UMARKOSI 7 - IsiNdebele 2012 Translation

Ifundiso yabokhokho

¹ AbaFarisi kanye nabanye abafundisi bomthetho ebebavela eJerusalema, babungelela uJesu.

² Khonapho babona abanye babafundi bakhe bagoma ngezandla ezingakahlambuluki okutjho ezingakahlanjwa.

³ AbaFarisi nawo woke amaJuda abagomi bangakahlambululi izandla zabo, ngokwenza njalo balonda isiko labokhokho.

⁴ Nababuya etatawini lokuthengisela, abagomi bangakahlambi. Godu kukhona amasiko amanengi abawatjhejako njengokuhlanza iinkapho, iimbiza nezitja zekoporo.

⁵ Yeke abaFarisi nabafundisi bomthetho babuza uJesu bathi: “Kubayini abafundi bakho bangaphili ngokwesiko labokhokho kodwana bagoma ngezandla ezingakahlanjwa na?”

⁶ UJesu waphendula wathi: “U-Isaya bekaqinisile lokha naphorofida ngani bazenzisi ndina njengombana kutloliwe kwathiwa, “ ‘Abantwaba bangidumisa ngeembhena zabo, kodwana iinhliziyo zabo zikude nami.

⁷ Bangidumisa ngelize, iimfundiso zabo zimithetho yabantu.’

⁸ “Nilahle imiyalo kaZimu nadzimelela emasikweni wabantu.”

⁹ Godu wathi kibo: “Ninendledlana ethileko yokuphayilela eqadi imiyalo kaZimu ukuze nilonde amasikwenu!

¹⁰ Angithi uMosi wathi, ‘Hlonipha uyihlo nonyoko.’ Godu wathi, ‘Owethuka uyise namkha unina akabulawe.’

¹¹ Kodwana nifundisa bona umuntu nakathi kuyise namkha kunina, ‘Nanyana ngiliphi isizo enginisize ngalo liyiKorbana’ (okutjho isipho esehlukaniselwe uZimu),

¹² nje-ke anisamlisi bona enzele uyise namkha unina nanyana yini akufunako.

¹³ Ngaleyondlela nilenza libe lilize ilizwi lakaZimu ngamasikwenu eniwafundisako. Kunengi okufana nalokhu enikwenzako.”

Umuntu usilaphazwa yini

¹⁴ Godu uJesu wabizela isiqubuthu kuye, wathi: “Yeningilalele noke nizwisise lokhu.

¹⁵ Akunalitho elingaphandle komuntu elingamenza abe ngosilapheleko nalingena ngaphakathi kwakhe. Kodwana ngokuphuma ngaphakathi kwakhe okumenza abe ngosilapheleko.

¹⁶ Oneendlebe akezwe!”

¹⁷ Ngemva kobana uJesu asukile esiqubuthwini bewangena ngekumbeni, abafundi bakhe bambuza ngomfanekiso lo.

¹⁸ Wababuza wathi: “Kanti nani anizwisisi na? Aniboni bona akunalitho elibuya ngaphandle elingena emuntwini bese limenza abe ngosilapheleko na?

¹⁹ Iye ngombana akuyi ngehliziyweni kodwana kuya ngesiswini sakhe, kusuke lapho-ke kuphumele ngaphandle komzimbakhe.” Ngokutjho njalo, uJesu bekatjho bona koke okugonywako kuhlambulukile.

²⁰ Waraga wathi: “Okuphuma ngemuntwini ngikho okumenza abe ‘ngosilapheleko’.

²¹ Ngaphakathi kwehliziyo yomuntu kuvela imikhumbulo emimbi okutjho ukulalana okuthuweleleko, ubusela, ukubulala, ukuhlobonga,

²² ukuba marhamaru, umkhumbulo wokwenza ubumbi, ikohliso, ukungabi nesimilo, umona, ukululaza, ukuzigabisa nobudlhayela.

²³ Boke ubusathanobu buvela ngaphakathi begodu ngibo-ke obenza umuntu abe ‘ngosilapheleko’.”

Ukukholwa komfazi

²⁴ UJesu wasuka lapho waya endaweni yeTirosi. Wangena ngekumbeni angafuni bona kube khona owaziko ukuthi ulapho, kodwana azange akghone ukubhaca.

²⁵ Emanyeni kwathi bona unina lomntazana obegade angenwe mimoya emimbi ezwe ngoJesu, waphoseka eenyaweni zakhe.

²⁶ Umfazi lo begade amuGirigi owabelethelwa eSiriya-Funisiya. Warabhela uJesu bona aqotjhe idimoni endodakazinakhe.

²⁷ Kodwana uJesu wathi kuye: “Akugome abantwana qangi banele ngombana akusikuhle ukuthatha isikwa sabantwana usiphosele izinja.”

²⁸ Yena wamphendula wathi: “Iye Kosi, nokho izinja nazo ngaphasi kwetafulapho zidla iintshutshuru eziwe nakugoma abantwana.”

²⁹ UJesu wathi kuye: “Ngebanga lependulwakho leyo, khamba uye ekhaya; idimoni liphumile endodakazinakho.”

³⁰ Waya ekhaya, wafumana umntwanakhe alele embhedeni, idimoni sele liphumile kuye.

UJesu upholisa indoda engezwako begodu esimumu

³¹ Yeke uJesu wasuka endaweni yeTirosi, wadlula eTsidoni, wehlela elwandle leGalile waya esifundeni seDekapolisi.

³² Lapho abantu baletha kuye isithulu esingakghoni ukukhuluma kuhle, bamrabhela bona asibeke izandla.

³³ Emva kobana asidosele eqadi, kude nesiqubuthu, uJesu wahloma iminwakhe ngeendlebeni zaso. Wakhafula wakghwatha ilimu laso.

³⁴ Waqala ezulwini, wadosa ummoya khulu wathi kiso: “Efatha,” okutjho bona “Vuleka.”

³⁵ Khonapho iindlebe zaso zavuleka, ilimu laso lararuluka besathoma ukukhuluma kuhle.

³⁶ UJesu wabayala bona bangatjeli noyedwa. Kodwana kwathi nakalokho abatjela njalo, bona baphikelela ukukhuluma ngakho.

³⁷ Abantu barareka khulu, bathi: “Koke ukwenze kuhle. Wenza ngitjho nabangezwako bona bezwe, nabangakhulumiko bakhulume.”