UMATEWU 7 - IsiNdebele 2012 Translation

Ukugweba abanye

¹ “Ningagwebi abanye, nakungasinjalo nani nizokugwetjwa

² ngombana indlela enigweba ngayo abanye nani nizokugwetjwa ngayo.

³ “Kubayini ukghona ukubona itserana engelihlweni lakamfowenu, kodwana uhlulwe kubona isigodo esingelihlweni lakho na?

⁴ Ungatjho njani kumfowenu uthi, ‘Angikhuphe itserana engelihlweni lakho,’ khisibe wena unesigodokazi ngelihlweni lakho na?

⁵ Wena mzenzisi ndina! Thoma ukhuphe isigodokazi esingelihlweni lakho qangi, nje-ke uzakghona ukubona kuhle ukuze ukhuphe itserana engelihlweni lomfowenu.

⁶ “Ninganikeli izinja okucwengileko, ningaphoseli amatjenu aligugu ezavukazaneni. Nanenza njalo, zizawagadangela ngeenyawo bese ziyajika zinidabudabula iinquqwana.”

UZimu uyapha umuntu nabawako

⁷ “Bawani nizakuphiwa; funani nizakufumana; kokodani nizakuvulelwa

⁸ ngombana loyo naloyo obawako uzakuphiwa, ofunako uzakufumana, nokokodako uzakuvulelwa.

⁹ Ngubani phakathi kwenu ongathi umntwanakhe nabawa isikwa, amuphe ilitje na?

¹⁰ Namkha kuthi nabawa ihlambi amuphe inyoka na?

¹¹ Nakube-ke nina, ngitjho nanyana nikhohlakele kangaka nje, nikwazi ukupha abantwabenu izipho ezihle, kangangani-ke uYihlo osezulwini! Uzabapha izipho ezihle khulu labo abambawako.

¹² “Yeke kikho koke, yenza kabanye lokho ongathanda bonyana bakwenze kuwe ngombana lokhu ngokutjhiwo mthetho nabaphorofidi.”

Isango elincani nelikhulu

¹³ “Ngenani ngesango elincani ngombana isango eliya ekubhujisweni likhulu nendlela yakhona ibanzi begodu banengi abakhamba ngayo.

¹⁴ Kodwana isango eliya ekuphileni lincani nendlela yakhona imkghotho begodu balibinzana abayifumanako.”

Umuthi neenthelo zawo

¹⁵ “Yelelani abaphorofidi bamanga. Beza kini bembethe njengezimvu kodwana ngaphakathi khisibe baziimpisi ezirhiribidelako.

¹⁶ Nizababona ngeenthelo zabo. Abantu bayawakha amadiribe emeveni namkha amakhiwani emthini womunga na?

¹⁷ Ngokunjalo omunye nomunye umuthi omuhle uthela iinthelo ezihle, kodwana umuthi omumbi uthela iinthelo ezimbi.

¹⁸ Umuthi omuhle angekhe wathela iinthelo ezimbi, nomuthi omumbi angekhe wathela iinthelo ezihle.

¹⁹ Omunye nomunye umuthi ongatheli iinthelo ezihle uyaquntulwa uphoswe emlilweni.

²⁰ Yeke-ke, nizababona ngeenthelo zabo.”

Ukuzikhohlisa

²¹ “Akusuye woke othi kimi, ‘Kosi, Kosi’ ozakungena embusweni wezulwini, kodwana kwaphela loyo owenza intando kaBaba osezulwini.

²² Mhlokho abanengi bazakuthi kimi, ‘Kosi, Kosi, azange siphorofide ebizweni lakho besaqotjha amadimoni ngalo ibizo lakho senza neemangaliso ezinengi na?’

²³ Yeke ngizabatjela emehlweni ngithi kibo, ‘Azange khenginazi. Sukani kimapha, nina nkhohlakali ndina!’ ”

Abakhi abahlakaniphileko nabaziindlhadlha

²⁴ “Yeke nanyana ngubani ozwa amezwami la, awenze, unjengomuntu ohlakaniphileko owakha indlwakhe phezu kwedwala.

²⁵ Izulu lawuluka, imilambo yaphuphuma, ummoya waphephetha ngamandla phezu kwendlu leyo. Kodwana azange iwe ngombana yakhiwe phezu kwedwala.

²⁶ “Kodwana nanyana ngubani ozwa amezwami la, angawenzi, unjengomuntu osidlhadlha owakha indlwakhe phezu kwetjhwabatjhwaba.

²⁷ Izulu lawuluka, imilambo yaphuphuma, ummoya waphephetha ngamandla phezu kwendlu leyo, nje-ke yawa. Kwaba kukhulu ukuwa kwayo!”

²⁸ Kwathi bona uJesu aqede ukukhuluma izintwezi, isiqubuthu sarareka ngendlela afundisa ngayo

²⁹ ngombana gade afundisa njengonegunya, ingasi ngendlela abafundisi bomthetho bebafundisa ngayo.