UMATEWU 26 - IsiNdebele 2012 Translation

Ubukhwebetjhana ngoJesu

¹ Kwathi bona uJesu aqede ukutjho zoke izintwezi, wathi ebafundini bakhe:

² “Niyazi bona sekusele amalanga amabili kwaphela bona kube liPhasika, yeke iNdodana yoMuntu izakukhatjhelwa kobana ibethelwe esiphambanweni.”

³ Khonapho abaphristi abakhulu nabaphathi babantu bahlangana etatawini lomphristi omkhulu ebekuthiwa nguKhayafasi.

⁴ Balumba amano wokugola uJesu ngobuqili bese bayambulala.

⁵ Bathi: “Singakwenzi ngesikhathi somnyanya lokhu, nakungasinjalo kuzakuvuka umguruguru phakathi kwabantu.”

UJesu uzeswa eBhethaniya

⁶ Kwathi uJesu aseseBhethaniya emzini wendoda ebekuthiwa nguSimoni onekhwekhwe,

⁷ kweza umfazi kuye aphethe umjeka uzele amakha wemali enengi, wawathela ehlokwakhe asahlezi etafuleni.

⁸ Lokha abafundi nababona isenzweso basilingeka khulu, bathi: “Kusoziswelani na?

⁹ Amakha la bekangathengiswa ngemali enengi, yabelwe abadududu!”

¹⁰ UJesu wakulemuka lokho ebebakutjho, yeke wathi kibo: “Nimtshwenyelani umfazi lo na? Ungenzele into ehle.

¹¹ Abadududu nizokuhlala ninabo njalo, kodwana mina angekhe nahlala ninami.

¹² Lokha nathela amakha la phezu kwami, ulungiselela umzimbami ukuyokubulungwa.

¹³ “Ngiqinisile ngiyanitjela bona kuphi nakuphi lapha ivangeleli litjhunyayelwa khona ephasini loke, lokho akwenzileko kuzakufakazwa ngakho, kube sikhumbuzo ngaye.”

UJudasi uvuma ukukhaphela uJesu

¹⁴ Yeke omunye wabalitjhumi nambili, ibizo lakhe elinguJudasi Iskariyodi, waya kubaphristi abakhulu,

¹⁵ wababuza wathi: “Nizangipha ini nangimnikela ezandleni zenu na?” Babala amatjhumi amathathu weempaparwana zesiliva bamnikela zona.

¹⁶ Kusukela lokho uJudasi wafuna ithuba elihle lokukhaphela uJesu kibo.

Ukubekwa kwesidlo seKosi

¹⁷ Ngelanga lokuthoma lomnyanya wesiKwa esinganaNgumelo, abafundi beza kuJesu bathi: “Ufuna bona sikulungiselephi isidlo sePhasika na?”

¹⁸ Wathi kibo: “Ngenani ngedorobheni niye emuntwini othileko nimtjele nithi, ‘Umfundisi uthi, isikhathi sakhe sesifikile. Yena nabafundi bakhe bazokugidingela iPhasika lapha kwakho.’ ”

¹⁹ Yeke abafundi benza njengombana uJesu abayalile, balungisa iPhasika.

²⁰ Kwathi nakuhlwako, uJesu wahlala nabalitjhumi nambili etafuleni.

²¹ Kuthe basagoma njalo, uJesu wathi kibo: “Ngiqinisile ngiyanitjela bona omunye wenu uzongikhaphela.”

²² Abafundi badana khulu bathoma ukumbuza ngamunye ngamunye, bathi: “Kghani iKosi itjho mina na?”

²³ UJesu waphendula wathi: “Loyo ofake isandla sakhe ngesitjeni kanye nami, nguye ozongikhaphela.

²⁴ INdodana yoMuntu izokukhamba njengombana kutloliwe ngayo. Kodwana maye kiloyo okhaphela iNdodana yoMuntu! Bekuzokuba ngcono emuntwini loyo ngathana azange abelethwe!”

²⁵ Yeke uJudasi, ekunguye obekazomkhaphela wathi: “Kghani kungaba ngimi Rabi, na?” UJesu wamphendula wathi: “Iye, nguwe.”

²⁶ Kwathi basagoma njalo, uJesu wathatha isikwa, wathokoza, wasihlephula, wanikela abafundi bakhe, wathi: “Thathani nigome; lokhu mzimbami.”

²⁷ Wathatha ikapho, wathokoza kuZimu, wabanikela wathi: “Selani noke nje

²⁸ ngombana lokhu kuziingazi zami zesivumelwano ezaphalakela abanengi, malungana nokulitjalelwa kwezono.

