UMATEWU 5 - IsiNdebele 2012 Translation

Itjumayelo yentabeni

¹ Kwathi lokha uJesu nabona iinqubuthu, wenyukela entabeni. Sele ahlezi phasi, abafundi bakhe beza kuye.

² Yeke wathoma ukubafundisa wathi:

³ “Babusisiwe abaswelako emmoyeni ngombana umbuso wezulu ungewabo.

⁴ Babusisiwe abalilako ngombana bazakududuzwa.

⁵ Babusisiwe abamnene ngombana bazakugoma ilifa lephasi.

⁶ Babusisiwe abalambele bomele ukulunga ngombana bazakusuthiswa.

⁷ Babusisiwe abanesirhawu ngombana bazakurhawukelwa.

⁸ Babusisiwe abahlanzekileko eenhliziyweni ngombana bazombona uZimu.

⁹ Babusisiwe abalamulako ngombana kuzakuthiwa bantwana bakaZimu.

¹⁰ Babusisiwe abazunywa ngebanga lokulunga ngombana umbuso wezulu ungewabo.

¹¹ “Nibusisiwe lokha nabanithukako, banizuma bebakhulume koke okumbi ngani ngebanga lami.

¹² Thabani nithokoze ngombana umvuzo wenu mkhulu ezulwini. Nabaphorofidi ababakhona ngaphambi kwenu babazuma ngayo indlela le.”

Itswayi nomkhanyo

¹³ “Nina nilitswayi lephasi, kodwana itswayi nasele liqwatjhile, ubutswayi balo bungabuyiselwa njani na? Alisenamsebenzi, kwaphela selilungele ukulahlelwa ngaphandle, abantu baligadange.

¹⁴ “Nina nimkhanyo wephasi. Umuzi owakhiwe entabeni angekhe wafihleka.

¹⁵ Akakho othi angakhanyisa isibani asibeke ngaphasi kwesitja, kodwana usibeka phezu kwesitja lapha sizakukhanyisela khona woke ongekumbeni.

¹⁶ Ngokunjalo akukhanye ukukhanya kwenu phambi kwabantu ukuze babone imisebenzenu emihle, badumise uYihlo osezulwini.”

Ukufundisa ngomthetho

¹⁷ “Ningadlumbani bonyana ngizele ukuzokuchitha umthetho namkha abaphorofidi. Angikazeli ukuzokuchitha, kodwana ngizele ukuzokugcwalisa.

¹⁸ Ngambala ngiyanitjela bona kungakadluli izulu nephasi, akunaledere nalinye, ngitjho nesiqetjhana segama esizokudlula emthethweni bekupheliswe koke.

¹⁹ Yeke, nanyana ngubani owephula ngitjho nomncani wemiyalo le bese afundise nabanye ukwenza njalo, uzakubizwa bona mncani embusweni wezulu. Kodwana nanyana ngubani oyenzako abe ayifundise, uzakubizwa bona mkhulu embusweni wezulu

²⁰ ngombana ngiyanitjela bonyana nakube ukulunga kwenu akudluli kwabafundisi bomthetho nabaFarisi, anisoze nangena embusweni wezulu.”

Ifundiso ngokuthukuthela

²¹ “Nizwile bona abantu ekadeni batjelwa kwathiwa, ‘Ungabulali; ngiloyo naloyo obulalako uzokugwetjwa.’

²² Kodwana kwanjesi ngithi kini ngiloyo naloyo othukuthelela umfowabo uzokugwetjwa. Godu nanyana ngubani othi kumfowabo, ‘Nto ndina!’, uzokudoselwa ebandla. Godu nothi kumfowabo, ‘Sidlhadlha ndina!’, uzokuba sengozini yokuphoselwa emlilweni wesirhogo.

²³ Yeke lokha nawuletha umnikelwakho e-aldarini, khonapho bese uyakhumbula bona umfowenu unamavundo nawe,

²⁴ tjhiya umnikelwakho lapho phambi kwe-aldari, ukhambe khonokho uyokubuyisana naye bese uyabuya-ke uzokunikela umnikelwakho.

