UMATEWU 11 - IsiNdebele 2012 Translation

Iinthunywa ezivela kuJwanisi uMbhabhadisi

¹ Ngemva kobana uJesu aqede ukuyala abafundi bakhe abalitjhumi nambili, wasuka lapho wayokufundisa bewatjhumayela emadorobheni weGalile.

² Kwathi bona uJwanisi ezwe asese ngesikhungweni ngalokho obekwenziwa nguKrestu, wathumela abanye babafundi bakhe kuye

³ kobana bayombuza bathi: “Unguye olindelwe bona afike, namkha silinde omunye na?”

⁴ UJesu waphendula wathi: “Khambani nibuyele emuva nifese nibikele uJwanisi ngenikuzwileko nenikubonileko:

⁵ Iimphofu ziyabona, iinrhurhubi ziyakhamba, abanekhwekhwe bayahlanjululwa, iinthulu ziyezwa, abafileko bayavuswa begodu ivangeli litjhunyayelwa nakilabo abadududu.

⁶ Ubusisiwe ongakhubekiko ngami.”

⁷ Kwathi abafundi bakaJwanisi nabakhambako, uJesu wakhuluma ngoJwanisi eenqubuthwini, wathi: “Beniphumele ukuyokubonani erhalawumbeni na? Umhlanga udengezeliswa mumoya na?

⁸ Kanti beniphumele ukuyokubonani na? Umuntu owembethe izambatho zakanokutjho na? Abantu abambatha njalo bahlala ngeenkumbeni zamakhosi!

⁹ Kanti beniphumele ukuyokubonani na? Kghani ukubona umphorofidi? Iye, ngiyanitjela nabona okudlula umphorofidi.

¹⁰ Nguye lo okutlolwe ngaye kwathiwa, “ ‘Qala, ngithuma isithunywa sami phambi kwakho, esizakulungisa indlela phambi kwakho.’

¹¹ “Ngiqinisile ngiyanitjela bona akukho noyedwa phakathi kwalabo ababelethwe ngowesifazi owavela waba mkhulu kunoJwanisi uMbhabhadisi. Nanyana kunjalo, omncani embusweni wezulu, mkhulu kunoJwanisi.

¹² Kusukela emihleni kaJwanisi uMbhabhadisi bekube gadesi, umbuso wezulu bewuseze uphangwa, abantu abawuphangako bayawuhluthula.

¹³ Boke abaphorofidi nomthetho baphorofida bekwafika uJwanisi.

¹⁴ Nakube nizimisele ukwamukela lokho, yena ungu-Eliya ozako.

¹⁵ Oneendlebe akezwe!

¹⁶ “Kodwana ngizasifanisa nani nje isizukulwana sanamhlanjesesi? Sinjengabantwana abahlezi eendaweni zokuthengisa baseze babizana bathi,

¹⁷ “ ‘Sanidlalela inghwani, kodwana azange nigide! Sarhahlawula, kodwana azange nilile!’

¹⁸ “UJwanisi wafika angagomi begodu angaseli, nje-ke bathi, ‘Unedimoni’.

¹⁹ INdodana yoMuntu yafika igoma begodu isela, bathi, ‘Naso-ke isirhiribideli nesidakwa, umngani wabathelisi nezoni!’ Ubuhlakani bubonakala buliqiniso ngezenzo zabo.”

Imizi engaphendukiko

²⁰ Yeke uJesu wathoma ukusola amadorobho lapha bekwenziwe khona ubunengi bemikarisomraro ngombana abantu bakhona azange baphenduke,

²¹ wathi: “Uzazizwa wena Rhorazini! Uzazizwa nawe Bhethe-Sayida! Nakube imikarisomraro eyenziwe kuwe le beyenziwe eTirosi neTsidoni, ngabe kade baphenduka ngokwembatha iinzilo bebazirhatjhe ngomlotha.

²² Ngiqinisile ngiyanitjela bona ngomhla wokuphela uZimu uzokuba nesirhawu esikhulu ebantwini beTirosi neTsidoni kunani!

²³ “Khulu kuwe Kapernawumi. Uzakuphakanyiselwa ezulwini na? Awa, uzokuphoselwa phasi esirhogweni ngombana nabethana imikarisomraro eyenzeke kuwe beyenzeke eSodoma, ngabe isekhona nanamhlanjesi!

²⁴ “Kodwana ngiqinisile ngiyanitjela bonyana ngomhla wokuphela, inarha yeSodoma izakurhawukelwa khulu kunani.”

Ukubizelwa ekuphumuleni

²⁵ Ngesikhatheso uJesu wathi: “Ngiyakudumisa Baba, mnikazi wezulu nephasi ngombana abahlakaniphileko nabafundileko ubafihlele lokhu, kodwana wakwembulela abancancani.

²⁶ Iye Baba, ngaleyondlela kube kuhle kuwe.

²⁷ “Koke ngikunikelwe nguBaba. Akakho owazi iNdodana ngaphandle koBaba begodu akakho owazi uBaba ngaphandle kweNdodana kanye nalabo iNdodana ethanda ukubambulela yena.

²⁸ “Yizani kimi noke nina enidiniweko nenidisibezekako, mina ngizaniphumuza.

²⁹ Thwalani ijogi lami, nifunde kimi ngombana ngimnene begodu ngithobile ngehliziyo, imimoya yenu izakufumana ukuphumula

³⁰ ngombana ijogi lami lilula nomthwalo wami awudisibezi.”