UMATEWU 25 - IsiNdebele 2012 Translation

Umfanekiso ngamatlawu alitjhumi

¹ “Ngesikhatheso umbuso wezulu uzakufana namatlawu alitjhumi athatha iimbani zawo ayokuhlangabeza umyeni.

² Amahlanu wawo gade aziindlhayela, amahlanu ahlakaniphile.

³ Aziindlhayela athatha iimbani zawo, kodwana azange athathe amafutha.

⁴ Kwathi amahlanu ahlakaniphileko akhamba aphethe amafutha ngemijekana.

⁵ Umyeni wariyada ukufika, yeke woke ayenda, agcina alele.

⁶ “Phakathi kobusuku kwamenyezwa kwathiwa, ‘Nangu umyeni! Phumani nimhlangabeze!’

⁷ Yeke woke amatlawu alitjhumi avuka, akhanyisa iimbani zawo.

⁸ Aziindlhayela athi kahlakaniphileko, ‘Akhe nisitopizele amafutha, iimbani zethu ziyacima.’

⁹ Ahlakaniphileko aphendula athi, ‘Nilale nilahlile, nathi angahle asitlhayelele nasizawabelana nani. Khambani niye kabathengisako niyozithengela khona.’

¹⁰ Kwathi nasesendleleni yokuyokuthenga amafutha lawo, umyeni wafika. Amatlawu ebegade azilungiselele angena naye ngemnyanyeni womtjhado. Umnyango wavalwa.

¹¹ “Ngemva kwesikhathi amatlawu laya afika athi, ‘Kosi! Kosi! Sivulela singene!’

¹² Kodwana umyeni wawaphendula wathi, ‘Ngiqinisile ngiyanitjela ngithi anginazi.’

¹³ “Ngalokho hlalani nilindile ngombana ilanga nesikhathi anisazi.”

Umfanekiso ngamatalende

¹⁴ “Godu umbuso wezulu uzakufana nomuntu owathi nazokuthatha ikhambo, wabiza iinsebenzi zakhe wazitjhiya nepahlakhe kobana ziyeluse.

¹⁵ Esinye wasinikela amatalende amahlanu wemali, esinye amatalende amabili kwathi esinye wasinikela italende elilodwa. Esinye nesinye kwaba ngokwekghono laso. Yeke wakhamba.

¹⁶ Isisebenzi esifumene amatalende amahlanu sakhamba khonokho sayokusisa imalaso, sazuza amanye amatalende amahlanu.

¹⁷ Nesifumene amatalende amabili naso sazuza amanye amabili.

¹⁸ Kodwana esafumana italende elilodwa sakhamba sayolembela, salifihla lapho.

¹⁹ “Ngemva kwesikhathi eside ikosi yeensebenzi leyo yabuya, yalungisa iindaba nazo.

²⁰ Isisebenzi ebesifumene amatalende amahlanu saletha amanye amahlanu sathi, ‘Kosami, unginikele amatalende amahlanu, qala ngizuze amanye amahlanu.’

²¹ Ikosi leyo yaphendula yathi, ‘Wenze kuhle, sisebenzi sami esilungileko nesithembekileko! Wathembeka ezintweni ezincani, yeke ngizakubeka bona uphathe izinto ezinengi. Yewuze uzokuhlanganyela ithabo lekosakho!’

²² “Nesisebenzi esanikelwa amatalende amabili naso seza sathi, ‘Kosami, wanginikela amatalende amabili, qala ngizuze amanye amabili.’

²³ Ikosaso yathi, ‘Wenze kuhle, sisebenzi sami esilungileko nesithembekileko! Wathembeka ezintweni ezincani, yeke ngizakubeka bona uphathe izinto ezinengi. Yewuze uzokuhlanganyela ithabo lekosakho!’

²⁴ “Yeke kweza isisebenzi esanikelwa italende elilodwa sathi ekosinaso, ‘Kosami, bengazi bonyana uyindoda elikhuni. Uvuna lapha ungakalimi khona, ubuthe lapha ungakarhatjhi khona.