²⁹ Ngiyanitjela bona angekhe bengisasela isithelo sesidiribesi ukusuka gadesi bekube mhlana ngisisela ngobutjha nginani embusweni kaBaba.”

³⁰ Kwathi sele bavume ingoma yokudumisa, baphuma baya entabeni ye-Oliva.

UJesu ubona ngaphambili ukuphikwa nguPitrosi

³¹ Yeke uJesu wathi kibo: “Khona namhlanjesi ebusuku noke nizokukhubeka ngami ngombana imitlolo ithi, “ ‘Ngizakumadlha umelusi, umhlambi wezimvu urhatjheke.’

³² “Kodwana ngemva kokuvuka kwami ekufeni, ngizanandulela ngiye eGalile.”

³³ UPitrosi wathi: “Ngitjho nanyana bangakhubeka boke laba ngebanga lakho, mina angisoze!”

³⁴ UJesu wathi kuPitrosi: “Ngiqinisile ngithi kuwe khona ebusuku banamhlanjesobu ngaphambi kobanyana umkukurumbu ulile, uzabe sele ungilandule kathathu.”

³⁵ Kodwana uPitrosi waqinisa wathi: “Ngitjho nanyana ngingafa kanye nawe, angeze bengithome ngikulandule.” Boke abafundi batjho okufanako.

UJesu uthandaza eGetsemani

³⁶ Yeke uJesu wakhamba nabafundi bakhe baya endaweni ebizwa bona yiGetsemani, wathi kibo: “Yijani nihlezi lapha, ngisaya laphaya ngiyokuthandaza.”

³⁷ Wakhamba noPitrosi namadodana amabili kaZebediya. Wathoma ukutlhuwa nokukhathazeka,

³⁸ wathi kibo: “Umphefumulwami ubhodwe lisizi bekube sekufeni. Hlalani lapha nilinde kanye nami.”

³⁹ Waya phambidlana, waguqa, wahloma ihloko phasi wathandaza wathi: “Baba, nakube kuyakghoneka, bengithi ikapho le ayisuswe kimapha! Nokho kungabi ngokuthanda kwami, kodwana kube yintando yakho.”

⁴⁰ Yeke wabuyela ebafundini bakhe, wabafumana balele; wathi kuPitrosi: “Hawu madoda, nibhalelwe kulinda nami i-awara elilodwa na?

⁴¹ Yelelani nithandaze ukuze ningaweli ekulingweni. Ummoya uyavuma, kodwana inyama ibuthakathaka.”

⁴² UJesu wakhamba kwesibili wayokuthandaza, wathi: “Baba, nangabe ikapho le angekhe yasuswa kimi ngaphandle kobana ngiyisele, akwenzeke intando yakho.”

⁴³ Kwathi nabuyako, godu wafumana abafundi balele ngombana amehlwabo gade azele ubuthongo.

⁴⁴ Yeke wabatjhiya wakhamba, wathandaza ihlandla lesithathu, atjho wona amezwi lawo.

⁴⁵ Wabuyela ebafundini wathi: “Nisalele, nisaphumulile na? Qalani, isikhathi sesifikile bona iNdodana yoMuntu ikhatjhelwe ezandleni zezoni.

⁴⁶ Sikimani sikhambeni. Nango umkhaphelami asiza!”

Ukubanjwa kwakaJesu

⁴⁷ Kwathi asakhuluma, uJudasi ongomunye wabalitjhumi nambili, wafika akhamba nesiqubuthu esikhulu sihlome ngeensabula nangeembhuku, sithunywe baphristi abakhulu nabaphathi babantu.

⁴⁸ Nje-ke umkhapheli bekenze nabo isiga wathi: “Loyo engizamncwanga, nguye enimfunako. Mbambeni!”

⁴⁹ UJudasi walunga thwi kuJesu, wathi: “Lotjha Rabi!” Wamncwanga.

⁵⁰ UJesu waphendula wathi: “Mngani, uzokwenzani lapha na?” Yeke amadoda atjhidela, abamba uJesu ambopha.

⁵¹ Khonokho omunye wabagade banoJesu warhwatjha isabulakhe, warharhabula isisebenzi somphristi omkhulu, wasisusa indlebe.

⁵² Kodwana uJesu wathi kuye: “Buyisela isabulakho endawenayo ngombana boke abarhwatjha isabula bazakufa ngesabula.

