UMATEWU 28 - IsiNdebele 2012 Translation

Ukuvuka kwakaJesu

¹ Ngemva kweSabatha, ngamasa welanga lokuthoma leveke, uMariya Magdalina nomunye uMariya bakhamba bayokuhlola ethuneni.

² Khonokho kwaba khona ukusikinyeka kwephasi okukhulu ngombana kwehla ingilozi kaSomnini ivela ezulwini, yaya ethuneni yafese yageda ilitje yalisusa, yahlala phezu kwalo.

³ Ubujamo bayo bebunjengombani, izambatho zayo zimhlophe njengeliqhwa.

⁴ Abalindi besaba khulu bebaqhaqhazela, baba njengabantu abafileko.

⁵ Ingilozi yakhuluma nabafazi yathi: “Ningesabi ngombana ngiyazi bona nifuna uJesu obekabethelwe esiphambanweni.

⁶ Akakho lapha; uvukile njengombana agade atjhwile. Yizani nganeno nizokubona lapha bekalele khona.

⁷ Nanisuka lapha nirhabe niyokutjela abafundi bakhe, nithi, ‘Uvukile ekufeni, nje-ke usendleleni yokuya eGalile ngaphambi kwenu. Nizakumbona lapho.’ Qalani nginitjelile.”

⁸ Yeke abafazi basuka msinyana ethuneni banokwesaba, kodwana khonapho baphuphuma ithabo, bagijima bayokutjela abafundi bakhe.

⁹ Msinyana uJesu wahlangana nabo wathi: “Lotjhani!” Batjhidela, bambamba eenyaweni, bamkhothamela.

¹⁰ Yeke uJesu wathi kibo: “Ningesabi. Khambani niyokutjela abafowethu bonyana baye eGalile, bazangibona lapho.”

Umbiko wabalindi

¹¹ Kwathi abafazi basesendleleni, abanye babalindi bangena ngedorobheni bayokubikela abaphristi abakhulu ngakho koke okwenzakeleko.

¹² Nasele abaphristi abakhulu bahlangene nabaphathi benza neqhinga, banikela amajoni imali enengi,

¹³ bathi kiwo: “Nifike nithi, ‘Sithe sisabanjwe sithongwana phakathi kobusuku, abafundi bakhe bafika beba isidumbu sakhe.’

¹⁴ Nakube umbiko lo ufika kumbusi, sizamanelisa ukuze nina ningangeni ekingeni.”

¹⁵ Yeke amajoni athatha imali, enza njengombana bekayaliwe. Nje-ke umbiko lo warhatjheka emaJudeni woke ngitjho nanamhlanjesi.

UJesu uzibonakalisa ebafundini bakhe

¹⁶ Abafundi abalitjhumi nanye baya eGalile entabeni lapha uJesu abatjele bona baye khona.

¹⁷ Kwathi nabambonako, bamkhothamela kodwana abanye bazaza.

¹⁸ Yeke uJesu watjhidela kibo wathi: “Nginikelwe woke amandla ezulwini nephasini.

¹⁹ Ngalokho khambani niye ebantwini boke nanyana kukuphi, nibenze abafundi; babhabhadiseni ebizweni lakaBaba neNdodana noMoya oCwengileko,

²⁰ nibafundise ukwenza koke enginiyale ngakho. Ngambala nginani njalo bekube sekupheleni kwesikhathi.”