa abantu abaphethwe mihlobo ngemihlobo yobulwelwe nezifo.

³⁶ Kwathi bona abone iinqubuthu, wazirhawukela ngombana gade zihlukumeziwe begodu zinganamandla, zifana nezimvu ezingenamelusi.

³⁷ Yeke wathi ebafundini bakhe: “Isivuno sinengi, kodwana iinsebenzi zilibinzana.

³⁸ Bawani iKosi yesivuno bona ithumele iinsebenzi esiminayo yesivuno.”