UMARKOSI 9 - IsiNdebele 2012 Translation

¹ Wathi kibo: “Ngiqinisile ngiyanitjela bonyana abanye benu abajame lapha abazukufa bangakaboni umbuso kaZimu usiza ngamandla.”

Ukuphazimuliswa

² Emva kwamalanga asithandathu, uJesu wathatha uPitrosi, uJakopo noJwanisi wabarholela entabeni ephakemeko lapha baba bodwa khona. Lapho-ke ubujamo bakhe batjhuguluka phambi kwabo.

³ Izambatho zakhe zaba mhlophe, iye, ubumhlophe obunjengeliqwa. Zaba mhlophe ukwedlula indlela nanyana ngubani ephasinapha angenza ngayo.

⁴ Khonapho kwabonakala u-Eliya noMosi bakhuluma noJesu.

⁵ UPitrosi wathi kuJesu: “Rabi, kuhle ukuba khona kwethu lapha. Bengithi thana sakha imitlhatlhana emithathu, omunye ube ngewakho, omunye ube ngewakaMosi, omunye ube ngewaka-Eliya.”

⁶ Watjho njalo ngombana ubengazi bona angathini, begade banevalo.

⁷ Kwavela ilifu labagubuzesa, kwezwakala ilizwi emafini lisithi: “Le yiNdodanami engiyithandako. Ilaleleni!”

⁸ Bathalaza, akhange babone namunye ngaphandle koJesu yedwa.

⁹ Kwathi nabehla entabeni, uJesu wabayala bona bangatjeli namunye ngalokho abakubonileko, kufikela mhlana iNdodana yoMuntu ivukako kabafileko.

¹⁰ Nje-ke akhange batjele muntu, babuzana bona bodwa bathi: “Kutjho ukuthini ukuvuka kwabafileko?”

¹¹ Bakanye bambuza bathi: “Kubayini abafundisi bomthetho bathi kufuze kuze u-Eliya qangi na?”

¹² UJesu wathi kibo: “Iye kunjalo, u-Eliya uza qangi azokubuyisela koke esigeni. Alo-ke, kubayini kutlolwe bona iNdodana yoMuntu izakutlhaga khulu beyilahlwe na?

¹³ Kodwana ngiyanitjela bona u-Eliya ufikile, benza kuye koke abafuna ukukwenza, njengombana kutloliwe ngaye.”

Ukupholiswa komsana onommoya omumbi

¹⁴ Kwathi nabafika kabanye abafundi, babona isiqubuthu esikhulu sibabungelele nalabo ababafundisi bomthetho baphikisana nabo.

¹⁵ Emva kobana abantu babone uJesu, bathaba khulu bagijimela kuye bambingelela.

¹⁶ UJesu wabuza abafundi bakhe wathi: “Niphikisana ngani kangaka na?”

¹⁷ Kwaphendula indoda hlangana nesiqubuthu yathi: “Mfundisi, ngilethe indodanami engenwe mumoya oyivale bona ingakghoni ukukhuluma.

¹⁸ Njalo lokha nawuyibambako, uyidula phasi, ibhubhudlhe amagwebu ngomlomo, iququde amazinyo bese iyomelela. Ngikhombele abafundi bakho bona bawukhuphe ummoya lo, kodwana babhalelwa.”

¹⁹ UJesu wathi kibo: “Maye nina sizukulwana esingakholwako! Ngizokuhlala nani bekube kunini na? Ngizoninyamazelela bekube kunini na? Lethani umsana loyo kimapha.”

²⁰ Yeke bamletha. Kwathi lokha ummoya nawubona uJesu, khonapho wahlukumeza umsana loyo. Wawela phasi wazibhudabhuda, abhubhudlha amagwebu ngomlomo.

²¹ UJesu wabuza uyise lomsana wathi: “Sekusikhathi esingangani alokhu anje?” Waphendula wathi: “Kusukela ebuncanini bakhe.

²² Bewuphele umphosele emlilweni namkha ngemanzini kobana umbulale. Kodwana nakube kukhona ongakwenza, yewusirhawukele, usisize.”

²³ UJesu wathi kuye: “ ‘Nakube kukhona ongakwenza’? Koke kuyenzeka kiloyo okholwako.”

²⁴ Khonokho uyise lomsana warhuwelela wathi: “Ngiyakholwa; yewungisize ekungakholweni kwami!”

