UMATEWU 16 - IsiNdebele 2012 Translation

Isibawo sesibonakaliso

¹ AbaFarisi nabaSadusi beza kuJesu bamlinga ngokumbawa bonyana abakhombise isibonakaliso esibuya ezulwini.

² Wabaphendula wathi: “Nakurhwalalako, phele nithi, ‘Lizokubalela ngombana amafu abomvu.’

³ Kuthi ekuseni nithi, ‘Namhlanje kuzokuba nesiwuruwuru ngombana amafu aguqubele!’ Niyakwazi ukuhlathulula ubujamo bezulu kodwana anikwazi ukuhlathulula amatshwayo weenkhathi.

⁴ Isizukulwana esikhohlakeleko nesihlobongako sifunana namatshwayo wemikarisomraro, kodwana asizukunikelwa ngitjho nasinye ngaphandle kweembonakaliso zakaJona.” UJesu wabatjhiya khonapho.

Isibiliso sabaFarisi nabaSadusi

⁵ Abafundi nabayamela ngaphetjheya kwelwandle, balibala ukuthatha isikwa.

⁶ UJesu wathi kibo: “Yelelani nitjheje isibiliso sabaFarisi nabaSadusi.”

⁷ Bathoma bakhuluma bodwa bathi: “Utjho ngombana asikezi nesikwa.”

⁸ UJesu wakwazi egade bakutjho, yeke wabuza wathi: “Nina abanokukholwa okuncani! Kubayini nikhuluma nodwana ngokuthi aninasikwa na?

⁹ Anilemuki nanje na? Anikhumbuli izikwa ezihlanu ezondla iinkulungwana ezihlanu nokobana kwaphuma iinqwebu ezingaki zeentshutshuru enazibutha lapho?

¹⁰ Nithini-ke ngezikwa ezilikhomba ezondla iinkulungwana ezine nokobana kwaphuma iinqwebu ezingaki zeentshutshuru enazibutha lapho?

¹¹ Alo-ke kwenziwa yini ningalemuki bona bengingakhulumi nani ngesikwa na? Zitjhejeni nina mayelana nesibiliso sabaFarisi nabaSadusi!”

¹² Yeke balemuka bona isibiliso ebegade abasola ngaso bekungasiso esifakwa esikweni, kodwana bekutjho bona bayelele ifundiso yabaFarisi nabaSadusi.

Ubufakazi bakaPitrosi ngoKrestu

¹³ Kwathi lokha uJesu nafika esifundeni seKhesariya-Filipi, wabuza abafundi bakhe wathi: “Abantu bathi iNdodana yoMuntu ingubani na?”

¹⁴ Bamphendula bathi: “Abanye bathi inguJwanisi uMbhabhadisi namkha ingu-Eliya, abanye godu bathi inguJoromiya namkha ingomunye wabaphorofidi.”

¹⁵ Wababuza godu wathi: “Alo-ke nina nithi ngingubani na?”

¹⁶ USimoni Pitrosi waphendula wathi: “UnguKrestu, iNdodana kaZimu ophilako.”

¹⁷ UJesu wamphendula wathi: “Ubusisiwe wena Simoni msa kaJona ngombana lokhu akukembulwa mumuntu kuwe kodwana kwembulwe nguBaba osezulwini.

¹⁸ Yeke ngithi kuwe unguPitrosi. Phezu kwedwaleli ngizakwakha ibandla lami, ngitjho namasango weHayidesi angeze ajamelana nalo.

¹⁹ Ngizokunikela iinhluthulelo zombuso wezulu; nanyana yini oyibopha ephasinapha izabe ibotjhiwe nezulwini, nalokho okuthukululako ephasinapha kuzabe kuthukululwe nezulwini.”

²⁰ Yeke uJesu wakghala abafundi bakhe bona bangatjeli namunye bonyana unguKrestu.

UJesu ukhuluma ngokutlhaga kwakhe nokufa kwakhe

²¹ Kusukela ngesikhatheso uJesu wathoma ukuhlathululela abafundi bakhe bonyana kumele aye eJerusalema lapha azokutlhaga khona ngokunengi ezandleni zabaphathi, abaphristi abakhulu kanye nabafundisi bomthetho. Nokobana kumele abulawe bese kuthi elangeni lesithathu avuke, aphile godu.

²² UPitrosi wambizela ngeqadi, wamkhalimela, wathi: “Sengathi uZimu angaba nomusa Kosi, koke lokho kungenzeki kuwe!”

²³ Yeke uJesu waphenduka wathi kuPitrosi: “Suka kimapha, Sathana ndina! Usiqabo endlelenami ngombana imikhumbulwakho akusiyo yokukaZimu, kodwana ingeyabantu.”

²⁴ Yeke uJesu wathi ebafundini bakhe: “Nanyana ngubani ofuna ukungilandela, akazidele, atjathe isiphambano sakhe angilandele.

²⁵ Loyo ofuna ukusindisa ipilo yakhe izomlahlekela; kodwana loyo olahlekelwe yipilo yakhe ngebanga lami uzayifumana.

²⁶ Kuzamsiza ngani umuntu ukuzuza iphasi loke kodwana alahlekelwe yipilwakhe na? Namkha yini umuntu angenana ngayo ngepilwakhe na?

²⁷ Ngambala iNdodana yoMuntu izokuza ngephazimulo kaYise neengilozi zayo, yeke izakuvuza omunye nomunye umuntu ngokwemisebenzakhe.

²⁸ Ngiqinisile ngiyanitjela bona abanye abajame lapha njenganje angeze bakubona ukufa bangakaboni iNdodana yoMuntu isiza ngombuswayo.”