UMATEWU 21 - IsiNdebele 2012 Translation

UJesu ungena eJerusalema ngedumo

¹ Kwathi bona batjhidele eJerusalema, sele baseBhethifage entabeni ye-Oliva, uJesu wathumela abafundi bakhe

² wathi kibo: “Yeniye emzini ongaphambi kwenu, khonapho nizakufumana udumbana abotjhiwe, udumbanyanakhe aseqadi kwakhe. Mtjhaphululeni nibalethapha.

³ Nakukhona otjho okuthileko kini nimtjele bona iKosi iyabadinga, yeke izababuyisa msinyana.”

⁴ Lokhu kwenzeka ukuze kuzaliseke okwakhulunywa mphorofidi, nasithi:

⁵ “Yenithi endodakazini yeZiyoni: “Naso ikosakho iza kuwe, ngokuzithoba beyikhwele udumbana, iye, udumbanyana olithole lakadumbana.”

⁶ Yeke abafundi bakhamba bayokwenza njengombana uJesu abayalile.

⁷ Baletha udumbana nodumbanyanakhe, babeka izambatho zabo phezu kwabo, yeke uJesu wahlala phezu kwazo.

⁸ Isiqubuthu esikhulu saqhisa izambatho zaso endleleni, abanye basika namatjhwaba wemithi bawaqhisa endleleni.

⁹ Isiqubuthu esakhamba phambi kwakhe nebesikhamba ngemva kwakhe sarhuwelela sathi: “Hosana kiyo iNdodana kaDavida! Ubusisiwe ozako ebizweni leKosi! Hosana kweliphezulu!”

¹⁰ Kuthe bona uJesu angene ngeJerusalema, idorobho loke lavungazela. Abantu babuza bathi: “Ungubani lo na?”

¹¹ Isiqubuthu saphendula sathi: “Lo nguJesu omphorofidi obuya eNazaretha eseGalile.”

UJesu uya ethempelini

¹² UJesu wangena ngethempelini, waqotjha boke ebebathenga bathengisa lapho. Waphekghula iintafula zabatjintji bemali neenhlalo zabathengisa amazuba,

¹³ wathi kibo: “Kutloliwe kwathiwa, ‘Ikumbami izakubizwa bona yikumba yokuthandaza’ kodwana nina niyenze irharha labahlanguli!”

¹⁴ Iimphofu neenrhole zeza kuye ngethempelini, wazipholisa.

¹⁵ Kodwana kwathi lokha abaphristi abakhulu nabafundisi bomthetho nababona izinto ezikarisako ebegade azenza, nabantwana barhuwelela ngethempelinapho basithi “Hosana kiyo iNdodana kaDavida”, banyenya khulu.

¹⁶ Yeke babuza uJesu bathi: “Uthi uyayizwa nje itlabelwana le bona ithini na?” UJesu wabaphendula wathi: “Iye ngiyabezwa! Kghani azange khenifunde imitlolo ethi, ‘Emilonyeni yabantwana neyamasana wabeka indumiso’ na?”

¹⁷ UJesu wabatjhiya, waphuma ngedorobheni waya eBhethaniya, walala khona.

UJesu unikelela umuthi wamakhiwani

¹⁸ Kuthe nasele asendleleni abuyela eJerusalema ekuseni, walamba.

¹⁹ Wabona umuthi wamakhiwani eqadi kwendlela, waya kiwo, kodwana azange afumane ilitho ngaphandle kwamakari. Yeke wathi emthini lowo: “Inga ungahlala ungasatheli!” Khonokho umuthi wamakhiwani woma.

²⁰ Abafundi nababona lokho barareka. Babuza bathi: “Umuthi wamakhiwani wome njani msinyana kangaka na?”

²¹ UJesu waphendula wathi: “Ngiqinisile ngiyanitjela bona naninokukholwa ningazazi, anizukwenza kwaphela okwenziwe emthini wamakhiwani lo, kodwana ningatjho nentabenapha nithi, ‘Suka, uziphosele ngelwandle,’ yeke kuzakwenzeka lokho.

²² Nanikholwako, nizakwamukela nanyana yini eniyikhombelako ngomthandazo.”

Umbuzo ngamandla kaJesu

²³ UJesu wangena ngesirhodlweni sethempeli; kwathi asafundisa, abaphristi abakhulu nabaphathi babantu beza kuye bambuza bathi: “Izintwezi uzenza ngegunya lakabani na? Ngubani okuphe amandla la na?”

²⁴ UJesu wabaphendula wathi: “Nami yithi nginibuze umbuzo owodwa kwaphela. Nange ningangiphendula, ngizanitjela bona ngizenza ngegunya lakabani izintwezi.

