UMATEWU 6 - IsiNdebele 2012 Translation

Ukunikela malungana nabadududu

¹ “Yelelani bona ningenzi izenzo zenu zokulunga phambi kwabantu kobana banibuke ngombana nanenza njalo, angekhe nawufumana umvuzo wenu ovela kuYihlo osezulwini.

² “Nje-ke lokha nanipha abadududu, ningamemezeli ngeemporompita njengombana kwenza abazenzisi ngemasinagogini neendledlaneni ukuze bahlonitjhwe babantu. Ngiqinisile ngiyanitjela bona sele bamukele umvuzwabo ngokupheleleko.

³ Kodwana lokha nawupha abadududu, ungavumeli kobana isincele sakho sazi lokho okwenziwa sisidla sakho

⁴ ukuze umnikelwakho ube sekusithekeni. Ngaleyondlela uYihlo obona ekusithekeni uzakuvuza.”

Umthandazo

⁵ “Lokha nawuthandazako, ungabi njengabazenzisi ngombana bathanda ukuthandaza bajamile ngemasinagogini nemajikeni weendledlana ukuze babonwe babantu. Ngiqinisile ngiyanitjela bona sele bawufumene umvuzwabo ngokupheleleko.

⁶ Kodwana wena nawuthandazako, ngena ngelawini lakho, uvale umnyango bese uthandaza kuYihlo ongabonwako. Nje-ke uYihlo obona lokho okwenziwa ngemsitheleni, uzakuvuza.

⁷ “Nanithandazako, ningaratharathi njengabangakholwako, abadlumbana bonyana bazakuzwiwa ngebanga lamezwabo amanengi.

⁸ Ningabi njengabo ngombana uYihlo wazi enikudingako ningakambawi.

⁹ Nasi-ke indlela ekumele nithandaze ngayo, “ ‘Baba wethu osezulwini, alicwengiswe ibizo lakho,

¹⁰ umbuso wakho awufike, intando yakho yenziwe ephasini njengombana kunjalo ezulwini.

¹¹ Usiphe namhlanjesi isikwa sethu sangemihla.

¹² Usilibalele amacalethu njengombana sibalibalela abanamacala kithi.

¹³ Ungasingenisi ekulingweni, kodwana yewusitjhaphulule kokumbi ngombana umbuso ungowakho, amandla nephazimulo ngokungapheliko. Amen.’

¹⁴ “Nanilibalela abantu abanitjhapheleko noYihlo osezulwini uzanilibalela.

¹⁵ Kodwana naningalibaleli abantu abanitjhapheleko noYihlo angekhe anilibalela imitjhapho yenu.”

Ukuzila ukudla

¹⁶ “Nanizila ukudla, ningatjhitjhibalisi ubuso njengabazenzisi ngombana banyukubalisa ubuso babo ukubonisa abantu bonyana bazile ukudla. Ngiqinisile ngiyanitjela bona sele bamukele umvuzwabo ngokupheleleko.

¹⁷ Kodwana wena nawuzilako, hlamba ubuso bakho, ukame iinhluthu zakho

¹⁸ ukuze ungabonakali ebantwini kobana wena uzile ukudla, ngaphandle kwakaYihlo, ongabonwako. UYihlo obona okwenziwa ekusithekeni, uzakuvuza.”

Umnotho ezulwini

¹⁹ “Ningazibekeli umnotho ephasinapha, lapha kunomvunya nokukhuna okurhayilako nalapha amasela afohla khona ebe.

²⁰ Kodwana zibekeleni umnotho ezulwini lapha umvunya nokukhuna kungeze kwarhayila khona nalapha amasela angeze afohla ebe

²¹ ngombana lapha kunomnothwakho khona nehliziywakho ilapho.”

Ukukhanya komzimba

²² “Ilihlo lisibani somzimba. Nakube amehlwakho alungile, umzimbakho woke uzakuba nokukhanya.

²³ Kodwana nakube amehlwakho mambi, umzimbakho woke uzakwembathwa bumnyama. Yeke nangabe umkhanyo ngaphakathi kwakho ubumnyama, maye bungangani ubumnyamobo!”

Isiyeleliso ngomnotho

²⁴ “Akakho ongasebenzela abaphathi ababili. Uzakuzonda omunye athande omunye namkha azinikele ngokupheleleko komunye bese unyaza omunye. Anikwazi-ke ukulotjha uZimu khibe ngapha nilotjhana noMamoni.”

Ukukhathazeka ngepilo

²⁵ “Ngalokho-ke ngiyanitjela, ningakhathazeki ngepilwenu bona nizogomani namkha nizokuselani. Ningakhathazeki nangemizimbenu bona nizokwembathani. Kghani ipilo ayikaqakatheki khulu ukwedlula ukudla na? Nomzimba awukaqakatheki khulu kunezambatho na?

²⁶ Qalani, iinyoni zomkayi azitjali, azivuni namkha zibeke ngeenlulwini. Kodwana uYihlo osezulwini uyazondla. Alo, nina anikaqakatheki khulu kuneenyoni na?

²⁷ Ngubani-ke phakathi kwenu ongangezelela i-awara linye epilwenakhe ngokukhathazeka na?

²⁸ “Kubayini nikhathazeke ngezambatho na? Qalani bona amakhwa wommango amila njani; akasebenzi namkha aphothe intambo.

²⁹ Kodwana ngiyanitjela bonyana ngitjho noSolomoni kibo boke ubuphaziphazi bakhe azange akhe embathe njengamanye wawo.

³⁰ Nakube uZimu wembesa utjani bommango obukhona namhlanjesi kusasa butjhiswe ngomlilo, akazunembesa ukwedlula, nina bokukholwa okuncani na?

³¹ “Yeke ningathomi nikhathazeke bese nithi, ‘Alo sizogomani nje?’ namkha, ‘Sizokuselani?’ namkha, ‘Sizokwembathani?’

³² Lezi zizinto abangakholwako abazigijimelako. Nje-ke uYihlo osezulwini uyazi bona niyazidinga izintwezi.

³³ Kodwana funani qangi umbuswakhe nakho koke ukulunga kwakhe, nje-ke koke lokhu nakho nizakuphiwa khona.

³⁴ Yeke ningakhathazeki ngelingomuso ngombana ilingomuso lizakukhathalela kwalo. Elinye nelinye ilanga lineenkathazo zalo ezaneleko.”