UMATEWU 22 - IsiNdebele 2012 Translation

Umfanekiso ngomnyanya womtjhado

¹ UJesu wakhuluma godu ebantwini ngemifanekiso, wathi:

² “Umbuso wezulu ufana nekosi eyalungiselela indodanayo umnyanya womtjhado.

³ Yathumela iinceku zayo kilabo ebebamenyelwe emnyanyeni bona ziyobatjela beze, kodwana abantwabo babhala ukuza.

⁴ Yeke yathuma ezinye iinceku yathi, ‘Tjelani abamenyiwekwabo bonyana sele ngilungise isidlo. Iinkabi zami kanye namathole anonisiweko sele ahlatjiwe nje-ke yoke into sele ilungile. Yenize emnyanyeni womtjhado.’

⁵ Kodwana azange bayelele, yeke omunye waziyela esiminakhe, omunye waziyela ezintweni zakhe.

⁶ Abanye babamba iinceku baziphatha kumbi bebazibulala.

⁷ Ikosi yathukuthela. Yathumela ibutho layo, lafese larhayila ababulalabo belatjhisa nedorobho labo.

⁸ Yathi eencekwini zayo, ‘Umnyanya womtjhado sewulungile, kodwana abamenyiweko azange bafaneleke ukuza.

⁹ Nje-ke khambani niye emajikeni weendledlana nimemele emnyanyeni nanyana ngubani enimfunyanako.’

¹⁰ Yeke iinceku zaphuma zaya eendledlaneni zabutha boke abantu ezibafumanako, abalungileko nabakhohlakeleko; irhubhe lomtjhado lazala iinthekeli.

¹¹ “Kwathi ikosi nayingenako bona izokubona iinthekeli, yayelela bonyana bekunomuntu ngapho obegade angakembathi izambatho zomtjhado.

¹² Yabuza yathi, ‘Mngani, ungene njani ngapha ungakembathi izambatho zomtjhado na?’ Kodwana umuntu loyo watlhoga ipendulo.

¹³ Ikosi leyo yathi eencekwini zayo, ‘Mbopheni izandla neenyawo nimphosele ngaphandle ebumnyameni lapha kuzakuba khona ukurhahlawula nokugedla kwamazinyo!’ ”

¹⁴ UJesu waphetha ngokuthi: “Banengi abamenyiweko, kodwana balibinzana abakhethiweko.”

Umbuzo ngomthelo wombusi

¹⁵ AbaFarisi bakhamba bayokulumba amano wokubamba uJesu ngamezwakhe.

¹⁶ Bathumela abafundi babo kuye bakhambisana nebakaHerode bathi: “Mfundisi, siyazi bona umumuntu oqotho nokobana ufundisa indlela kaZimu ngokuya ngeqiniso. Awuyi ngabantu ngombana awukhethi ubuso.

¹⁷ Akhe utjho-ke bona umbonwakho uthini na? Kghani kulungile ukukhokha umthelo wombusi omkhulu na?”

¹⁸ Kodwana uJesu ngokwazi kwakhe iqhinga labo elimbi wathi: “Nina bazenzisi ndina! Nilingelani ukungithiya na?

¹⁹ Ngitjengisani imali enithela ngayo!” Bamlethela udenariyu,

²⁰ wababuza wathi: “Mfanekiso kabani lo na? Mtlolo kabani lo na?”

²¹ Bamphendula bathi: “Mfanekiso wombusi omkhulu.” Yeke uJesu wathi kibo: “Nikelani umbusi omkhulu okungekwakhe, ninikele uZimu okungekwakaZimu.”

²² Kuthe bona bezwe lokhu, barareka kwamambala. Yeke bamtjhiya lapho bakhamba.

Umbuzo ngokuvuka kwabafileko

²³ Khona mhlokho abaSadusi abakholwa bonyana akukho ukuvuka kwabafileko beza kuJesu bambuza

²⁴ bathi: “Mfundisi, uMosi wasitjela bona indoda nayihlongakala inganabantwana, umfowabo kufanele angene umhlolokazayo bese ambelethele abantwana.

²⁵ Yeke bekukhona izelamani ezilikhomba ebezihlala khonapha. Izibulo lathatha kodwana lahlongakala linganabantwana, yeke latjhiya umhlolokazalo, wangenwa mfowabo.

²⁶ Kwenzeka soneso ngeselamani sesibili nesesithathu, bekwaba ngesekhomba.

²⁷ Ekugcineni umhlolokazi loyo naye wahlongakala.

²⁸ Manje-ke mhlana abafileko bavukako ekufeni, uzokuba mkabani kabalikhomba njengombana boke gade bamthethe na?”

²⁹ UJesu wabaphendula wathi: “Niyaphosisa niyazi! Kanti aniyazi imitlolo namkha amandla kaZimu na?

³⁰ Ekuvukeni, abantu angeze bathatha namkha bende ngombana bazokufana neengilozi ezisezulwini.

³¹ Kodwana mayelana nokuvuka kwabafileko: Kghani anikafundi bona uZimu wathini kini?

³² Angithi wathi, ‘NginguZimu ka-Abrahamu, uZimu ka-Isaka noZimu kaJakopo.’ AkasinguZimu wabafileko, kodwana ungowabaphilako.”

³³ Kwathi lokha iinqubuthu nazizwa lokhu, zarareka ngefundiswakhe leyo.

Umyalo ongomkhulu

³⁴ Kwathi bona abaFarisi bezwe bonyana uJesu uvale abaSadusi umlomo, bahlangana ndawonye.

³⁵ Omunye wabo, osisazi somthetho, wamlinga ngombuzo lo, wathi:

³⁶ “Mfundisi, ngimuphi umyalo ongomkhulu emthethweni na?”

³⁷ UJesu wamphendula wathi: “ ‘Thanda uSomnini uZimakho ngehliziywakho yoke, ngomphefumulwakho woke nangomkhumbulwakho woke.’

³⁸ Lo myalo wokuthoma nongomkhulu.

³⁹ Wesibili ofana nawo ngothi, ‘Thanda umakhelwanakho njengombana uzithanda wena.’

⁴⁰ Woke umthetho kanye nabaphorofidi kudzimelele emiyalweni emibili le.”

Umbuzo ngoKrestu

⁴¹ Kwathi abaFarisi basahlangane ndawonye, uJesu wababuza wathi:

⁴² “Nicabangani ngoKrestu na? Uyindodana kabani na?” Bamphendula bathi: “UyiNdodana kaDavida.”

⁴³ Yeke uJesu wabuza wathi: “Alo, kubayini-ke uDavida nakhuluma ngoMoya ambize bona yiKosi na? Angithi wathi,

⁴⁴ “ ‘USomnini wathi eKosinami: Hlala ngesidleni sami bekube kulokha nangenza izitha zakho zibe sinabelo seenyawo zakho.’

⁴⁵ Yeke, nangabe uDavida umbiza ngokuthi ‘Kosi’, angaba yindodanakhe njani na?”

⁴⁶ Akakho noyedwa owakghona ukuphendula uJesu. Nje-ke kusukela mhlokho akakho noyedwa owakhe wagabaza wambuza eminye imibuzo.