UMATEWU 24 - IsiNdebele 2012 Translation

UJesu ukhuluma ngokugirizwa kwethempeli

¹ UJesu besele aphumile ngethempelini, akhamba lokha abafundi bakhe nabazakuza kuye bamkhombisa umakhiwo wethempeli.

² Wathi kibo: “Niyazibona zoke izintwezi na? Ngiqinisile ngiyanitjela bona akunalitje nalinye lapha elizakusala liphezu kwelinye, elinye nelinye lawo lizokugirika.”

³ Kwathi uJesu asahlezi entabeni ye-Oliva, abafundi beza kuye ngasese, bafese bathi: “Akhe usitjele bona izintwezi zizokwenzeka nini? Sizakuba yini isibonakaliso sokuza kwakho nesokuphela kwesikhathi na?”

⁴ UJesu waphendula wathi: “Yelelani bona kungabi nomuntu onikhohlisako

⁵ ngombana banengi abazakuza ebizweni lami bathi, ‘NginguMesiya!’ Nje-ke bazakukhohlisa abanengi.

⁶ Nizakuzwa ngezipi nangamahlebezi wezipi; kodwana qinisekani bonyana anethuki. Izinto ezinjalo kumele zenzeke, kodwana azitjho bona isiphetho sesifikile.

⁷ Isizwe sizakuvukela isizwe nombuso uvukele umbuso. Kuzakuba khona indlala nokusikinyeka kwephasi eendaweni ezahlukahlukeneko.

⁸ Koke lokhu kukuthoma kwemirhelo.

⁹ “Ngemva kwalapho nizakukhaphelwa ekuhlungaphazweni nekubulaweni. Begodu nizokuzondwa ngizo zoke izizwe ngebanga lami.

¹⁰ Ngesikhatheso abanengi bazakuhlubuka ekukholweni bese bayakhaphelana bebazondane.

¹¹ Kuzakuba khona abaphorofidi abanengi bamanga bakhohlise abantu abanengi.

¹² Ngenca yokwanda kobukhohlakali, ithando labanengi lizokuya liphola.

¹³ Kodwana loyo ozokubambelela bekube sekupheleni uzokusindiswa.

¹⁴ Nje-ke ivangeli lombusweli lizakutjhunyayelwa ephasini loke, kube bufakazi kizo zoke izizwe ngaphambi kobana kufike isiphetho.”

Isinyenyiso esibhubhisako

¹⁵ “Lokha nanibona endaweni ecwengileko kujame isinyenyiso esibhubhisako, okuyinto eyakhulunywa mphorofidi uDanyela, ofundako azwisise.

¹⁶ AbaseJudiya ababalekele eentabeni.

¹⁷ Ophezu kwekumbakhe angahliki athi uyokuthatha okuthileko ngekhaya.

¹⁸ Osesimini angabuyeli ekhaya ayokuthatha isambatho sakhe.

¹⁹ Maye kuzokuthusa kangangani emihleni leyo ebafazini abasemzimbeni nakibomma abamunyisako!

²⁰ Thandazani bona ukubaleka kwenu kungabi sebusika namkha ngeSabatha

²¹ ngombana iinhlupheko ngesikhatheso zizabe zizimbi khulu, zingalingani nalezo ezakhe zaba khona kusukela ekuthomeni kwephasi bekwaba kunjesi nezingasoze zaba khona godu.

²² Nakube amalanga lawo bekangakancitjhiswa, akakho obezakusinda, kodwana ngenca yalabo abakhethiweko, amalanga lawo azokuncitjhiswa.

²³ “Ngesikhatheso nanyana ngubani othi kini, ‘Qalani nangu uMesiya!’ namkha, ‘Nanguya!’ ningamkholwa umuntu loyo.

²⁴ Ngambala abosingamesiya nabaphorofidi bamanga bazakuvela, benze iimbonakaliso nemikarisomraro emikhulu ukuze nakwenzekileko bakhohlise ngitjho nabakhethiweko.

²⁵ Qalani, nginitjele lokhu ngaphambi kobana kufike isikhathi.

²⁶ “Yeke nakube nanyana ngubani uthi kini, ‘Qalani nanguya erhalawumbeni,’ ningayi lapho; nanyana asithi, ‘Nanguya ngemalawini angaphakathi,’ ningakukholwa lokho.

²⁷ Yeke njengombana umbani ovela ngepumalanga ubonakala ngitjho netjingalanga, kuzokuba njalo ukuza kweNdodana yoMuntu.

