UMARKOSI 8 - IsiNdebele 2012 Translation

UJesu upha iinkulungwana ezine

¹ Emihleni leyo, kwabuthana esinye isiqubuthu godu. Njengombana besinganalitho lokugoma, uJesu wabizela abafundi bakhe kuye wathi:

² “Abantwaba ngiyabarhawukela, sele kumalanga amathathu basoloko banami begodu bangagomi litho.

³ Nangingabathumela emakhaya ngendlala, bangatsirimezeka endleleni. Abanye babo babuya kude.”

⁴ Abafundi bakhe bathi kuye: “Kodwana kukuphi lapha umuntu angafumana khona isikwa esaneleko sokubondla njengombana sikude nemizi nje na?”

⁵ UJesu wababuza wathi: “Ninezikwa ezingaki na?” Bathi: “Ezilikhomba.”

⁶ Wayala isiqubuthu bona sihlale phasi. Kwathi bona athathe izikwa ezilikhomba bewathokoza, wazihlephula, wanikela abafundi bakhe kobana baphe abantu; yeke benza njalo.

⁷ Abafundi gade baneenhlambi ezincani ezimbalwa. Kuthe bona uJesu athokoze, wabayala bona babele abantu.

⁸ Abantu bagoma bebasutha. Ngemva kwalapho abafundi babuthelela bazalisa iinqwebu ezilikhomba ngeentshutshuru ezasalako.

⁹ Bekubabantu abangaba ziinkulungwana ezine. Ngemva kobana uJesu abatjhaphululile bona bakhambe,

¹⁰ yena wangena ngemkhunjini nabafundi bakhe, baya esifundeni seDalmanutha.

AbaFarisi babawa ukubona isibonakaliso

¹¹ Kwafika abaFarisi bathoma ukuphikisana noJesu. Bamlinga ngokufuna kuye isibonakaliso esivela ezulwini.

¹² Wadosa ummoya kabuhlungu wathi: “Kubayini isizukulwanesi sibawa isibonakaliso na? Ngiqinisile ngiyanitjela bona akunasibonakaliso esizakunikelwa sona.”

¹³ Nje-ke wabatjhiya, wangena ngemkhunjini wayamela ngaphetjheya.

Isibiliso sabaFarisi noHerode

¹⁴ Abafundi bebakhohliwe ukuza nesikwa, bebaphethe sinye tere ngemkhunjini.

¹⁵ UJesu wabayala wathi: “Tjhejani, niyelele isibiliso sabaFarisi nesakaHerode.”

¹⁶ Bakhulumisana babodwa bathi: “Kungebanga lokobana singanasikwa.”

¹⁷ UJesu walemuka ikulumiswano yabo wathi kibo: “Kubayini nikhuluma ngokungabi nesikwa na? Nisengakaboni begodu anikabukulemuka nanje na? Kghani nineenhliziyo eziqinileko na?

¹⁸ Ninamehlo angaboniko neendlebe ezingezwako na? Anikhumbuli na?

¹⁹ Lokha ngihlephulela iinkulungwana ezihlanu izikwa ezihlanu nazalisa iinqwebu ezingaki ngeentshutshuru ezasalako na?” Bathi kuye: “Ezilitjhumi nambili.”

²⁰ Wathi: “Lokha nangihlephula izikwa ezilikhomba ngipha iinkulungwana ezine zabantu, nazalisa iinqwebu ezingaki ngeentshutshuru ezasalako na?” Bathi kuye: “Ezilikhomba.”

²¹ Wababuza wathi: “Alo, soloko anilemuki na?”

UJesu upholisa isiphofu eBhethe-Sayida

²² Bafika eBhethe-Sayida, abantu abathileko baletha kuye indoda esiphofu, bamrabhela bona ayikghwathe.

²³ Wabamba indoda esiphofu ngesandla waphumela nayo ngaphandle komuzi. Kuthe bona ayikhafulele ngemehlweni, wayibeka izandla. Wayibuza wathi: “Kukhona okubonako na?”

²⁴ Yaphakamisa amehlo yathi: “Ngibona abantu, bafana nemithi, bayakhambakhamba.”

²⁵ Godu uJesu wabeka izandla zakhe phezu kwamehlwayo. Yeke amehlwayo avuleka, yakghona ukubona, yabona koke kuhle.

²⁶ Wayithumela ekhaya, wathi kiyo: “Ungabuyeli ngemzini.”

Ubufakazi bakaPitrosi ngoJesu

²⁷ UJesu nabafundi bakhe baya emizini eseKhesariya-Filipi. Endleleni wabuza abafundi bakhe wathi: “Abantu bathi ngingubani na?”

²⁸ Baphendula bathi: “Abanye bathi unguJwanisi uMbhabhadisi; abanye bathi ungu-Eliya, kanti abanye bathi ungomunye wabaphorofidi.”

²⁹ Wababuza wathi: “Nina-ke, nithi ngingubani na?” UPitrosi wamphendula wathi: “Wena unguKrestu.”

³⁰ UJesu wabayala bona bangatjeli namunye ngaye.

UJesu ukhuluma ngokuhlupheka nangokufa kwakhe

³¹ UJesu wathoma ukubafundisa bona iNdodana yoMuntu kumele itlhage khulu, ilahlwe baphathi, abaphristi abakhulu nabafundisi bomthetho, nokobana kumele ibulawe bekuthi ngemva kwamalanga amathathu ivuke.

³² Wakhuluma tjhatjhalazi ngalokhu uPitrosi bewambizela ngeqadi wamkhalimela.

³³ Kodwana kwathi lokha uJesu naphendukela ebafundini bakhe, wakhalimela uPitrosi wathi: “Suka phambi kwami Sathana ndina! Awulemuki izinto zakaZimu, ulemuka zabantu kwaphela!”

³⁴ Wabizela kuye isiqubuthu kanye nabafundi bakhe, wathi kibo: “Nanyana ngubani ofuna ukungilandela, akazidele, atjathe isiphambano sakhe angilandele.

³⁵ Ngambala, ofuna ukusindisa ipilwakhe, izamlahlekela; naloyo olahlekelwa yipilwakhe ngebanga lami nangebanga levangeli, uzayisindisa.

³⁶ “Kuzamsiza ngani umuntu bona azuze iphaseli loke nje, kodwana alahlekelwe mphefumulwakhe na?

³⁷ Umuntu angawenana ngani umphefumulwakhe na?

³⁸ Nakube umuntu uneenhloni ngami nangamezwami kilesi sizukulwana esihlobongako nesinezonokazesi, iNdodana yoMuntu nayo izakuba neenhloni ngaye nayifikako ephazimulweni kaYise kanye neengilozini ezicwengileko.”