UMATEWU 13 - IsiNdebele 2012 Translation

Umfanekiso ngomtjali

¹ Khona mhlokho uJesu waphuma ngekumbeni wayokuhlala eqadi kwelwandle.

² Kwabuthana kuye isiqubuthu esikhulu kangangobana wangena ngemkhunjini, wahlala phasi khibe abantu bajame eligwini.

³ Wabatjela okunengi asebenzisa imifanekiso, wathi: “Kwaphuma umtjali wayokutjala imbewu.

⁴ Kwathi nasarhatjha imbewu njalo, enye yawela eqadi kwendlela, kwafika iinyoni zayidla.

⁵ Enye yawela ekhetheni, lapha bekunganaqulwani enengi khona. Yamila msinyana ngombana iqulwani gade iyincani.

⁶ Kodwana kwathi lokha ilanga naliphumako, iintjalo zarhabuka bezatjhwaba ngombana bezinganamirabhu.

⁷ Enye imbewu yawela emeveni, akhula, abe ayiminyezela.

⁸ Kodwana enye imbewu yawela equlwanini ehle, yakhiqiza isivuno esathela ngekhulu, ngamatjhumi asithandathu, nangamatjhumi amathathu kwalokho okutjaliweko.”

⁹ “Oneendlebe akezwe!”

Isizathu somfanekiso

¹⁰ Abafundi beza kuJesu, bambuza bathi: “Kubayini ukhuluma nabantu ngemifanekiso na?”

¹¹ Waphendula wathi: “Ilwazi leemfihlakalo zombuso wezulu linikelwe nina, kodwana bona abakanikelwa.

¹² Ngambala loyo onelitho uzokungezelelelwa ukuze abe nokunengi. Kodwana onganalitho uzokwemukwa ngitjho nokuncancani anakho.

¹³ Kungalokho ngikhuluma nabo ngemifanekiso ngombana, “nanyana barhudule amehlo nje, ababoni ilitho, nanyana badose iindlebe nje, abezwa namkha abalemuki do.

¹⁴ Ngabo, isiphorofido saka-Isaya siyaphetheka sokuthi, ‘Nizakusoloko nisizwa kodwana ningazwisisi. Nizakusoloko nibona kodwana ningalemuki.

¹⁵ Ngambala iinhliziyo zabantwaba zilikhuni, iindlebe zabo zizwela kude namehlwabo bawavalile. Nakungasinjalo bebazakubona ngamehlwabo, bezwe ngeendlebe zabo, balemuke ngeenhliziyo zabo, baphenduke, nje-ke bengizabapholisa.’ ”

¹⁶ “Kodwana abusisiwe amehlwenu ngombana ayabona, neendlebe zenu ngombana ziyezwa.

¹⁷ Ngambala ngiqinisile ngithi kini: Abaphorofidi abanengi nabantu abalungileko bakhanukela ukubona lokho enikubonileko, kodwana azange bakubone, nokuzwa enikuzwileko, kodwana azange bakuzwe.”

UJesu uhlathulula umfanekiso ngomtjali

¹⁸ “Lalelani-ke bonyana umfanekiso ngomtjali utjho ukuthini.

¹⁹ Nanyana ngubani ozwa umlayezo ngombuso kodwana angawulemuki, unjengembewu ewele eqadi kwendlela, omumbi wafika wahluthula lokho okutjalwe kuye.

²⁰ Loyo owamukela imbewu eyawela ekhetheni ngiloyo ozwa ilizwi, alamukele msinyana ngethabo.

²¹ Kodwana ngebanga lokobana anganamrabhu, ubambelela isikhatjhana kwaphela. Lokha nakufika imiraro namkha ukurhayilwa ngebanga lelizwi, uwohloka msinyana.

²² Owamukela imbewu eyawela hlangana nameva ngiloyo ozwa ilizwi, kodwana amatshwenyeko wepilo le, kanye nokuyengwa bugwili, kwayiminyanisa bekwayenza yangaba neenthelo.

²³ Kodwana owamukela imbewu eyawela equlwanini ehle ngiloyo ozwa ilizwi, alilemuke. Ukhiqiza isivuno esithela ngokubuyelelwe ngekhulu, ngamatjhumi asithandathu namkha ngamatjhumi amathathu kwalokho okutjaliweko.”

Umfanekiso ngekhula

²⁴ UJesu wabatjela umfanekiso omunye wathi: “Umbuso wezulu unjengomuntu owatjala imbewu ehle esiminakhe.

²⁵ Kodwana kwathi woke umuntu asalele, isitha sakhe safika satjala ikhula hlangana nekoroyi sabe sakhamba.

²⁶ Kwathi lokha ikoroyi nayikhulako ithoma nokuphalaza nekhula nalo lazipha amandla.

²⁷ Iinceku zomuntu loyo zeza kuye, zafika zathi, ‘Kosi, azange utjale imbewu ehle esiminakho na? Alo, ikhuleli libuyaphi?’

²⁸ Waphendula wathi, ‘Sisitha esenze lokhu.’ Zambuza zathi, ‘Ufuna bona siyoliruthula na?’

²⁹ Waphendula wathi, ‘Awa ngombana naniruthula ikhula, ningahle niruthule nekoroyi ehlanu kwalo.

