UMATEWU 27 - IsiNdebele 2012 Translation

UJesu ulethwa phambi koPilatu

¹ Kwathi ekuseni ngamasa boke abaphristi abakhulu nabaphathi babantu bathatha iqunto lokubulala uJesu.

² Bambopha, bamraga bamusa kuPilatu, umbusi.

Ukufa kwakaJudasi

³ Lokha uJudasi omkhapheleko nabona bonyana uJesu ugwetjelwe ukufa, wazisola kabuhlungu, wabuyisela iimpaparwana ezimatjhumi amathathu zesiliva kubaphristi abakhulu kanye nabaphathi.

⁴ Wathi: “Ngonile ngokukhaphela iingazi ezinganamlandu.” Bamphendula bathi: “Kusitjhisa ngani-ke thina lokho? Ziimbonwa nguwe lezo.”

⁵ Yeke uJudasi wafuthela imali leyo ngethempelini, waphuma. Wasuka lapho wayoziphanyeka.

⁶ Abaphristi abakhulu badobha iimpaparwanezo bathi: “Kukuphikisana nomthetho ukufaka imali le emnikelweni wethempeli ngombana kuyimali yeengazi.”

⁷ Yeke baqunta ukusebenzisa imali leyo ukuthenga isimu yombumbi kobana ibe yindawo yokubulungela imiqhamuka.

⁸ Ngikho indawo leyo nanamhlanjesi ibizwa bonyana: “YiNdawo yeeNgazi.”

⁹ Yeke kwazaliseka okwakhulunywa mphorofidi uJoromiya nasithi: “Bathatha iimpaparwana ezimatjhumi amathathu zesiliva, okulinani abantu bakwa-Israyeli abavumelana ukumhlawulela ngalo,

¹⁰ bazisebenzisa ukuthenga isimu yombumbi, njengombana uSomnini bekangiyalile.”

UJesu uphekwa ngemibuzo

¹¹ UJesu wajama phambi kombusi, umbusi loyo wambuza wathi: “Uyikosi yamaJuda na?” UJesu wamphendula wathi: “Iye, kunjengombana usitjho.”

¹² Kodwana lokha nasolwa baphristi abakhulu nabaphathi, azange aphendule.

¹³ Yeke uPilatu wambuza wathi: “Awubuzwa ubufakazi abajamelana nawe ngabo na?”

¹⁴ Kodwana uJesu azange aphendule. Okwarara umbusi kukobana azange aziphendulele ngitjho nakowodwa umlandu athweswa wona.

UJesu ugwetjelwa ukufa

¹⁵ Yeke gade kusiqhelo kobana umbusi athi njalo ngomnyanya athukulule isibotjhwa esikhethwa siqubuthu.

¹⁶ Ngesikhatheso bekunesibotjhwa esidumileko ibizo laso linguBharabhasi.

¹⁷ Kwathi bona isiqubuthu sibuthane, uPilatu wasibuza wathi: “Ngisiphi enifuna bona nginithukululele sona na? UBharabhasi namkha uJesu, okuthiwa nguKrestu na?”

¹⁸ Begade asazi bona kungebanga lomona ukobana banikele uJesu kuye.

¹⁹ Kwathi uPilatu asahlezi esihlalweni sokugweba, umkakhe wamthumela umlayezo othi: “Ungabi nesandla endabeni yomuntu omsulwa loyo ngombana ngihlukumezeke khulu ebhudangweni ngaye.”

²⁰ Abaphristi abakhulu nabaphathi batjitjizela isiqubuthu kobana sikhethe uBharabhasi bese kubulawe uJesu.

²¹ Umbusi wabuza wathi: “Nifuna ngithukulule muphi phakathi kwababilaba na?” Baphendula bathi: “UBharabhasi!”

²² Yeke uPilatu wabuza wathi: “Alo-ke nithi ngenzeni ngoJesu okuthiwa nguKrestu lo na?” Boke baphendula bathi: “Mbethele esiphambanweni!”

