UMATEWU 12 - IsiNdebele 2012 Translation

Umbuzo ngeSabatha

¹ Ngesikhatheso uJesu warabhula hlangana namasimu wekoroyi ngeSabatha. Abafundi bakhe bebalambile, yeke bathoma ukukha iinqwambi zekoroyi, bagoma.

² Kwathi abaFarisi nababona lokho, bathi kuJesu: “Qala, abafundi bakho benza okuphambene nomthetho weSabatha.”

³ Wabaphendula wathi: “Azange khenifunde bona uDavida wenzani lokha yena nabakhambisani bakhe nagade balambile na?

⁴ Wangena ngekumbeni kaZimu, yena nabakhambisani bakhe, bagoma izikwa ezahlukaniselweko ebekungasimthetho kobana bangazigoma, kwaphela abaphristi bodwa.

⁵ Kghani azange khenifunde emthethweni kaMosi bona ngeSabatha abaphristi bayalona ilangelo kodwana bangabi nomlandu na?

⁶ Ngiyanitjela bonyana kukhona lapha okukhulu kunethempeli.

⁷ Nabegade nisazi bonyana atjho ukuthini amezwi la, ‘Ngilulukela ukwethembeka, ingasi umhlabelo.’ beningekhe nabalahla abamsulwa

⁸ ngombana iNdodana yoMuntu yiKosi yeSabatha.”

Indoda yesandla esirholopheleko

⁹ UJesu wasuka lapho waya ngesinagogini,

¹⁰ lapho bekunomuntu wesandla esirholopheleko. Bambuza bathi: “Kumthetho ukupholisa ngeSabatha na?” Bambuza lokho ukuze bakghone ukumsola.

¹¹ Wathi kibo: “Nakube omunye wenu unemvu, bese irhohlomela ngemgodini ngeSabatha, angeze ayilalamela ayikhuphe na?

¹² Umuntu uqakatheke khulu kunemvu! Ngalokho-ke kumthetho ukwenza okuhle ngeSabatha.”

¹³ Nje-ke wathi emuntwini loyo: “Thabulula isandla sakho.” Yeke wasithabulula, sathabuluka, safana nesinye.

¹⁴ AbaFarisi bakhamba, bayokwenza amano wokubulala uJesu.

Inceku kaZimu ekhethiweko

¹⁵ Sele akulemukile lokho, uJesu wakhamba lapho; isiqubuthu esikhulu samlandela. Wapholisa boke abagulako.

¹⁶ Wabayelelisa bonyana bangavezi nakoyedwa bonyana ungubani.

¹⁷ Wenza lokhu khona kuzakuzaliseka okwakhulunywa ngomphorofidi u-Isaya nasithi:

¹⁸ “Qala, incekwami engiyikhethileko, engiyithandako nengithokozako ngayo. Ngizakubeka uMoyami phezu kwayo nje-ke izakumemezela iingwebo ezizweni.

¹⁹ Angeze yaba nombango namkha irhuwelele, akunamuntu ozakuzwa iphimbo layo eendledlaneni.

²⁰ Umhlanga otshinyekileko ayizukuwukhambiselela nesibani esififiyelako ayizukusicima, kufikela lapha iphumelelisa khona ukulunga, kuhlule.

²¹ Izizwe zoke zizakubeka ithemba lazo ebizweni layo.”

UJesu noBhelzabhulu

²² Yeke kwalethwa kuJesu umuntu onedimoni, asiphofu begodu asimumu. UJesu wampholisa, wakghona ukubona nokukhuluma.

²³ Soke isiqubuthu sarareka, sabuza sathi: “Kungaba yiNdodana kaDavida le na?”

²⁴ Kodwana kuthe lokha abaFarisi nabezwa lokhu, bathi: “KungoBhelzabhulu ikosi yamadimoni kwaphela kobana umrhali lo akwazi ukuqotjha amadimoni.”

²⁵ UJesu wayazi imizindlo yabo, wathi kibo: “Omunye nomunye umbuso olwa wodwa uzakupheliswa; elinye nelinye idorobho namkha ikhaya elilwa lodwa angeze lajama.

²⁶ Nakube uSathana uqotjha uSathana, kutjho bona wehlukene yedwa. Alo, umbuswakhe ungajama njani na?

²⁷ Nakube mina ngiqotjha amadimoni ngoBhelzabhulu, abantu benu bona bawaqotjha ngani? Ngalokho-ke bazakuba bagwebi benu.

²⁸ Kodwana nakube ngiqotjha amadimoni ngoMoya kaZimu, khona-ke umbuso kaZimu sewufikile phezu kwenu.