²⁵ Kuthe bona uJesu abone isiqubuthu sigijimela lapho, wakhalimela ummoya omumbi wathi kiwo: “Wena mmoya wobuthulu nobumumu, ngiyakuyala bona uphume kuye bewungasathoma ungene kuye godu!”

²⁶ Ummoya watlewula, wakhahlumeza umsana loyo khulu, waphuma. Ngemva kwalapho umsana waba ngathi sidumbu, abanengi bebathi: “Uhlongakele.”

²⁷ Kodwana uJesu wambamba ngesandla wamphakamisa, wavuka wajama ngeenyawo.

²⁸ Kuthe bona uJesu angene ngekumbeni, abafundi bakhe bambizela ngasese bathi: “Kubayini singazange sikghone ukuqotjha ummoya omumbi na?”

²⁹ Wathi kibo: “Umhlobo lo uphuma kwaphela ngomthandazo.”

UJesu ukhuluma godu ngokufa kwakhe

³⁰ Basuka lapho badlula eGalile. UJesu azange athande kobana kube nomuntu owaziko bonyana baya kuphi

³¹ ngombana bekafundisa abafundi bakhe. Wathi kibo: “INdodana yoMuntu izokukhatjhelwa ezandleni zabantu. Bazoyibulala bese ngemva kwamalanga amathathu ivuke.”

³² Kodwana azange bazwisise bonyana bekatjho ukuthini begodu bebesaba ukumbuza ngalokho.

Ukusebenzela uZimu

³³ Bafika eKapernawumi, kwathi angekumbeni, wababuza wathi: “Beniphikisana ngani endleleni na?”

³⁴ Bathula bathi du ngombana endleleni bebaphikisana bona ngubani omkhulu.

³⁵ Wahlala phasi wabiza abalitjhumi nambili, wathi kibo: “Nanyana ngubani ofuna ukuba ngewokuthoma, uzakuba ngewokugcina, abe sisebenzi sabo boke.”

³⁶ Wathatha umntwana wamjamisa hlangana nabo, wamgona wathi kibo:

³⁷ “Nanyana ngubani owamukela omunye wabantwana abancanaba ebizweni lami, wamukela mina, begodu nanyana ngubani owamukela mina akamukeli mina kodwana wamukela ongithumileko.”

³⁸ UJwanisi wathi kuye: “Mfundisi, sibone umuntu aqotjha amadimoni ebizweni lakho, yeke samkhandela ngombana ubengasi ngomunye wethu.”

³⁹ UJesu wamphendula wathi: “Ningamkhandeli ngombana akakho noyedwa owenza isimangaliso ebizweni lami ozakghona ukukhuluma kumbi ngami msinyana ngemva kwalokho.

⁴⁰ Ngambala, loyo ongakajamelani nathi ungowethu.

⁴¹ Ngiqinisile ngiyanitjela bona nanyana ngubani oninikela ikapho yamanzi ebizweni lami ngombana ningebakaKrestu, ngambala angeze alahlekelwa mvuzwakhe.”

Isilingo sokwenza isono

⁴² “Godu nanyana ngubani obangela bona omunye wabantwanaba enze isono, kuzakuba ngcono kuye bona abotjhelelwe imbokotho ekulu entanyeni bese uphoselwa ngelwandle.

⁴³ Nakube isandla sakho sikwenza wenze isono, siquntule. Kungcono ukungena epilweni engapheliko unganasandla, kunobanyana uye esirhogweni nezandla zombili, emlilweni ongacimiko.

⁴⁴ Lapho isibungu sakhona asifi nomlilo awucimi.

⁴⁵ Nakube inyawo lakho likwenza wenze isono, liquntule. Kungcono ukungena epilweni urholophele, kunobanyana uphoswe ngesirhogweni neenyawo zombili.

⁴⁶ Lapho isibungu asifi, umlilo awucimi.

⁴⁷ Nakube ilihlo lakho likwenza wenze isono, likhuphe. Kungcono ukungena embusweni kaZimu unelihlo elilodwa, kunobanyana uphoswe ngesirhogweni unamehlo amabili.

⁴⁸ Lapho isibungu sakhona asifi nomlilo awucimi.

⁴⁹ “Omunye nomunye uzakubabulwa ngomlilo.

⁵⁰ Itswayi lilungile, kodwana nasele liduma ungalivuselela njani na? Yibani netswayi ngaphakathi kwenu, nibe nokuthula komunye nomunye.”