²³ UPilatu wabuza wathi: “Kubayini na? Mlandu bani awenzileko na?” Kodwana barhuwelela khulu bathi: “Mbethele esiphambanweni!”

²⁴ Kwathi uPilatu nabona bonyana akayindawo nabo, kodwana esikhundleni salokho bathoma ukuguruzela, wathatha amanzi wahlamba izandla zakhe phambi kwesiqubuthu, wathi: “Ngimsulwa ekuthululweni kweengazi zomuntu lo. Sekuziimbonwa ngini!”

²⁵ Boke abantu baphendula bathi: “Iingazi zakhe azibe phezu kwethu nesizukulwana sethu!”

²⁶ Yeke wabathukululela uBharabhasi. Kodwana wathi uJesu arithwe, bewanikela ngaye bona abethelwe esiphambanweni.

Amabutho abukisa ngoJesu

²⁷ Yeke amajoni wombusi athatha uJesu amusa ngesirhodlweni sombusi; soke isiqhema samajoni sambungelela.

²⁸ Amhlubulisa, amembesa ingubo ebomvu.

²⁹ Eluka isihlohlo sameva amthwesa sona. Amphathisa umgaba ngesandleni sakhe sesidla; aguqa ngaphambi kwakhe abukisa ngaye athi: “Bayede, kosi yamaJuda!”

³⁰ Amkhafulela, athatha umgaba ambetha ngawo kanenginengi ehloko.

³¹ Emva kobana abukise ngaye, amhlubulisa ingubo, amembathisa izambatho zakhe. Asuka lapho amraga ayombethela esiphambanweni.

UJesu ubethelwa esiphambanweni

³² Kwathi nabaphumako, bahlangana nendoda yeSirene ebekuthiwa nguSimoni, amajoni amkatelela bona athwale isiphambano sakaJesu.

³³ Bafika endaweni ekuthiwa yiGolgotha, okutjho iKhakhayi.

³⁴ Lapho amajoni anikela uJesu iwayini ebeyivangwe nenyongo kobana asele; kodwana kuthe bona ayizwe, wala ukuyisela.

³⁵ Kwathi bona ambethele esiphambanweni, ahlukaniselana izambatho zakhe ngefumbe ukuze kuzaliseke ilizwi elakhulunywa baphorofidi nabathi, “Bahlukaniselana izambatho zami bebenza ifumbe ngazo.”

³⁶ Ngemva kwalokho ahlala phasi ambukela.

³⁷ Ngehla kwehlokwakhe abeka umtlolo womlandu abamethwesa wona othi: “Lo nguJesu ikosi yamaJuda.”

³⁸ Wabethelwa kanye namasela amabili, elinye lingesidleni, elinye lingesinceleni.

³⁹ Abantu ebebadlula lapho bebamhlambalaza, bathintithe iinhloko,

⁴⁰ bathi: “Wena ozokugiriza ithempeli bese ulakha ngobutjha ngamalanga amathathu, zisindise-ke! Yehla esiphambanwenapho nakube uyiNdodana kaZimu!”

⁴¹ Ngokunjalo, abaphristi abakhulu, abafundisi bomthetho nabaphathi babukisa ngaye,

⁴² bathi: “Wasindisa abanye, kodwana yena akakwazi ukuzisindisa! Uyikosi yakwa-Israyeli! Akehle khona nje esiphambanweni, yeke sizamkholwa!

⁴³ Angithi wethembe uZimu. UZimu akamsize khona nje nakube uyamfuna ngombana bekaseze asithi, ‘NgiyiNdodana kaZimu!’ ”

⁴⁴ Ngitjho namasela ebekabethelwe nawo adindela iinhlamba phezu kwakhe.

Ukufa kwakaJesu

⁴⁵ Kusukela ngesimbi yetjhumi nambili bekube ngesimbi yesithathu ubumnyama bembatha inarha yoke.

