UMATEWU 19 - IsiNdebele 2012 Translation

UJesu ufundisa ngokutlhalana

¹ Kwathi bona uJesu aqede ukukhuluma izintwezi, wasuka eGalile waya esifundeni seJudiya engaphetjheya komlambo iJordani.

² Iinqubuthu ezinengi zamlandela, yeke wazipholisa khonapho.

³ Abanye abaFarisi beza kuye kobana bamlinge. Bambuza bathi: “Kumthetho bonyana indoda itlhale umkayo nanyana kungasiphi isizathu na?”

⁴ UJesu waphendula wathi: “Azange khenifunde bonyana ekuthomeni uMdali wenza omduna nomsikazi na?

⁵ Yeke wathi, ‘Ngesizathweso indoda izakutjhiya uyise nonina inamathele kumkayo, nje-ke ababilaba baba yinyama yinye.’

⁶ Ngaleyondlela abasesebabili, kodwana banye. Yeke okuhlanganiswe nguZimu, akungabikhona umuntu okwahlukanisako.”

⁷ AbaFarisi bambuza bathi: “Alo-ke kubayini uMosi akhuphe umthetho wokobana indoda inikele umfazi incwadi yesahlukaniso imqotjhe na?”

⁸ UJesu waphendula wathi: “UMosi wanivumela bonyana nitlhale abafazi benu ngombana benineenhliziyo ezikhunyaleleko. Kodwana ekuthomeni bekungasinjalo.

⁹ Ngiyanitjela bona nanyana ngubani otlhala umkakhe ngaphandle kwesizathu sokuhlobonga bese uthatha omunye umfazi, uzabe uyahlobonga.”

¹⁰ Abafundi bakhe bathi kuye: “Nakube kunjalo hlangana nendoda nomkayo, kungadumbana kungathathwa-ke.”

¹¹ UJesu waphendula wathi: “Akusingubani nobani ongamukela amezwi la, kodwana kwaphela labo anikelwe bona.

¹² Abanye babaphakulwa ngokubelethwa, abanye benziwa babantu bona babe njalo kanti abanye badela ukuthatha ngebanga lombuso wezulu. Loyo okghona ukwamukela lokho akenze njalo.”

UJesu ubusisa abantwana

¹³ Yeke kwalethwa abantwana kuJesu kobana abeke izandla phezu kwabo, abathandazele. Kodwana abafundi bathethisa labo ababalethako.

¹⁴ UJesu wathi: “Vumelani abantwana beze kimi, ningabakhandeli ngombana umbuso wezulu ungewabafana nalaba.”

¹⁵ Nje-ke wathi bona abeke izandla phezu kwabo, wakhamba.

Isigwili sesokana

¹⁶ Kweza umuntu kuJesu wathi: “Mfundisi, ngisiphi isenzo sokulunga engingasenza ukuze ngizuze ukuphila okungapheliko na?”

¹⁷ UJesu waphendula wathi: “Kubayini ungibuze ngokulungileko na? Munye kwaphela olungileko. Nakube ufuna ukungena ekuphileni, londa imiyalo.”

¹⁸ Umuntu loyo wathi: “Ngimiphi imiyalo leyo na?” UJesu wamphendula wathi: “Ungabulali, ungahlobongi, ungebi; ungafakazi amala;

¹⁹ hlonipha uyihlo nonyoko; uthande umakhelwanakho njengombana uzithanda wena.”

²⁰ Isokana laphendula lathi: “Koke lokho ngikulondile. Ngikuphi okhunye ekufanele ngikwenze na?”

²¹ UJesu waphendula wathi: “Nawufuna bona ulunge uphelele, khamba uyokuthengisa koke onakho, unikele abadududu, uzakuba nobugwili ezulwini. Yeke uze ungilandele!”

²² Kuthe bona isokanelo lizwe lokho, lakhamba lidanile ngombana gade lisigwili samambala.

²³ Yeke uJesu wathi ebafundini bakhe: “Ngiqinisile ngiyanitjela bona kulikhuni kobana umuntu osigwili angene embusweni wezulu.

²⁴ Ngiyabuyelela godu ngithi kulula ukuziluma indololwani kunobanyana umuntu osigwili angene embusweni kaZimu.”

²⁵ Kwathi lokha abafundi nabezwa lokhu, barareka khulu bebabuza bathi: “Alo, nakunjalo ngubani ongasindiswa na?”

²⁶ UJesu wabaqala, wabaphendula wathi: “Ebantiwini lokhu kuyinto engeze yenzeka, kodwana ngoZimu koke kuyenzeka.”

²⁷ Yeke uPitrosi wathi: “Sitjhiye koke kobana sikulandele. Alo, sizakuzuzani ngalokho na?”

²⁸ UJesu wathi kibo: “Ngiqinisile ngiyanitjela bona ephasini elitjha lokha iNdodana yoMuntu nayihlezi esihlalweni sayo sobukhosi esiphazimulako, nina ebeningilandela, nani nizokuhlala eenhlalweni zobukhosi ezilitjhumi nambili, nigwebe iinkoro ezilitjhumi nambili zakwa-Israyeli.

²⁹ Loyo naloyo otjhiye iinkumba namkha abafowabo namkha abodadwabo namkha uyise namkha unina namkha abantwana namkha amasimu ngebanga lami, uzakwamukela ngokubuyelelwe kalikhulu abe azuze nokuphila okungapheliko.

³⁰ Kodwana abanengi abangebokuthoma bazakuba ngebokugcina, kuthi abanengi ekungebokugcina babe ngebokuthoma.”