³⁰ Lisani kukhule kokubili njalo ndawonye bekube sikhathi sokuvuna. Ngesikhatheso ngizakutjela abavuni ngithi: Thomani ngokubuthelela ikhula bese nilibopha libe ziinyanda kobana liyokutjhiswa; ngemva kwalokho-ke nibuthelele ikoroyi niyithele ngesilulwini sami.’ ”

Umfanekiso ngembewu yemastadi nangesibiliso

³¹ UJesu wabatjela umfanekiso omunye godu wathi: “Umbuso wezulu ufana nembewu yemastadi eyathathwa mumuntu wayitjala esiminakhe.

³² Nanyana iyimbewu encani kinazo zoke, kodwana nayikhulako iba sitjalo esikhulu ukuzedlula zoke esimini, ibe mumuthi lapha iinyoni zomkayi zifika zakhele khona eengaleni zawo.”

³³ Godu uJesu wabatjela omunye umfanekiso wathi: “Umbuso wezulu ufana nesibiliso esathathwa mfazi wasihlanganisa neflowuru enengi kufikela lapha ihlama ikhukhumala khona.”

Ukukhuluma kwakaJesu ngemifanekiso

³⁴ UJesu wakhuluma koke lokhu esiqubuthwini ngemifanekiso, akunalitho alikhuluma kiso ngaphandle kokusebenzisa umfanekiso.

³⁵ Ngalokho kwazaliseka okwakhulunywa mphorofidi nasithi: “Ngizakuvula umlomami ngomfanekiso, ngiphuphume iimfihlakalo zekadeni.”

UJesu uhlathulula umfanekiso ngekhula

³⁶ Yeke watjhiya isiqubuthu, waya ngekumbeni. Abafundi bakhe beza kuye bathi: “Akhe usihlathululele umfanekiso wekhula esimini.”

³⁷ Wabaphendula wathi: “Owatjala imbewu ehle yiNdodana yoMuntu.

³⁸ Isimu liphasi, imbewu ehle madodana wombuso. Ikhula madodana wokhohlakeleko

³⁹ bese isitha esitjala ikhula nguSathana. Isivuno kuphela kwesikhathi; abavuni ziingilozi.

⁴⁰ Njengombana ikhula liyabuthelelwa belitjhiswe ngemlilweni, kuzokuba njalo-ke ekupheleni kwesikhathi.

⁴¹ INdodana yoMuntu izakuthumela iingilozi zayo ukuyokubuthelela embusweni wayo yoke into ebanga isono nabo boke abenza ubukhohlakali.

⁴² Zizabaphosa ngekehleni yomlilo obukhali, lapha kuzakuba khona ukulila nokugedla kwamazinyo.

⁴³ Nje-ke abalungileko bazakuphazima njengelanga embusweni kaYise wabo. Oneendlebe akezwe!”

Imifanekiso emithathu

⁴⁴ “Umbuso wezulu ufana nomnotho ofihlwe esimini. Lokha umuntu nawufunyanako, uyawufihla godu, bese kuthi ekuthabeni kwakhe akhambe ayokuthengisa koke anakho, athenge isimu leyo.

⁴⁵ “Godu umbuso wezulu ufana nomthengi ofunana namatje aligugu.

⁴⁶ Lokha nafumana elinenani eliphezulu, uyakhamba ayokuthengisa koke anakho, athenge ilitjelo.

⁴⁷ “Godu umbuso wezulu ufana nenede eyehliselwa ngelwandle, yabamba yoke imihlobo yeenhlambi.

⁴⁸ Kuthe bona izale, ababambi beenhlambi bayidosela ngaphandle eligwini. Yeke bahlala phasi bahlukanisa iinhlambi; ezihle zafakwa ngeenqwebini, kwathi ezingakalungi bazilahla.

⁴⁹ Kuzokuba njalo-ke ekupheleni kwesikhathi. Iingilozi zizakufika zehlukanise abakhohlakeleko kabalungileko,

⁵⁰ bese zibaphosela ngekehleni yomlilo obukhali, lapha kunokulila nokugedla kwamazinyo.”

⁵¹ UJesu wababuza wathi: “Nikuzwisisile lokhu na?” Bamphendula bathi: “Iye.”

⁵² Yena wathi kibo: “Yeke woke umfundisi womthetho ofundiswe ngombuso wezulu ufana nomnikazi wekumba okhupha ngebulungelweni lakhe amagugu amatjha namadala.”

UJesu uyaninwa eNazaretha

⁵³ Kuthe bona uJesu aqede ukukhuluma imifanekiso le, wasuka endaweni leyo.

⁵⁴ Wabuyela edorobheni lekhabo. Wafundisa ngesinagogini, kwathi labo abamuzwako barareka. Babuza bathi: “Umuntu lo ukuthethephi ukuhlakanipha kanye namandla wemikarisomraro engaka na?

⁵⁵ Akusiyindodana yombazi le na? Angithi unina nguMariya? Abafowabo akusinguJakopo, uJosefa, uSimoni noJudasi?

⁵⁶ Angithi abodadwabo boke siyabazi, bahlala lapha? Alo, umrhali lo ukuthethephi koke lokhu na?”

⁵⁷ Yeke bakhubeka ngaye. Kodwana uJesu wathi kibo: “Kusemzini wekhabo nangekumbenakhe kwaphela lapha umphorofidi angahlonitjhwa khona.”

⁵⁸ Azange enze imikarisomraro eminengi lapho ngombana bebangakholwa kuhle.