UMATEWU 23 - IsiNdebele 2012 Translation

UJesu unyefula ukuzenzisa kwabaFarisi nabafundisi bomthetho

¹ Yeke, uJesu wakhuluma eenqubuthwini nebafundini bakhe, wathi:

² “Abafundisi bomthetho nabaFarisi bahlala esihlalweni sakaMosi.

³ Yeke kufanele nibahloniphe benenze koke abanitjela khona. Kodwana ningalingisi izenzo zabo ngombana abenzi lokho abakutjhumayelako.

⁴ Bathwesa abantu imithwalo ebudisi emahlombe, ibe bona abakazimiseli ukuyifukula ngitjho nangomunwabo.

⁵ Koke abakwenzako bakwenzela ukubonwa babantu: Benza amafilakteriya wabo abe makhulu namatjharha weemphuraphura zabo made.

⁶ Bathanda indawo ephezulu eminyanyeni neenhlalo eziphambili ngemasinagogini.

⁷ Bathanda ukulotjhiswa eendaweni okuthengiselwa kizo nokubizwa ngokuthi, ‘Rabi’.

⁸ Nina anizukubizwa ngokuthi ‘Rabi’ ngombana ninomfundisi oyedwa, nina noke nje nibabafo.

⁹ Godu ningabizi noyedwa ephasinapha ngokuthi ‘Baba’ ngombana ninoBaba oyedwa osezulwini.

¹⁰ Begodu ningabizwa ngokuthi ‘Mfundisi’ ngombana ninomfundisi oyedwa onguKrestu.

¹¹ Ongomkhulu hlangana nani uzakuba yincekwenu

¹² ngombana loyo oziphakamisako uzakuthotjiswa, naloyo ozithobako uzakuphakanyiswa.”

¹³ “Maye, kini bafundisi bomthetho nani baFarisi, nina bazenzisi ndina! Nivalele abantu kobana bangangeni embusweni wezulu. Nina ngokwenu aningeni, begodu anivumeli labo abalinga ukungena!

¹⁴ Maye, kini bafundisi bomthetho nani baFarisi, bazenzisi ndina! Nirhiribidela iinkumba zabahlolokazi, bese nibukisa ngokwenza imithandazokazi emide! Ngalokho nizakuhlunguphazwa khulu.

¹⁵ “Maye, kini bafundisi bomthetho nani baFarisi, bazenzisi ndina! Nidabula amazwe namalwandle kobana nizuze oyedwa otjhugulukela ebuJudeni, kuthi naphendukileko nimenze abe yindodana yesirhogo ngokubuyelelweko njengani.

¹⁶ “Maye, kini bahlahli abaziimphofu! Nithi, ‘Nanyana ngubani ofunga ngethempeli, akutjho ilitho lokho, kodwana nakube ufunga ngegolide lethempeli ubotjhelelwe esifungweni sakhe.’

¹⁷ Nina ndlhadlha eziphopheleko! Ngikuphi okukhulu, ligolide namkha lithempeli elenza bona igolide libe ngelikhethekileko na?

¹⁸ Godu nithi, ‘Nanyana ngubani ofunga nge-aldari, akutjho ilitho lokho; kodwana nanyana ngubani ofunga ngesipho esiphezu kwalo ubotjhelelwe esifungweni sakhe.’

¹⁹ Nina bantu abaphopheleko! Ngikuphi okukhulu: sisipho namkha li-aldari elenza bona isipho sibe ngesikhethekileko na?

²⁰ Ngalokho-ke ofunga nge-aldari ufunga ngalo nakho koke okukilo.

²¹ Nofunga ngethempeli, ufunga ngalo nangaloyo ohlala kilo.

²² Naloyo ofunga ngezulu, ufunga ngesihlalo sobukhosi sakaZimu naloyo ohlala kiso.

²³ “Maye, kini bafundisi bomthetho nani baFarisi, nina bazenzisi ndina! Ninikela kwetjhumi kweenungo zenu okuyiminti, idili nekumini, kodwana nilahle okuqakatheke khulu komthetho, ubulungiswa, isirhawu nokwethembeka. Benimele ngabe nenze lokhu ngaphandle kokuqalela phasi okhunye.

²⁴ Bahlahli abaziimphofu! Nikhupha ipukani kwenikuselako, kodwana niginya ikamela!

²⁵ “Maye, kini bafundisi bomthetho nani baFarisi, bazenzisi ndina! Nihlanza ubungaphandle bekapho nesitja kodwana khibe ngaphakathi zizele ubumarhamaru nokuzazi.

²⁶ BaFarisi abaziimphofu! Thomani ngokuhlanza ubungaphakathi bekapho nesitja ntange ngaleyondlela nobungaphandle buzakuhlanzeka.

²⁷ “Maye, kini bafundisi bomthetho nani baFarisi, nina bazenzisi ndina! Ninjengamathuna apendwe aba mhlophe, aqaleka amahle ngaphandle khibe ngaphakathi azele amathambo wabafileko nakho koke okusilapheleko.

²⁸ Ngokunjalo nani ngaphandle niqaleka nilungile ebantwini, kodwana ngaphakathi nizele ukuzenzisa nokukhohlakala.

UJesu ukhuluma ngokuhlunguphazwa kwabo

²⁹ “Maye, kini bafundisi bomthetho nabaFarisi, nina bazenzisi ndina! Nakhela abaphorofidi amathuna amahle, nikghabise namaliba wabalungileko.

³⁰ Begodu nithi, ‘Nabegade siphile emihleni yabokhokho, besingekhe sazibandakanya nabo ekuthululeni iingazi zabaphorofidi.’

³¹ Ngalokho niyafakaza ngokujamelana nani bonyana niziinzukulwana zalabo ababulala abaphorofidi.

³² Yeke ragelani phambili, niqedelele isilinganiso sezono zabokhokho benu!

³³ Nina nyoka ndina! Sizukulwana seenyoka! Nizakubalekela njani ukulahlelwa ngesirhogweni na?

³⁴ Ngalokho nginithumela abaphorofidi, izazi nabafundisi. Abanye babo nizobabulala benibabethele esiphambanweni, abanye nizobaritha ngemasinagogini wenu nibagijimise ukusuka edorobheni ukuya edorobheni.

³⁵ Yeke phezu kwenu kuzakwehlela zoke iingazi ezilungileko ezathululwako ephasinapha, ukuthoma ngeengazi zolungileko u-Abela ukuya kezakaZakariya umsa kaBherekiya enambulalela hlangana nethempeli ne-aldari.

³⁶ Ngiqinisile ngiyanitjela bona koke lokhu kuzakwehlela phezu kwesizukulwanesi.

Isililo sakaJesu ngeJerusalema

³⁷ “Jerusalema, Jerusalema, wena obulele abaphorofidi, godu wakhanda ngamatje labo abathunywe kuwe, kukangaki ngifuna ukubuthelela abantwabakho njengesikhukhukazi sibuthelela amadzinyanaso ngaphasi kweempiko zaso, kodwana azange ungivumele.

³⁸ Qala, ikumbakho itjhiywe ingasenamuntu.

³⁹ Ngambala ngiyanitjela bona angekhe benisangibona godu kufikela mhlana nithi, ‘Ubusisiwe loyo oza ebizweni lakaSomnini!’ ”