UMATEWU 10 - IsiNdebele 2012 Translation

Abapostoli abalitjhumi nambili

¹ UJesu wabizela abafundi bakhe abalitjhumi nambili kuye, wabanikela amandla wokuqotjha imimoya emimbi nokwelapha woke amalwelwe nezifo.

² Naka amabizo wabapostoli abalitjhumi nambili: Wokuthoma nguSimoni okuthiwa nguPitrosi nomfowabo u-Andrisi; uJakopo nomfowabo uJwanisi, amadodana kaZebediya;

³ uFlebhe noBharitholomeyusi, uTomasi noMatewu umthelisi; uJakopo umsa ka-Alfiyosi, uThadiyosi;

⁴ uSimoni umZelothe kanye noJudasi Iskariyodi owakhaphela uJesu.

⁵ Laba abalitjhumi nambili bathunywa nguJesu nemilayezo elandelako: “Ningayi hlangana nabatjhili begodu ningangeni ngitjho nakowodwa umuzi wamaSamariya.

⁶ Ngangcono niye ezimvini ezilahlekileko zakwa-Israyeli.

⁷ Ekukhambeni kwenu, tjhumayelani umlayezo lo, ‘Umbuso wezulu ubandamele!’

⁸ Pholisani abagulako, nivuse abafileko, nihlambulule labo abaphethwe likhwekhwe, niqotjhe amadimoni. Namukeliswe ngesihle, yeke nani yiphani ngesihle.

⁹ Ningaphathi igolide, isiliva namkha ikoporo emabhandenenu.

¹⁰ Ningaphathi imbada yokukhombela ekhambeni lenu, esinye isambatho, amapatlagwana namkha intonga ngombana isisebenzi kufanele sinikelwe esikuhlongako.

¹¹ “Nanyana kungaba ngiliphi idorobho namkha umuzi eningena kiwo, funani umuntu owazisako, nihlale kwakhe bekube kumhlana nikhambako.

¹² Akuthi naningena emzini, nilotjhise.

¹³ Nangabe abantu ekhayenelo bayanamukela, ukuthula kwenu akuhlale lapho; kodwana nabanganamukeliko, ukuthula kwenu akubuyele kini.

¹⁴ Nakube anamukeleki namezwenu akalalelwa, yenithintithe ithuli eenyaweni zenu, niphume ekhayenelo namkha emzini lowo.

¹⁵ Ngiqinisile ngiyanitjela bona kuzokuba ngcono enarheni yeSodoma neGomora ngomhla wokuphela kunomuzi lowo.”

Iinhlupheko ezizako

¹⁶ “Qalani, nginithuma njengezimvu hlangana neempisi. Ngalokho hlakaniphani njengeenyoka, nibe msulwa njengamazuba.

¹⁷ Hlalani nibaqaphele abantu abazanibamba banise ebandla, banirithe ngemasinagoginabo.

¹⁸ Nizakulethwa phambi kwababusi namakhosi ngebanga lami, kube bufakazi kibo nakabatjhili.

¹⁹ Lokha nabanibambako, ningakhathazeki kobana nizokuthini namkha niyibeke njani indaba, nakufika isikhathi nizanikukelwa bona nithini

²⁰ ngombana akusini enizabe nikhuluma, kodwana kuzabe kunguMoya kaYihlo okhuluma ngani.

²¹ “Umfo uzakukhaphela umfo ekufeni nobaba akhaphele umntwanakhe, abantwana bazakuvukela ababelethi, bababulale.

²² Boke bazanizonda ngebanga lebizo lami, kodwana loyo obambelela bekube sekupheleni, uzakusindiswa.

²³ Lokha nabanizumako kelinye idorobho, balekelani kelinye. Ngiqinisile ngiyanitjela bona angekhe naqeda ukudabula emadorobheni wakwa-Israyeli, iNdodana yoMuntu ingakafiki.

²⁴ “Umfundi akasingaphezu komfundisakhe; nekhoboka alisingaphezu kwekosalo.

²⁵ Kumanele umfundi bona abe njengomfundisakhe, nekhoboka laneliswe kukuba njengekosalo. Nangabe ihloko yomuzi ibizwa bona nguBhelzabhulu, nje-ke amanye amalunga womndeni azakubizwa ngamabizo asabekako!”

Loyo ekufuze simesabe

²⁶ “Ngalokho-ke ningabesabi. Koke okugutjuzesiweko kuzokugutjululwa, yoke ifihlo izokuvezwa emtarini.

²⁷ Enginitjela khona ebumnyameni kukhulumeni ekukhanyeni, enihletjelwa khona, kurhuweleleni niphezu kwephahla.

²⁸ Ningabesabi labo ababulala umzimba babhalelwe mphefumulo. Kungcono nesabe loyo okghona ukubhubhisa umphefumulo nomzimba esirhogweni.

²⁹ Iinyoni ezimbili azithengwa ngesipaparwana sinye semali na? Khonapho ayikho nayinye yazo ezakuwela phasi ngaphandle kwemvumo kaYihlo.

³⁰ Ngitjho neenhluthu ehlokwakho zibalwe zoke.

³¹ Yeke ningesabi; niqakatheke khulu kuneenyoni ezinengi!”

Ukuthula nesabula

³² “Ngiloyo naloyo ongivumako phambi kwabantu, nami ngizomvuma phambi koBaba osezulwini.

³³ Kodwana ongiphikako phambi kwabantu, nami ngizomphika phambi koBaba osezulwini.

³⁴ “Ningadlumbani bona ngilethe ukuthula ephasinapha. Awa, angikalethi ukuthula, kodwana ngilethe isabula.

³⁵ “Ngize bona ngizokuraranisa indodana noyise, indodakazi nonina, umalukazana nonosokana.

³⁶ Izitha ezikulu zomuntu izaba ngebekhabo.

³⁷ “Othanda uyise nonina ukudlula mina, akakangifaneli. Othanda indodanakhe namkha indodakazakhe ukudlula mina, akakangifaneli.

³⁸ Nanyana ngubani ongatjathi isiphambano sakhe, angilandele, akakangifaneli.

³⁹ Loyo ogodla ipilwakhe izomlahlekela; kodwana ozokulahlekelwa yipilwakhe ngebanga lami, uzayizuza.”

Umvuzo

⁴⁰ “Loyo onamukelako, wamukela mina; loyo owamukela mina, wamukela loyo ongithumileko.

⁴¹ Loyo owamukela umphorofidi ebizweni lomphorofidi, uzakufumana umvuzo womphorofidi, nowamukela olungileko ebizweni lolungileko, uzakufumana umvuzo wolungileko.

⁴² Nanyana ngubani oseza omunye wabancancanaba ngitjho ithosana lamanzi aqandako ngombana amfundi wami, ngiqinisile ngiyanitjela bona angeze alahlekelwa mvuzwakhe.”