²⁵ “Rhaba ulungise indaba naloyo okulwisako nisesendleleni yokuya ebandla, nakungasinjalo uzakunikela ezandleni zomgwebi, yena akunikele ezandleni zabalindi, uphoselwe ngesikhungweni.

²⁶ Ngiqinisile ngithi kuwe uzakubhadla ngapho kufikela bewukhokhe ngitjho nopenyanakho wokugcina.”

Ifundiso ngokuhlobonga

²⁷ “Nizwile bona abantu ekadeni batjelwa kwathiwa, ‘Ungahlobongi.’

²⁸ Kodwana ngiyanitjela bona nanyana ngubani oqala umfazi amkhanuke sele ahlobonge naye ngehliziywenakhe.

²⁹ Nakube ilihlo lakho langesigomeni likwenza wone, ligobhodlhe ulilahle! Kungcono khulu ukulahlekelwa ngesinye sezitho zakho zomzimba kunobanyana umzimbakho woke uphoselwe ngesirhogweni.

³⁰ Nangabe isandla sakho sangesigomeni sikwenza bona wone, siqunte usilahle! Kungcono khulu ukulahlekelwa sisandla sakho kunobanyana umzimbakho woke uphoselwe ngesirhogweni.”

Ifundiso ngokutlhalana

³¹ “Godu kwathiwa, ‘Nanyana ngubani otlhalana nomkakhe kufanele amnikele incwadi yesahlukaniso.’

³² Kodwana ngithi kini nanyana ngubani otlhala umkakhe ngaphandle kweenzathu zokuhlobonga, umbangela bona ahlobonge begodu nanyana ngubani othatha umfazi otlhaliweko uyahlobonga.”

Ifundiso ngokufunga

³³ “Nizwile bona abantu ekadeni batjelwa kwathiwa, ‘Ungafungi ngamanga, kodwana yenza iimfungo owazenza kuSomnini.’

³⁴ Kodwana ngiyanitjela bona ningafungi nakanye, kungabi ngezulu ngombana lisihlalo sobukhosi sakaZimu,

³⁵ namkha ngephasi ngombana lisinabelo seenyawo zakhe, namkha ngeJerusalema ngombana lilidorobho leKosi ekulu.

³⁶ Ungafungi ngehlokwakho ngombana angekhe watjhugulula ngitjho nasinye isihlutjhwana sibe mhlophe namkha sibe nzima.

³⁷ Kwaphela yithi, ‘Iye, iye’ namkha, ‘Awa, awa’. Okudlula lokhu kuvela komumbi.”

Ifundiso ngokubuyisela

³⁸ “Nizwile bona kwathiwa, ‘Ilihlo ngelihlo, izinyo ngezinyo.’

³⁹ Kodwana kwanjesi ngithi kini: Ningajamelani nesikhohlakali. Umuntu nakuwahla emhlathini wangesigomeni, mnikele nomunye umhlathi.

⁴⁰ Nakube kukhona ofuna ukukudosela ebandla kobana akwemuke isambatho sakho, mnikele nesinye.

⁴¹ Okukatelela bona ukhambe naye ikhilomitha elilodwa, khamba naye amakhilomitha amabili.

⁴² Yipha woke umuntu okubawa okuthileko, ungabagodleli ababoleka kuwe.”

Ukuthanda izitha

⁴³ “Nizwile bona kwathiwa, ‘Thanda umuntu womphakathi uzonde isitha sakho.’

⁴⁴ Kodwana manjesi ngithi kini: Thandani izitha zenu, nithandazele labo abanizumako,

⁴⁵ ukuze nibe bantwana bakaYihlo osezulwini ngombana wenza ilanga lakhe liphumele abambi nabalungileko, anise nezulu kabalungileko nabakhohlakeleko.

⁴⁶ Yeke nanithanda labo abanithandako, ninomvuzo bani na? Angithi nabathelisi benza njalo?

⁴⁷ Godu nanibingelela abafowenu kwaphela, nizakuthi nibaphala ngani abanye abantu na? Angithi nabatjhili bayakwenza lokho na?

⁴⁸ Yeke yibani ngabapheleleko njengombana noYihlo osezulwini aphelele!”