²⁹ “Godu umuntu angangena njani ngekumbeni yetsitsirimba abe athathe ipahlayo ngaphandle kobana athome ngokubopha itsitsirimba leyo ntange na? Ngemva kwalapho-ke adlelezele ikumba leyo.

³⁰ “Loyo ongasingakimi ujamelene nami, naloyo ongabutheleli nami uyahlakaza.

³¹ Yeke ngithi kini: Abantu bazokulitjalelwa soke isono nokuhlambalaza, kodwana loyo ohlambalaza uMoya oCwengileko angeze alitjalelwa.

³² Nanyana ngubani okhuluma igama elijamelene neNdodana yoMuntu uzakulitjalelwa, kodwana nanyana ngubani okhuluma ngokujamelana noMoya oCwengileko angeze alitjalelwa, kungaba semihleni le namkha emihleni ezako.”

UJesu ukhalima abaFarisi

³³ “Nanithi umuthi muhle, vumani bona neenthelo zawo zihle, kodwana nanithi umuthi mumbi, vumani bona neenthelo zawo zimbi ngombana umuthi wazeka ngeenthelo zawo.

³⁴ Nina nzalo yeenyoka ndina, yini ehle eningayikhuluma nanikhohlakele kangaka? Ngambala okuvinyilika ekuphuphumeni kwehliziyo, umlomo ukukhuphela ngaphandle.

³⁵ Umuntu olungileko ukhupha okulungileko emnonwenakhe olungileko; nomuntu omumbi ukhupha okumbi emnonwenakhe omumbi.

³⁶ “Kodwana ngiyanitjela bonyana umuntu uzaziphendulela ngelanga lokwahlulelwa mayelana nelinye nelinye ilizwi alikhulume butjhophori.

³⁷ Ngamezwakho uzakuhlanjululwa, ngamezwakho uzakulahlwa.”

Ukubawa isibonakaliso

³⁸ Yeke abanye babafundisi bomthetho nabaFarisi bathi kuJesu: “Mfundisi, sifuna khewusenzele isibonakaliso somkarisomraro.”

³⁹ Waphendula wathi: “Isizukulwana esikhohlakeleko nesihlobongako sibawa isibonakaliso somkarisomraro! Kodwana akukho nasinye isibonakaliso esizakunikelwa sona ngaphandle kwesomphorofidi uJona.

⁴⁰ Njengombana uJona wahlala amalanga amathathu nobusuku obuthathu ngendeni yehlambi ekulu, nje-ke neNdodana yoMuntu izakuhlala amalanga amathathu nobusuku obuthathu ngemathunjini wephasi.

⁴¹ Amadoda weNiniva azakujama ebandla amangalele isizukulwanesi ngombana atjhuguluka lokha uJona natjhumayelako. Nje-ke omkhulu kunoJona sele akhona.

⁴² Indlovukazi yesewula izakujama ebandla imangalele isizukulwanesi ngombana yona yasuka epelazwe yazokulalela ukuhlakanipha kwakaSolomoni. Nje-ke, omkhulu kunoSolomoni sele akhona.”

Ukubuya kommoya omumbi

⁴³ “Lokha ummoya omumbi nawuphuma emuntwini, ugelagela eendaweni ezomileko ufunane nendawo yokuphumula kodwana ungayifumani.

⁴⁴ Khonapho-ke uzazitjela uthi, ‘Ngizakubuyela ekumbeni engayitjhiyako’, kuthi nawufikako ufunyane ikumba leyo inganamuntu, ithanyelwe beyabutheka kuhle.

⁴⁵ Nawusuka lapho-ke uyakhamba uyokulanda eminye imimoya elikhomba ekhohlakele khulu kunawo bese iyeza izokuhlala ngapho. Isiphetho somuntu loyo siba simbi khulu kunekuthomeni. Kuzakuba njalo-ke nesizukulwaneni esikhohlakelekwesi.”

Unina nabafowabo kaJesu

⁴⁶ Kwathi uJesu asakhuluma nesiqubuthu, kwafika unina nabafowabo bajama ngaphandle, bafuna ukukhuluma naye.

⁴⁷ Omunye umuntu wathi kuye: “Unyoko nabafowenu bayakufuna ngaphandle, babawa ukukhuluma nawe.”

⁴⁸ UJesu waphendula wathi: “Ngubani umma, bobani abafowethu na?”

⁴⁹ Waqalisa ngebafundini bakhe wathi: “Qalani! Nangu umma nabafowethu.

⁵⁰ Loyo owenza okufunwa nguBaba osezulwini ungumfowethu, ungudadwethu begodu ungumma.”