²⁵ Umbhabhadiso kaJwanisi ubuyaphi na? Ubuya ezulwini namkha ebantwini na?” Bacocisana babodwa ngendaba le, bathi: “Nasithi ubuya kuZimu, uzasibuza bonyana alo kubayini singakholwa.

²⁶ Godu nasithi ubuya ebantwini, sesaba abantu ngombana bayakholwa bonyana uJwanisi gade amphorofidi.”

²⁷ Yeke bamphendula bathi: “Awa, asazi.” Yeke wathi kibo: “Nami-ke angekhe nganitjela bona ligunyabani engenza ngalo izintwezi.”

Umfanekiso ngamadodana amabili

²⁸ “Nithini ngalokhu na? Bekukhona umuntu onamadodana amabili. Waya kekulu wathi kiyo, ‘Ndodana, khamba uyokusebenza esidiribeni namhlanje.’

²⁹ Yaphendula yathi, ‘Angifuni,’ kodwana emva kwesikhathi yazisola, yaya.

³⁰ Yeke umuntu loyo waya endodanenakhe enye, wafike watjho amezwi afanako, yaphendula yathi, ‘Iye, baba,’ kodwana azange iye.

³¹ Ngiyiphi-ke phakathi kwamabili la eyenze ekufunwa nguyise na?” Bamphendula bathi: “Yokuthoma.” Yeke uJesu wathi kibo: “Ngiqinisile ngiyanitjela bona abathelisi neengwadla zingena embusweni kaZimu phambi kwenu.

³² UJwanisi weza kini wanitjengisa indlela yokulunga, azange benimkholwe, kodwana abathelisi neengwadla zamkholwa. Kubhale ngitjho nanyana sele nikubonile lokhu, azange beniphenduke nimkholwe.”

Umfanekiso ngabaqatjhi

³³ UJesu wathi kibo: “Lalelani omunye umfanekiso naku: Kwakhe kwaba khona umnininarha owatjala isidiribe, wakha umthangala magegana naso. Wemba ubutlhodlhelo kiso bewakha nesithala sokulinda. Yeke waqatjhisela abalimi abathileko isidiribeso, yena wathatha ikhambo.

³⁴ Kwathi nakutjhidela isikhathi sokuvuna, wathumela iinsebenzi zakhe ebaqatjhini kobana bayokukha iinthelo zakhe.

³⁵ Abaqatjhi babamba iinsebenzi zakhe, esinye basibetha, esinye basibulala, sesithathu basikhanda ngamatje.

³⁶ Godu wathumela ezinye iinsebenzi kibo, zaba zinengi ukudlula zokuthoma, abaqatjhi baziphatha njengezekuthomeni.

³⁷ Ekugcineni wathumela indodanakhe kibo adlumbana asithi, ‘Nakuyindodanami bazayihlonipha.’

³⁸ Kodwana kwathi abaqatjhabo nababona indodana, bakhuluma bodwa bathi, ‘Angithi le yindlalifa! Asiyibulaleni siyithathele ilifa layo.’

³⁹ Yeke bayibamba bayiphosa ngaphandle kwesidiribe, bayibulala.

⁴⁰ Alo-ke umninisidiribe nafikako uzabenzani abaqatjhaba na?”

⁴¹ Bamphendula bathi: “Iinkhohlakalezo uzozibhubhisa nya, athathe isidiribe sakhe asiqatjhisele abanye abazamnikela isabelo sakhe sesivuno ngesikhathi esifaneleko.”

⁴² UJesu wathi kibo: “Kghani anizange khenifunde emitlolweni na? “ ‘Ilitje abakhi abalilahlako libe lilitje lesisekelo. Lokhu kwenziwe yiKosi; nje-ke kuyamangalisa emehlwenethu.’ ”

⁴³ UJesu wathi kibo godu: “Ngalokho ngiyanitjela bonyana umbuso wezulu uzokususwa kini unikelwe abantu abazokuthela iinthelo.

⁴⁴ Owela phezu kwelitjeli uzakuphuka abe ziinquqwana; kodwana loyo elizakuwela phezu kwakhe yena uzakutshidlheka.”

⁴⁵ Kwathi lokha abaphristi abakhulu nabaFarisi nabezwa umfanekiso kaJesu lo, kwabakhanyela bona ukhuluma ngabo.

⁴⁶ Yeke balinga ukufumana indlela yokumbamba. Kodwana bebesaba isiqubuthu ngombana abantu bebathatha uJesu njengomphorofidi.