⁵³ Udlumbana bona angeze ngakghona ukubiza uBaba, khonokho athumele ibutho leengilozi elingaphezu kweenkulungwana ezimatjhumi alikhomba nambili na?

⁵⁴ Kodwana ngalokho, imitlolo ingazaliseka njani ethi kumele kwenzeke ngayo yona indlela le na?”

⁵⁵ Khonokho uJesu wakhuluma nesiqubuthu wathi: “Ngirhola izilwi bona ningabeze nize ngeensabula nangeembhuku ukuzongibamba na? Bengihlala ethempelini nematatawini imihla yoke, ngifundisa, azange kheningibambe.

⁵⁶ Kodwana koke lokhu kwenzekile ukuze kuzaliseke imitlolo yabaphorofidi.” Yeke boke abafundi bamsukela babaleka.

UJesu phambi kwebandla

⁵⁷ Labo ababamba uJesu, bamusa kuKhayafasi, umphristi omkhulu, lapha bekuhlangene khona abafundisi bomthetho nabaphathi.

⁵⁸ Kodwana uPitrosi wamlandela akudanyana, bewangena ngesirhodlweni somphristi omkhulu. Wangena wahlala phasi nabaqaphi afuna ukubona bonyana kuzokwenzekani.

⁵⁹ Abaphristi abakhulu nebandla loke lafuna ubufakazi bamala ukujamelana noJesu ukuze bakwazi ukumbulala.

⁶⁰ Kodwana abazange bafumane litho, ngitjho nanyana kweza abofakazi abanengi bamala nje. Ekugcineni kwasikima abantu ababili

⁶¹ bathi: “Umrhali lo uthe, ‘Ngingabhuruza ithempeli lakaZimu ngilakhe ngobutjha ngamalanga amathathu.’ ”

⁶² Khona umphristi omkhulu wasikima wathi kuJesu: “Uzose uthule nje ungaphenduli na? Uthini ngobufakazi obujamelene nawe obulethwa madoda la, na?”

⁶³ Kodwana uJesu wazithulela. Umphristi omkhulu wakhuluma naye godu, wathi: “Ngikufungisa isifungo ngoZimu ophilako ngithi: Sitjela bona unguMesiya, iNdodana kaZimu na?”

⁶⁴ UJesu waphendula wathi: “Iye, kunjengombana utjhwile. Kodwana ngiyanitjela noke nje bona ngokuzako nizokubona iNdodana yoMuntu ihlezi ngesigomeni sakaSomandla begodu isiza ngamafu ivela ezulwini!”

⁶⁵ Khonapho umphristi omkhulu watlebhula izambatho zakhe wathi: “Selebe ahlambalazile! Sisafunelani abanye abofakazi na? Nani nizizwele ukuhlambalaza okungakaya!

⁶⁶ Nicabangani na?” Baphendula bathi: “Ufanelwe kubulawa.”

⁶⁷ Yeke bamkhafulela ngamathe ebusweni, bambetha ngamaguduva. Abanye bamwakala

⁶⁸ bathi kuye: “Siphorofidela wena Krestu! Ngubani okubethileko na?”

UPitrosi uphika uJesu

⁶⁹ Yeke uPitrosi bekahlezi ngaphandle ngesirhodlweni, kweza isisebenzi somntazana sathi: “Nawe gade unoJesu weGalile.”

⁷⁰ Kodwana wakulandula lokho phambi kwabo boke, wathi: “Angazi bona ukhuluma ngani.”

⁷¹ Khonapho waphuma waya esangweni, lapha abonwa khona ngomunye godu umntazana owathi ebantwini ebebalapho: “Umrhali lo gade anoJesu weNazaretha.”

⁷² Godu uPitrosi wakulandula lokho wathi: “Angimazi umuntu loyo mina!”

⁷³ Ngemva kwesikhatjhana abantu ebebajame lapho beza kuPitrosi, bathi kuye: “Ngambala ungomunye wabo ngombana ukukhuluma kwakho kuyakulahla.”

⁷⁴ Yeke uPitrosi wathoma ukuthukana, afunga asithi: “Yeningisusele mina, angimazi umuntu lo!” Khonokho umkukurumbu walila.

⁷⁵ Yeke uPitrosi wakhumbula igama uJesu alikhulumileko lokuthi: “Ngaphambi kobana umkukurumbu ulile, uzabe sele ungilandule kathathu bona awungazi!” Nje-ke waphumela ngaphandle wakhihla isililo esibuhlungu.