UMATEWU 8 - IsiNdebele 2012 Translation

Indoda enekhwekhwe

¹ Kwathi uJesu selehlile entabeni, isiqubuthu esikhulu samlandela.

² Indoda enekhwekhwe yeza kuye, yafese yaguqa phambi kwakhe, yathi kuye: “Kosi, nawuthandako ungangihlambulula.”

³ UJesu wathabulula isandla sakhe wakghwatha indoda leyo, wathi: “Ngiyathanda, hlambuluka!” Khonokho indoda leyo yaphola.

⁴ Yeke uJesu wathi kiyo: “Qinisekisa bona awutjeli muntu namunye, kodwana khamba unqophe kumphristi, ukhuphe isipho njengokomyalo kaMosi, kube bufakazi kibo.”

Ukukholwa kwenceku yenduna

⁵ Kwathi uJesu sele angene eKapernawumi, umphathimabutho wamhlangabeza abawa isizo,

⁶ wathi: “Kosi, ikhoboka lami liyagula ekhaya le, likhubazekile begodu liseenhlungwini.”

⁷ UJesu wathi: “Ngizakukhamba ngiyolipholisa.”

⁸ Umphathimabutho waphendula wathi: “Kosi angikafanelwa kukobana ungeza kwami. Khupha nje ilizwi, ikhoboka lami lizakuphola.

⁹ Nami ngokwami ngiphethwe, nginamajoni angaphasi kwami. Nangithi kelinye, ‘Khamba!’ liyakhamba, nangithi, ‘Yizapha!’ liyeza. Ngithi ekhobokeni lami, ‘Yenza lokhu!’ bese liyenza.”

¹⁰ Lokha uJesu nezwa lokhu, warareka bewathi ebantwini ebebamlandela: “Ngiqinisile ngiyanitjela bona azange khengifumane noyedwa kwa-Israyeli onokukholwa okungaka.

¹¹ Nje-ke ngiyanitjela bona abanengi bazakuvela ngepumalanga nangetjingalanga, bahlale phasi esidlweni no-Abrahamu, u-Isaka noJakopo embusweni wezulu.

¹² Kodwana labo abangebombuso bazakulahlelwa ngaphandle ebumnyameni, lapha kuzakuba khona ukulila nokugedla kwamazinyo.”

¹³ Yeke uJesu wathi kumphathimabutho: “Khamba! Kuzakwenzeka njengokukholwa kwakho.” Ikhoboka lakhe laphola khonokho.

UJesu upholisa abantu abanengi

¹⁴ UJesu waya ngekumbeni kaPitrosi, wafunyana umkhwekazi kaPitrosi alele, aphethwe mgomani.

¹⁵ Wakghwatha isandla sakhe; umgomani wamlisa, wavuka khonokho, wenzela uJesu okugonywako.

¹⁶ Kwathi nakuhlwako kwalethwa kuye abanengi ebebanamadimoni, waqotjha imimoya ngelizwi kwaphela bewapholisa abagulako.

¹⁷ Lokhu kwenzeka khona kuzakuzaliseka okwakhulunywa ngomphorofidi u-Isaya, nasithi: “Khonapho yathwala ukugula kwethu, yatjatha iinsizi zethu.”

Umvuzo wokulandela uJesu

¹⁸ Kwathi uJesu nabona isiqubuthu simzombelezile, wakhupha umyalo wokobana kweyanyelwe ngaphetjheya kwelwandle.

¹⁹ Umfundisi womthetho weza kuye wathi: “Mfundisi, ngizakulandela nanyana kukuphi lapha uya khona.”

²⁰ UJesu wamphendula wathi: “Iimpungutjha zinemigodi, iinyoni zineenhlakana, kodwana iNdodana yoMuntu ayinandawo yokubeka ihloko.”

²¹ Omunye wabafundi wathi: “Kosi, akhe ngiyokubulunga ubaba ntange.”

²² Kodwana wamphendula wathi: “Yewungilandele, lisa abafileko babulungane.”

UJesu uthulisa isiwuruwuru

²³ UJesu wangena ngemkhunjini; abafundi bakhe bamlandela.

²⁴ Khonokho, qala kwavuka isiwuruwuru esikhulu ngelwandle, umkhumbi wafuna ukucwila. Kodwana uJesu bekalele.

²⁵ Abafundi baya kuye bamvusa bathi: “Kosi! Yewusisindise, safa!”

²⁶ UJesu wabaphendula wathi: “Kubayini nesabe nina bokukholwa okuncani na?” Yeke wavuka wakhalimela isiwuruwuru namaza, kwaba khona ukuthula okukhulu.

²⁷ Abantu barareka, bathi: “Mumuntu onjani-ke lo? Ngitjho isiwuruwuru namaza kuyamlalela!”

Ukupholiswa konemimoya emimbi

²⁸ Kwathi bona uJesu afike esifundeni seGadara ngaphetjheya kwelwandle, wahlangatjezwa babantu ababili abanamadimoni abaphuma emalibeni. Abantwaba gade banenturhu kangangobana abantu bebangasakghoni ukukhamba ngendlela leyo.

²⁹ Qala, barhuwelela bathi: “Usifunani wena Ndodana kaZimu na? Uzele ukuzosihlunguphaza, isikhathi singakafiki na?”

³⁰ Mlenzana nalapho bekukhona umhlambi wezavukazana, udla.

³¹ Yeke amadimoni arabhela uJesu athi: “Nangabe uzosiqotjha lapha, khona-ke sithumela emhlambini wezavukazana lo.”

³² UJesu wathi kiwo: “Khambani!” Yeke akhamba angena ezavukazaneni. Woke umhlambi wagijimela ngerharheni, wadlhumukela ngelwandle, wafela ngemanzinapho.

³³ Abelusi bezavukazana babaleka, bangena ngedorobheni, bafese babika koke lokho ngitjho nokwenzeke ebantwini abanamadimoni.

³⁴ Yeke boke abantu bedorobho baphuma bayokuhlangabeza uJesu. Kwathi bonyana bambone, bamrabhela bona akhambe esifundeni sekhabo.