UMATEWU 20 - IsiNdebele 2012 Translation

Umfanekiso ngeensebenzi zesidiribe

¹ “Umbuso wezulu ufana nomnininarha owaphuma ekuseni wayokuqatjha abantu bona basebenze esidiribeni sakhe.

² Wavuma ukubakhokhela udenariyu ngelanga, wabese ubathumela esidiribeni sakhe.

³ Ngesimbi yethoba waphuma godu wabona abanye abantu bajame endaweni ekuthengiselwa kiyo, bangenzi ilitho.

⁴ Yeke wathi kibo, ‘Nani khambani niyokusebenza esidiribeni sami, ngizanikhokhela nanyana yini efaneleko.’

⁵ Yeke bakhamba. Kwathi ngesimbi yetjhumi nambili godu nangesimbi yesithathu wenza godu okufanako.

⁶ Godu ngesimbi yesihlanu, waphuma wafunyana abanye nabo bajame khonapho. Wathi kibo, ‘Kubayini nilokhu nijame lapha imini yoke ningenzi ilitho na?’

⁷ Bamphendula bathi, ‘Kungombana akunamuntu osiqatjhako.’ Wathi kibo, ‘Yeke nani khambani niyokusebenza ngesidiribeni sami.’

⁸ “Kwathi bona ukuhlwa kufike, umninisidiribe watjela indunakhe wathi, ‘Biza iinsebenzi uzinikele umrholwazo, uthome ngeziqatjhwe muva, ugcine ngezithome ntange.’

⁹ Abantu abathome ukusebenza ngesimbi yesihlanu bafika, barholelwa udenariyu ngamunye.

¹⁰ Kwathi abantu abaqatjhwe ntange nabafikako, badlumbana bona bazakufumana ngaphezudlwana. Kodwana nabo banikelwa udenariyu ngamunye.

¹¹ Sele bamukele ikokhelwabo bathoma ukunghonghoyila kumnininarha,

¹² bathi, ‘Abantwaba abaqatjhwe muva basebenze nje i-awara linye kwaphela, khonapho ubalinganisa nathi thina ababhesele iduladula yomsebenzi nomtjhiso welanga!’

¹³ “Kodwana waphendula omunye wabo wathi, ‘Mnganami, angikakugalaji. Angithi uvumile bona uzakusebenzela udenariyu na?

¹⁴ Yeke thatha ikokhelwakho uye ekhaya. Ngifuna ukukhokhela umuntu oqatjhwe muva lo ngokulingana nalokho engikukhokhele khona.

¹⁵ Anginalungelo lokwenza engikuthandako ngemalami na? Unomona ngombana nginomusa na?’ ”

¹⁶ “Ngaleyondlela bokugcina bazakuba ngebokuthoma nebokuthoma babe ngebokugcina.”

UJesu ukhuluma lesithathu ngokufa kwakhe

¹⁷ Kwathi uJesu nakhuphukela eJerusalema, wabizela abafundi abalitjhumi nambili ngeqadi,

¹⁸ wathi kibo: “Sikhuphukela eJerusalema lapha iNdodana yoMuntu izokukhatjhelwa khona kubaphristi abakhulu nakubafundisi bomthetho. Bazoyigwebela ukufa,

¹⁹ bayinikele ezandleni zabatjhili kobana bahlekise ngayo, bayirithe bebayibethele esiphambanweni. Kodwana elangeni lesithathu izakuvuka kabafileko.”

Isibawo somkaZebediya

²⁰ Yeke umkaZebediya namadodanakhe amabili baya kuJesu, bafese baguqa phambi kwakhe bakhombela isisa kuye.

²¹ UJesu wambuza wathi: “Ufunani na?” Wamphendula wathi: “Vuma bona amadodanami amabili la akuphahle embuswenakho, enye ibe ngesigomeni sakho, enye ibe ngesinceleni sakho.”

²² UJesu waphendula, wathi: “Anikwazi enikubawako. Ningakghona ukusela ikapho engizoyisela le na?” Baphendula bathi: “Singakghona.”

²³ UJesu wathi kibo: “Kwamambala nizakusela ikapho engiyiselako, kodwana nayikuhlala ngesigomeni namkha ngesinceleni sami, awa akusingokwami ukutjho lokho. Iindawezi ngezalabo uBaba azilungisele bona.”

²⁴ Kwathi bona abalitjhumi bezwe ngalokho, banyenya ngamadodana amabili layo.

²⁵ Yeke uJesu wababizela ndawonye boke wathi: “Niyazi bona ababusi babatjhili banamandla phezu kwabo neenkhulu zabo eziphezulu zinegunya phezu kwabo.

²⁶ Yeke, akusinjalo kini! Nanyana ngubani phakathi kwenu ofuna ukuba mkhulu, kufanele abe yincekwenu.

²⁷ Nofuna ukuba ngewokuthoma akabe likhoboka lenu;

²⁸ kube njengombana kunjalo ngeNdodana yoMuntu engakezeli ukuzokwenzelwa, kodwana izele ukwenzela nokunikela ipilwayo njengesihlengo sabanengi.”

UJesu uphophulula amadoda amabili

²⁹ Kwathi uJesu nabafundi bakhe nabasuka eJerikho, isiqubuthu esikhulu sabalandela.

³⁰ Bekuneemphofu ezimbili ebezihlezi eqadi kwendlela, zathi zingezwa bona uJesu uzokudlula lapho, zarhuwelela zathi: “Kosi, Ndodana kaDavida, sirhawukela!”

³¹ Isiqubuthu sazithethisa sathi azithule. Kodwana zarhuwelela khulu kwanjesi zathi: “Kosi, Ndodana kaDavida, sirhawukela!”

³² UJesu wajama, wazibiza, wathi kizo: “Nifuna bona nginenzeleni na?”

³³ Zathi: “Kosi, sifuna ukubona!”

³⁴ UJesu wazirhawukela, wakghwatha amehlwazo. Khonokho zabona, zamlandela.