UMATEWU 2 - IsiNdebele 2012 Translation

Izazi ezivela epumalanga

¹ Ngemva kobana uJesu abelethwe eBhethelehema eseJudiya emihleni yokubusa kwekosi uHerode, kweza izazi eJerusalema zivela epumalanga.

² Zabuza zathi: “Uphi obelethwe bona abe yikosi yamaJuda na? Sibone ikwekwezakhe lokha nayiphuma ngepumalanga, nje-ke size bona sizomkhothamela.”

³ Kwathi bona ikosi uHerode izwe lokho, yawurubajeka, neJerusalema loke lawurubajeka nayo.

⁴ Sele ibizele ndawonye boke abaphathi babaphristi kanye nabafundisi bomthetho, yababuza bonyana uKrestu ubelethelwephi.

⁵ Bayiphendula bathi: “NgeBhethelehema eseJudiya ngombana lokhu ngilokho umphorofidi atlole ngakho nasithi,

⁶ “ ‘Wena Bhethelehema esenarheni yakwaJuda, awusingomncancani hlangana nababusi bakwaJuda ngombana kuwe kuzokuvela umbusi ozokuba ngumelusi wabantu bami u-Israyeli.’ ”

⁷ Yeke uHerode wabizela izazi zepumalanga ngasese wazibuza isikhathi ikwekwezi evele ngaso.

⁸ Wazithumela eBhethelehema wathi: “Khambani niyokufunisisa kuhle ngomntwana; nithi ningamfumana, ningazise, khona nami ngizakuya ngiyomkhothamela.”

⁹ Ngemva kobana sele zizwe ikosi, zangena indlela. Qala, ikwekwezi ebeziyibone ngepumalanga yakhamba phambi kwazo beyayokujama ngehla kwendawo lapha bekunomntwana khona.

¹⁰ Kwathi lokha nazibona ikwekwezi, zajabula khulu.

¹¹ Zathi nazingena ngekumbeni, zabona umntwana anonina uMariya, yeke zakhothama zamlotjha. Zavula amagugwazo zamkhunga ngezipho: igolide, itjhwalo nemire.

¹² Sele ziyelelisiwe ebhudangweni kobana zingabuyeli emuva kuHerode, zaya enarheni yekhabo zikhamba ngenye indlela.

Ukubalekela eGibhide

¹³ Kwathi bona izazi zikhambe, ingilozi kaSomnini yazibonakalisa kuJosefa ngebhudango yathi: “Vuka uthathe umntwana nonina nibalekele eGibhide. Hlalani lapho benginitjele ngombana uHerode uzokufunana nomntwana kobana ambulale.”

¹⁴ Yeke wavuka, wathatha umntwana nonina, wakhamba ebusuku waya eGibhide,

¹⁵ lapha ahlala khona uHerode wabe wafa. Kwazaliseka bunjalo-ke okwatjhiwo nguSomnini ngomphorofidi wathi: “Ngabiza indodanami kobana iphume eGibhide.”

Ukubulawa kwabantwana

¹⁶ Kwathi bona uHerode alemuke bonyana izazi zepumalanga zimkhohlisile, wasilingeka. Wakhupha umyalo bona kubulawe boke abantwana ababesana eBhethelehema neendaweni ezihlanu kwayo, kusukela eminyakeni emibili nengaphasi. Lokhu kwenzeka malungana nalokho akuzwa ngezazi.

¹⁷ Ngaleyondlela kwazaliseka lokho okwatjhiwo ngomphorofidi uJoromiya nasithi:

¹⁸ “Ilizwi lizwakele eRama, ukulila okukhulu nokutlhuwa; uRarheli ulilela abantwabakhe, akafuni nokutjhiriywa ngombana bangasekho.”

Ukubuya eGibhide

¹⁹ Ngemva kokuhlongakala kwakaHerode, ingilozi kaSomnini yazibonakalisa kuJosefa ngebhudango eGibhide,

²⁰ yathi: “Vuka, uthathe umntwana nonina, ubuyele enarheni yakwa-Israyeli ngombana labo egade balinga ukubulala umntwana baphangalele.”

²¹ Yeke wavuka, wathatha umntwana nonina, babuyela enarheni yakwa-Israyeli.

²² Kodwana kwathi bona uJosefa ezwe bonyana u-Aritjhilawosi uthethe isihlalo sakayise uHerode eJudiya, wesaba ukuya lapho. Sele ayeleliswe ebhudangweni, waya esifundeni seGalile,

²³ wayokuhlala edorobheni okuthiwa yiNazaretha. Yeke-ke okwatjhiwo baphorofidi kwazaliseka nabasithi: “Uzakubizwa bona umNazaretha.”