UMATEWU 17 - IsiNdebele 2012 Translation

Ukuphazimuliswa

¹ Ngemva kwamalanga asithandathu uJesu wathatha uPitrosi, uJakopo noJwanisi umnakwabo kaJakopo, wenyukela nabo entabeni ephakamileko, baba bodwa lapho.

² Lapho-ke waphazimuliswa phambi kwabo. Ubuso bakhe baphazima njengelanga nezambatho zakhe zaba mhlophe zakhanya.

³ Khonapho kwabonakala phambi kwabo uMosi no-Eliya bakhuluma noJesu.

⁴ Yeke uPitrosi wathi kuJesu: “Kosi, kuhle kithi ukuba lapha! Nawuthandako, ngizakuhloma imitlhatlhana emithathu lapha, omunye ube ngewakho, omunye ube ngewakaMosi bese omunye ube ngewaka-Eliya.”

⁵ Kwathi asakhuluma njalo, basibekelwa lilifu elidarhileko, bekwazwakala nelizwi libuya elifinapho lathi: “Le yiNdodanami engiyithandako, engithaba khulu ngayo, ilaleleni!”

⁶ Kwathi bona abafundi bezwe lokho, bawa ngobuso phasi baphelile ngevalo.

⁷ Kodwana uJesu weza kibo wabakghwatha wathi: “Vukani, ningesabi!”

⁸ Bathi nabaphakamisa amehlo, azange babone umuntu ngaphandle koJesu.

⁹ Kwathi nabehla entabeni, uJesu wabayala wathi kibo: “Ningatjeli namunye ngenikubonileko bekube kumhlana iNdodana yoMuntu ivukileko ekufeni!”

¹⁰ Yeke abafundi bambuza bathi: “Alo-ke kubayini abafundisi bomthetho basithi u-Eliya kufanele eze ntange na?”

¹¹ UJesu wabaphendula wathi: “Ngambala u-Eliya uyeza kobana azokubuyisela yoke into.

¹² Kodwana ngiyanitjela bonyana u-Eliya wafika kodwana abantu azange bamazi. Bamphatha ngokuthanda kwabo. NeNdodana yoMuntu izose ihlupheke njalo-ke ezandleni zabo.”

¹³ Yeke abafundi balemuka bona bekakhuluma nabo ngoJwanisi uMbhabhadisi.

UJesu upholisa umsana ongenwe mumoya omumbi

¹⁴ Kwathi bona bafike esiqubuthwini, kwavela umuntu weza kuJesu, waguqa phambi kwakhe,

¹⁵ wathi kuye: “Kosi, rhawukela indodanami! Inesithunthwana, nje-ke ihlukumezeke khulu. Kanengi iduleka emlilweni nanyana ngemanzini.

¹⁶ Ngayiletha ebafundini bakho, kodwana azange bakghone ukuyipholisa.”

¹⁷ UJesu waphendula wathi: “Maye, nina sizukulwana esingakholwako nesonakeleko! Ngizokuhlala nani bekube kunini na? Kuzabe kube nini ngininyamezelela na? Letha indodana leyo kimapha!”

¹⁸ UJesu wakhalimela idimoni, laphuma emsaneni, yeke waphola khonokho.

¹⁹ Abafundi bakaJesu baya kuye ngasese, bambuza bathi: “Sibangelwe yini kobana singakghoni ukuqotjha idimoneli na?”

²⁰ UJesu waphendula wathi: “Kungombana ninokukholwa okubogabogako. Ngiqinisile ngiyanitjela bona ingathana beninokukholwa okulingana nembewu yemastadi, beningathi entabeni le, ‘Suka lapha uye laphaya,’ beyizakuvele isuke. Akunalitho ebelizanibhalela!

²¹ Kodwana umhlobo lo awuphumi nje kwaphela ngaphandle komthandazo nokuzila ukudla.”

UJesu ukhuluma godu ngokufa kwakhe

²² Kwathi lokha nabahlangana boke eGalile, uJesu wathi kibo: “INdodana yoMuntu izokukhatjhelwa ezandleni zabantu.

²³ Bazoyibulala, kodwana elangeni lesithathu izakuvuswa.” Abafundi badabuka khulu ngalokho.

Umthelo wethempeli

²⁴ Ngemva kobana uJesu nabafundi bakhe bafike eKapernawumi, abathelisi bomthelo wethempeli beza kuPitrosi bambuza bathi: “Angithi umfundisenu uyawukhupha umthelo wethempeli?”

²⁵ UPitrosi waphendula wathi: “Iye, uyawukhupha.” Kwathi lokha uPitrosi nangena ngekumbeni, uJesu waba ngewokuthoma owakhuluma naye, wambuza wathi: “Simoni, uthini umbono wakho na? Amakhosi wephaseli awuthatha kibobani umthelo na? Kghani awuthatha emadodanenawo namkha emadodaneni wabanye abantu na?”

²⁶ UPitrosi wamphendula wathi: “Emadodaneni wabanye abantu.” UJesu wamphendula wathi: “Khona-ke amadodana akabalelwa ekukhupheni umthelo.

²⁷ Kodwana ukuze singabakhubekisi, khamba uye elwandle ufese uphosele isithiyahlambi. Ihlambi yokuthoma ozoyibamba, ithathe uyivule umlomo, uzakufumana iimpaparwana ezine ezilingene umthelo. Zithathe ubanikele zona kube mthelo wami newakho.”