²⁸ “Nanyana kukuphi lapha kunesidumbu khona, amadlanga ahlangana lapho.”

Ukuza kweNdodana yoMuntu

²⁹ “Khonokho ngemva kweenhlupheko zemihleni leyo, “ilanga lizakufiphala, inyezi ingakhanyisi, iinkwekwezi zizakuwa emkayini, amandla wezulwini asikinywe.

³⁰ “Ngesikhatheso isibonakaliso seNdodana yoMuntu sizakuvela emkayini, kuthi zoke izizwe zephasi zilile. Zizakubona iNdodana yoMuntu isiza ngamafu womkayi, ngamandla nangephazimulo ekulu.

³¹ Yeke izakuthuma iingilozi zayo ngokulila okukhulu kwepalapala. Zona zizakubuthelela abakhethekileko bayo emagumbini womane wephasi, ukusuka ehlangothini elinye lomkayi bekube kukelinye.

Ifundiso ngomuthi wamakhiwani

³² “Nje-ke fundani isifundo nasi ngomuthi wamakhiwani: Msinyana ngemva kobana iimpanjana zawo zihlangene, kumila amakari, seniyazi-ke bonyana ihlobo seliseduze.

³³ Ngokunjalo-ke nanibona zoke izintwezi, nizakwazi bonyana sekuseduze, iye sekusemnyango.

³⁴ Ngiqinisile ngiyanitjela bona isizukulwanesi ngambala asisoze sadlula zingakenzeki zoke izintwezi.

³⁵ Izulu nephasi kuzakudlula, kodwana amezwami angekhe adlula.”

Isikhathi sokubuya kwakaJesu asaziwa

³⁶ “Akakho noyedwa owaziko ngelangelo nangesikhatheso, neengilozi ezisezulwini azazi ilitho, ngitjho neNdodana ngokwayo ayazi; kodwana nguBaba kwaphela owaziko.

³⁷ Njengombana kwakunjalo emihleni kaNowa, kuzakuba njalo-ke ukuza kweNdodana yoMuntu.

³⁸ Emihleni leyo ngaphambi komthwalela, abantu bebagoma, basela, batjhada bebatjhadise, kufikela elangeni uNowa angena ngalo ngemkhunjini.

³⁹ Bebangakhathali ngalokho okuzokwenzeka bekwaba kumhlana kufika umthwalela warhurhula boke. Kuzokuba njalo-ke ukuza kweNdodana yoMuntu.

⁴⁰ Ngesikhatheso amadoda amabili azabe asebenza esimini; kuzakuthathwa eyodwa kutjhiywe eyodwa.

⁴¹ Abafazi ababili bazabe basila elitjeni, kuthathwe oyedwa kutjhiywe oyedwa.

⁴² “Yeke, hlalani nilindile ngombana anazi bona iKosenu izakuza nini.

⁴³ Kodwana yazini lokhu: Nakube umninikhaya bekasazi bona isela lizakufika ngasiphi isikhathi sobusuku, ubazakuhlala alindile, ubangekhe avumela bonyana indlwakhe ifahlwe.

⁴⁴ Nani-ke kumele nihlale nilindile ngombana iNdodana yoMuntu izakufika ngesikhathi eningakayilindeli ngaso.

⁴⁵ “Ngiyiphi-ke inceku ethembekileko nehlakaniphileko umniniyo ayibeke bona yeluse iinsebenzi ekhaya, iziphe ukugoma kwazo ngesikhathi esifaneleko na?

⁴⁶ Kuzakuba kuhle encekwini leyo lokha umniniyo nafikako ayifumana isenza lokho.

⁴⁷ Ngiqinisile ngiyanitjela bona uzayibeka bona yeluse yoke ipahlakhe.

⁴⁸ Kodwana akhesithi inceku leyo ikhohlakele bese izitjela ithi, ‘Ikosami isekukhambeni, kuzayithatha isikhathi ukubuya’,

⁴⁹ bese idula ezinye iinceku esebenza nazo, irhiribidele beyidakwe neendakwa.

⁵⁰ Umnininceku leyo uzakufika ngelinye ilanga ingakamlindeli ngesikhathi engasaziko.

⁵¹ Uzayidabula iinquqwana ayilahlele endaweni yabazenzisi lapha kuzakuba khona ukurhahlawula nokugedla kwamaziyo.”