UMATEWU 4 - IsiNdebele 2012 Translation

Ukulingwa kwakaJesu

¹ Yeke uMoya wadosela uJesu erhalawumbeni bona ayokulingwa nguSathana.

² Ngemva kobana azile ukudla amalanga amatjhumi amane nobusuku bakhona, walamba.

³ Yeke umlingi weza kuye wathi: “Nangabe uyiNdodana kaZimu, tjela amatje la bona aphenduke isikwa.”

⁴ Kodwana uJesu waphendula wathi: “Kutloliwe kwathiwa, “ ‘Umuntu akaphili ngesikwa kwaphela kodwana ngelinye nelinye ilizwi eliphuma emlonyeni kaZimu.’ ”

⁵ Yeke uSathana wathatha uJesu wamusa edorobheni elicwengileko, wamjamisa esiqongolweni sethempeli;

⁶ wathi kuye: “Nangabe uyiNdodana kaZimu, ziphosele phasi ngombana kutloliwe kwathiwa, “ ‘UZimu uzakuyala iingilozi zakhe ngawe; zizakukhakhuna ngezandla zazo, ukuze iinyawo zakho zingabetheki ematjeni.’ ”

⁷ UJesu waphendula wathi: “Godu kutloliwe kwathiwa, ‘Ungamlingi uSomnini uZimakho.’ ”

⁸ Godu uSathana wathatha uJesu wamusa esiqongolweni sentaba, wamkhombisa yoke imibuso yephasi nobuphaziphazi bayo,

⁹ wathi kuye: “Koke lokhu ngizakunikela khona, nange ungaguqa ungilotjhe.”

¹⁰ Yeke uJesu waphendula wathi: “Suka, Sathana ngombana kutloliwe kwathiwa, “ ‘Lotjha uSomnini uZimakho ukhothamele yena kwaphela.’ ”

¹¹ Nje-ke uSathana wamsukela; iingilozi zeza zamsiza.

UJesu uthoma ukutjhumayela

¹² Kwathi bonyana uJesu ezwe bona uJwanisi ufakwe ngesikhungweni, wabuyela eGalile.

¹³ Wasuka eNazaretha, wayokuhlala eKapernawumi, emzini ohlanu kwelwandle leGalile, enarheni yakwaZabuloni neyakwaNafitali.

¹⁴ Lokhu kwenzeka khona kuzakuzaliseka okwakhulunywa mphorofidi u-Isaya nasithi:

¹⁵ “Narha yakwaZabuloni, nawe narha yakwaNaftali, endleleni eya elwandle, ngaphetjheya kweJordani, Galile labatjhili!

¹⁶ Abantu abahlezi ebumnyameni babone umkhanyo omkhulu, nakilabo abahlezi enarheni yethunzi lokufa ukukhanya kufikile.”

¹⁷ Ukusuka ngesikhatheso, uJesu wathoma ukutjhumayela wathi: “Phendukani ngombana umbuso wezulu ubandamele!”

Ukubizwa kwabafundi bokuthoma

¹⁸ Kwathi uJesu asakhamba eqadi kwelwandle leGalile, wabona izelamani ezimbili, uSimoni ebekuthiwa nguPitrosi nomfowabo u-Andrisi. Begade baphosela inede ngelwandle ngombana gade bababambi beenhlambi.

¹⁹ Yeke uJesu wathi kibo: “Yizani, ngilandelani! Ngizanenza ababambi babantu.”

²⁰ Khonokho basukela amanedabo bamlandela.

²¹ Wakhamba godu wabona izelamani ezinye ezimbili, uJakopo umsa kaZebediya nomfowabo uJwanisi. Bebangemkhunjini noyise uZebediya, balungisa amanedabo. UJesu wababiza,

²² khonokho basukela umkhumbi noyise, bamlandela.

UJesu upholisa abagulako

²³ UJesu wadabula iGalile, afundisa ngemasinagogini, atjhumayela ivangeli lombuso, apholisa ebebaphethwe malwelwe ahlukeneko kanye nezifo.

²⁴ Iindaba ngaye zanda kiyo yoke iSiriya, abantu baletha kuye boke ebebagula; baphethwe malwelwe amanengi ahlukeneko nobuhlungu: abantu abanamadimoni, isithunthwana nabakhubazekileko. Boke uJesu wabapholisa.

²⁵ Iinqubuthu ezikulu zamlandela zisuka eGalile eDekapolisi, eJerusalema, eJudiya nenarheni engaphetjheya kweJordani.