UMATEWU 14 - IsiNdebele 2012 Translation

Ukufa kwakaJwanisi uMbhabhadisi

¹ Ngesikhatheso uHerode, umtetrarerhesi gade ezwe imibiko ngoJesu,

² yeke wathi eencekwini zakhe: “Lo nguJwanisi uMbhabhadisi. Uvukile kabafileko! Ngikho amandla wemikarisomraro asebenza kuye nje.”

³ UHerode gade abambe uJwanisi, wambopha bewamdlhunya ngesikhungweni ngebanga lakaHerodiya, umkamfowabo uFlebhe.

⁴ Wenza njalo ngombana uJwanisi bekaseze asithi kuye: “Akukavumeleki bonyana ungamthatha.”

⁵ UHerode wafuna ukubulala uJwanisi, kodwana gade esaba abantu ngombana bebathatha uJwanisi bonyana umphorofidi.

⁶ Kuthe ngelanga lokubelethwa kwakaHerode, indodakazi kaHerodiya yagida phambi kwabantu, yajabulisa uHerode kangangobana

⁷ wayithembisa ngesifungo bonyana uzoyinikela nanyana yini eyibawako.

⁸ Ngokutjitjizelwa ngunina, yathi: “Yewungiphe ngesiqwebu ihloko kaJwanisi uMbhabhadisi khona nje!”

⁹ Ikosi yadana, kodwana ngebanga lesifungo esenzileko kanye neenthekeli zayo ezisesidlweni, yayala bonyana isibawo somntazana siphethwe.

¹⁰ Ngalokho yayala bonyana uJwanisi aquntwe ihloko angesikhungweni.

¹¹ Ngambala ihlokwakhe yalethwa ngesiqwebu yanikelwa umntazana, yena wayithatha wayisa kunina.

¹² Abafundi bakaJwanisi beza, bathatha isidumbu sakhe basibulunga. Basuka lapho bayokutjela uJesu.

UJesu upha iinkulungwana ezihlanu ukudla

¹³ Kuthe bona uJesu ezwe okwenzekileko, wasuka lapho wathaya ngomkhumbi, waya emmangweni ayedwa. Emva kobana isiqubuthu sizwe lokho, samlandela ngeenyawo sisuka ngedorobheni.

¹⁴ UJesu waphuma ngemkhunjini, kuthe lokha nabona isiqubuthu esikhulu, ihliziywakhe yarhawuka, wapholisa abagulako.

¹⁵ Kwathi nakuhlwako, abafundi bakhe beza kuye bathi: “Indawo le ikude nemizi kanti nokuhlwa sekuhlwile. Tjela abantu bakhambe ukuze baye emizini bayozithengela ukugoma.”

¹⁶ UJesu waphendula wathi: “Akunasidingo sokobana bakhambe. Bapheni nina ngokwenu kokugoma!”

¹⁷ Bamphendula bathi: “Thina siphethe izikwa ezihlanu neenhlambi ezimbili kwaphela.”

¹⁸ UJesu wathi kibo: “Kulethenapha.”

¹⁹ Watjela abantu bona bahlale phasi emgwengweni. Wathatha izikwa ezihlanu neenhlambi ezimbili, waqala phezulu ezulwini, wathokoza. Wahlephula izikwa, wanikela abafundi bakhe, bona banikela abantu.

²⁰ Woke umuntu wagoma ngokwaneleko. Abafundi babutha iintshutshuru eziseleko, zazala iinqwebu ezilitjhumi nambili.

²¹ Inani lamadoda elagomako gade liziinkulungwana ezihlanu, kungakabalwa abafazi nabantwana.

UJesu ukhamba phezu kwamanzi

²² Khonokho uJesu watjela abafundi bona bangene ngemkhunjini bakhambe phambi kwakhe baye ngaphetjheya kwelwandle, yena wasala atjela abantu bona bakhambe.

²³ Kuthe bona atjele abantu bonyana bakhambe, wenyukela entabeni ayedwa wayokuthandaza. Kwabe kwahlwa ayedwa lapho.

²⁴ Ngesikhatheso umkhumbi besele ukude tle nelwandle, uwubawubiwa mamaza ngombana bewuqalene nommoya.

²⁵ Phakathi komlindo wesine ebusuku, uJesu waya ebafundini bakhe akhamba phezu kwamanzi.

²⁶ Kuthe lokha abafundi nabambona akhamba phezu kwamanzi, baba nokwesaba bebathi: “Sipuku!” Batjho njalo barhuwelela ngokwesaba.

²⁷ Kodwana khonokho uJesu wathi kibo: “Yibani nesibindi! Ngimi, ningesabi!”

²⁸ UPitrosi waphendula wathi: “Kosi, nakube nguwe, yewungilayele bona ngikhambe phezu kwamanzi ngize kuwe.”

²⁹ UJesu wathi: “Yewuze!” Yeke uPitrosi waphuma ngemkhunjini, wakhamba phezu kwamanzi asiya kuJesu.

³⁰ Kodwana kuthe lokha nabona ummoya, wesaba bewathoma ukutjhingela. Warhuwelela wathi: “Kosi, yewungisindise!”

³¹ Khonokho uJesu wathabulula isandla sakhe wambamba wathi kuye: “Wena onokukholwa okuncani, uzazeleni na?”

³² Bangena bobabili ngemkhunjini; ummoya wathula.

³³ Labo ebegade bangemkhunjini bathandaza uJesu bathi: “Kwamambala uyiNdodana kaZimu!”

UJesu upholisa abagulako eGenesaretha

³⁴ Kwathi bona beyame umlambo, baya eGenesaretha.

³⁵ Lokha amadoda walapho nalemuka uJesu, athumela ilizwi kizo zoke iinarha ezibhodileko. Abantu baletha boke abagulako babo kuJesu.

³⁶ Bamncenga bona avumele boke abagulako bathinte nje kwaphela umphetho wengubakhe, nje-ke boke abamthintako baphola.