²⁵ Nje-ke fese ngesaba, ngakhamba ngayokufihla italende lakhweli equlwanini. Qala, nakhu okungokwakho.’

²⁶ “Ikosaso yaphendula yathi, ‘Wena sisebenzi esikhohlakeleko nesivilaphako! Bewazi bonyana ngivuna lapha ngingakalimi khona, ngibuthe lapha ngingakarhatjhi khona?

²⁷ Bewufanele ubulunge imali leyo ebulungelwenimali. Nje-ke bekuzakuthi nangibuyako ngiyifumane inamakonyana.

²⁸ Memukeni italende lelo nilinikele onamatalende alitjhumi.

²⁹ Ngambala loyo onelitho, uzakungezelelelwa ukuze abe nokunengi ngokweqileko. Kodwana loyo onganalitho, uzakwemukwa ngitjho nokuncancani anakho.

³⁰ Phoselani isisebenzi esingatjho lithweso ngaphandle ebumnyameni lapha kuzokuba khona ukurhahlawula nokugedla kwamazinyo.’

Ukugwetjwa kwezizwe

³¹ “Mhlana iNdodana yoMuntu iza ngephazimulwayo iphekelelwa ziingilozi zayo zoke, izakuhlala esihlalweni sayo sobukhosi ephazimulweni yezulwini.

³² Zoke izizwe zizakubuthanela phambi kwayo. Izakuhlukanisa boke abantu ngeenqhema njengomelusi nahlukanisa izimvu neembuzi.

³³ Izakubeka izimvu ngesidleni sayo neembuzi ngesinceleni sayo.

³⁴ Yeke iKosi izakuthi kilabo abangesidleni sayo, ‘Yizani nina enibusiswe nguBaba! Thathani ilifa lenu okumbuso olungiselelwe nina kusukela ekudalweni kwephasi.

³⁵ Ngambala bengilambile nangondla, ngomile nangiseza, bengimqhamuka nangamukela ngeenkumbeni zenu,

³⁶ ngihlubule nangembesa. Bengigula nangitjheja, bengingesikhungweni neza nazongibona.’

³⁷ “Yeke abalungileko bazayiphendula bathi, ‘Agu Kosi! Sakhe sakubona nini ulambile sakondla, namkha womile sakuseza na?

³⁸ Sakhe sakubona nini umqhamuka, sakwamukela emizinethu namkha uhlubule sakwembesa na?

³⁹ Sakhe sakubona nini ugula nanyana ungesikhungweni, sazokubona na?’

⁴⁰ IKosi izakuphendula ithi, ‘Ngiqinisile ngiyanitjela bona lokha nanenzela oyedwa wabafowethu abancancanaba, nenzele mina.’

⁴¹ “Yeke izakuthi kilabo abangesinceleni, ‘Sukani kimapha nina enithuwelelisiweko, niye ngemlilweni wesiphelani olungiselwe uSathana neengilozi zakhe.

⁴² Bengilambile, azange ningiphe ilitho eligonywako; bengomile, azange beningiseze ilitho.

⁴³ Bengimqhamuka, azange ningamukele emizinenu, bengidinga izambatho, azange beningembese. Bengigula, ngingesikhungweni azange beningitjheje.’

⁴⁴ “Yeke nabo bazakuphendula bathi, ‘Agu Kosi! Sakhe sakubona nini ulambile namkha womile, umqhamuka namkha uhlubule, ugula namkha ungesikhungweni, sangakutjheja na?’

⁴⁵ IKosi izakuphendula ithi, ‘Ngiqinisile ngiyanitjela bona nanyana yini eningazange niyenzele ngitjho noyedwa walaba, nami semlunga ningakangenzeli ilitho.’

⁴⁶ Yeke bazakukhamba baye ekuhlunguphazweni okungapheliko, kodwana abalungileko bazakuya ekuphileni okungapheliko.”