UMATEWU 15 - IsiNdebele 2012 Translation

Okuhlambulukileko nokungakahlambuluki

¹ Yeke abanye babaFarisi nabafundisi bomthetho basuka eJerusalema beza kuJesu bambuza bathi:

² “Kubayini abafundi bakho beqa isiko labadala na? Abahlambi izandla zabo nabagomako!”

³ UJesu waphendula wathi: “Kubayini neqa umyalo kaZimu ngebanga lesiko lekhenu na?

⁴ Ngambala uZimu wathi, ‘Hlonipha uyihlo nonyoko,’ begodu, ‘Nanyana ngubani othuka uyise namkha unina kufanele abulawe’.

⁵ Kodwana nithi umuntu nathi kuyise namkha kunina, ‘Nanyana yini ebegade nginganisiza ngayo sele ngiyinikele kuZimu njengesipho’,

⁶ akukameli bona, ‘ahloniphe uyise’ ngento leyo. Ngalokho nilahla ilizwi lakaZimu ngebanga lamasikwenu.

⁷ Nina bazenzisi ndina! U-Isaya bekaqinisile lokha naphorofida ngani asithi:

⁸ “ ‘Abantwaba bangidumisa ngeembhena zabo, khisibe iinhliziyo zabo zikude nami.

⁹ Bangidumisa ngelize, iimfundiso zabo zimithetho nje kwaphela efundiswa babantu!’ ”

¹⁰ Yeke uJesu wabizela isiqubuthu kuye, wathi kiso: “Lalelani benilemuke.

¹¹ Akusikho okungena ngemlonyeni okusilaphaza umuntu; kodwana ngilokho okuphuma ngaphakathi kwakhe.”

¹² Yeke abafundi bakhe beza kuye bathi: “Uthi uyazi nje bona abaFarisi bakhubekile lokha nabezwa lokhu na?”

¹³ UJesu waphendula wathi: “Soke isitjalo uBaba osezulwini angakasitjali sizokuruthulwa ngemirabhaso.

¹⁴ Baliseni, babahlahli abaphopheleko. Nakube isiphofu sirhola esinye isiphofu, zizokuwela ngemgodini zombili njalo.”

¹⁵ UPitrosi wathi: “Sihlathululela umfanekiso lo!”

¹⁶ UJesu wathi kibo: “Kanti nani anikabi ukulemuka na?

¹⁷ Anazi bonyana nanyana yini okungena ngemlonyeni womuntu kuya ngesiswini, kubuye kuphume emzimbeni na?

¹⁸ Kodwana koke okuphuma ngemlonyeni kuvela ehliziyweni, ngilokho-ke okusilaphaza umuntu.

¹⁹ Iye, ehliziyweni kuvela imizindlo emimbi, ukubulala, ukuhlobonga, ubufebe, ubusela, ukufakaza amala nokuhlambalaza.

²⁰ Lokho-ke ngikho okusilaphaza umuntu. Kodwana ukugoma ningakahlambi izandla, akumenzi umuntu bonyana asilaphale.”

Ukukholwa komfazi womKanana

²¹ UJesu wasuka lapho waya esifundeni seTirosi neTsidoni.

²² Umfazi womKanana obekahlala endaweni leyo, weza kuye, warhuwelela wathi: “Kosi, Ndodana kaDavida, ngirhawukele! Indodakazami ihlukumezeke khulu ngebanga lokungenwa lidimoni.”

²³ Kodwana uJesu azange atjho nelilodwa ilizwi kuye. Abafundi bakhe beza kuye bamrabhela, bathi: “Mtjele akhambe ngombana uhlalele ukusirhuwelela!”

²⁴ Waphendula wathi: “Ngithunywe kwaphela ezimvini ezilahlekileko zakwa-Israyeli.”

²⁵ Khonapho umfazi weza waguqa phambi kwakhe wathi: “Kosi, yewungisize!”

²⁶ UJesu wamphendula wathi: “Akusikuhle ukuthatha ukudla kwabantwana ukuphosele izinja.”

²⁷ Waphendula wathi: “Kuliqiniso Kosi, kodwana izinja nazo zidla iintshutshuru eziwa etafuleni lomninizo.”

²⁸ Yeke uJesu wamphendula wathi: “Awu, mma, ukukholwa kwakho kukhulu! Akube njengokwesibawo sakho.” Khonokho indodakazakhe yaphola.

UJesu upholisa abantu abanengi

²⁹ UJesu wasuka lapho wakhamba magegana nelwandle leGalile. Ngemva kwalapho wakhwela intaba, wafese wahlala phasi.

³⁰ Iinqubuthu ezinengi zeza kuye, zaletha kuye iinrhurhubi, iimphofu, iinrhole, iimumu nabanye abanengi abagulako, zababeka eenyaweni zakhe; wabapholisa boke.

³¹ Abantu barareka nababona iimumu zikhuluma, iinrhole ziphiliswa, iinrhurhubi zikhamba, iimphofu zibona; badumisa uZimu ka-Israyeli.

UJesu upha iinkulungwana ezine ukudla

³² UJesu wabizela abafundi bakhe kuye wathi: “Ngiyabarhawukela abantwaba, sekumalanga amathathu basoloko sebanami begodu abasenalitho lokugoma. Angifuni kobana bakhambe balambile ngombana bangatsirimezeka endleleni.”

³³ Abafundi bakhe bambuza bathi: “Sizasifumanaphi isikwa esaneleko endaweni ekude kangaka nemizi kobana siphe isiqubuthwesi na?”

³⁴ UJesu wababuza wathi: “Ninezikwa ezingaki na?” Bamphendula bathi: “Sinezikwa ezilikhomba neenhlambi ezincani ezimbalwa.”

³⁵ Yeke uJesu wabawa isiqubuthu bona sihlale phasi emgwengweni.

³⁶ Wathatha izikwa ezilikhomba neenhlambi, kwathi nasele athokozile, wasihlephula, wanikela abafundi bakhe; bona-ke banikela abantu.

³⁷ Boke bagoma, basutha. Ngemva kwalapho abafundi babuthelela iintshutshuru, zazala iinqwebu ezilikhomba.

³⁸ Inani lamadoda agomako laba ziinkulungwana ezine ngaphandle kwabafazi nabantwana.

³⁹ Ngemva kobana uJesu atjele isiqubuthu bona sikhambe, wangena ngemkhunjini, waya endaweni yeMagadani.