⁴⁶ Kwathi ngesimbi yesithathu uJesu warhuwelela ngelizwi elikhulu wathi: “Eli, Eli, lama sabarhthani?” Okutjho bona: “Zimami, Zimami, ungitjhiyeleni na?”

⁴⁷ Kwathi lokha abanye balabo ebebajame lapho nabezwa lokho bathi: “Ubiza u-Eliya!”

⁴⁸ Khonokho omunye wabo wagijima wathatha umfotjhofotjho, wawenya ngaphakathi kweviniga, wawuhloma emhlangeni, wawuphakamisela kuJesu kobana asele.

⁴⁹ Abanye bathi, “Jama wena! Akhesibone bona u-Eliya wakhe loyo uzakuza azomsindisa na?”

⁵⁰ Godu uJesu warhuwelela ngelizwi elikhulu, wanikela umphefumulwakhe.

⁵¹ Khonokho irharideni lethempeli latlebhuka phakathi, ukuthoma phezulu ukuya phasi. Iphasi lasikinyeka, kwaphadlhuka amadwala.

⁵² Amathuna avuleka, iindumbu zabantu abanengi abacwengileko ebebahlongakele bavuswa baphila godu.

⁵³ Baphuma ngemathuneni, kwathi ngemva kobana uJesu avukile ekufeni, baya ngedorobheni elicwengileko, bazibonakalisa ebantwini abanengi.

⁵⁴ Kwathi lokha umphathimabutho nalabo ebebanaye ebebaqaphe uJesu nababona ukusikinyeka kwephasi nakho koke okwenzakeleko, besaba bebathi: “Kwamambala bekayiNdodana kaZimu!”

⁵⁵ Bekukhona abafazi abanengi lapho, bajame kudanyana baqalile. Bebalokhu balandele uJesu ukusukela eGalile kobana bamsize.

⁵⁶ Hlangana nabo bekukhona uMariya Magdalina, uMariya unina kaJakopo noJosefa kanye nonina lamadodana kaZebediya.

Ukubulungwa kwakaJesu

⁵⁷ Kwathi nakuhlwako, kwafika isigwili somuntu sivela e-Arimathiya, ibizo laso linguJosefa, naye egade amfundi kaJesu.

⁵⁸ Waya kuPilatu wayokubawa isidumbu sakaJesu, nje-ke uPilatu wayala bonyana anikelwe sona.

⁵⁹ UJosefa wasithatha, wasiphuthela ngetjhila elihlanzekileko,

⁶⁰ wasifaka ngethuneni lakhe elitjha aligobhodlha edwaleni. Wageda ilitje elikhulu wavala ngalo umnyango wethuna wakhamba.

⁶¹ UMariya Magdalina nomunye uMariya gade bahlezi lapho malungana nethuna.

Abaqaphi bethuna

⁶² Ngelanga elilandelako, ebekuliSabatha, abaphristi abakhulu nabaFarisi bahlangana kuPilatu,

⁶³ bathi kuye: “Kosi, siyakhumbula bona umkhohlisi loya nasaphilako wathi, ‘Ngemva kwamalanga amathathu ngizakuvuka.’

⁶⁴ Yeke, khupha umyalo bonyana ithuneli liyokulindwa kufikela elangeni lesithathu. Nakungasinjalo, abafundi bakhe bangahle beze bazokweba isidumbu sakhe, bese batjela abantu bona uvukile ekufeni. Amala wokugcina la azakudlula waphambilini.”

⁶⁵ UPilatu wathi kibo: “Thathani umlindi nikhambe niyokuqinisekisa bona ithunelo liyavikeleka ngendlela eningakghona ngayo.”

⁶⁶ Yeke bakhamba bayokuqinisekisa bona ithunelo livikelekile ngokubeka iphawu lokulivala elitjeni, bebatjhiya abalindi lapho.