UMARKOSI 5 - IsiNdebele 2012 Translation

UJesu upholisa umuntu onemimoya emimbi

¹ UJesu nabafundi bakhe bayamela ngaphetjheya kwelwandle, enarheni yamaGerasene.

² Kwathi lokha uJesu nehla ngemkhunjini, wahlangatjezwa mumuntu onommoya omumbi avela emathuneni.

³ Umuntu loyo ubegade ahlala emathunenapho begodu bekungasenamuntu okghona ukumbopha ngitjho nangeenketani.

⁴ Ngeenkhathi zoke ubegade ahlala abotjhwe izandla neenyawo, kodwana begade adabula iinketani abe ephule neensimbi abekabotjhwe ngazo iinyawo. Gade kungekho omhlulako ngamandla.

⁵ Ubusuku nemini gade azulazula hlangana namathuna neentatjana, aphele arhuwelele azisike nangamatje.

⁶ Kwathi nakabona uJesu kudanyana naye, wagijima wafese wawa ngamadolo ngaphambi kwakhe.

⁷ Warhuwelela ngelizwi elikhulu wathi: “Ngikutjhisa ngani wena Jesu Ndodana kaZimu ongoPhezulu na? Funga ngoZimu bonyana awuzukungihlunguphaza!”

⁸ Watjho lokhu ngombana uJesu bekathe kuye: “Phuma emuntwini lo wena mmoya omumbi!”

⁹ Yeke uJesu wambuza wathi: “Ungubani ibizo lakho na?” Wamphendula wathi: “Ibizo lami nguLegiyoni ngombana sibanengi.”

¹⁰ Waphikelela ngokurabhela uJesu bona angabaqotjhi enarheni le.

¹¹ Umhlambi omkhulu wezavukazana gade udla hlanu kwentatjana.

¹² Amadimoni arabhela uJesu athi: “Sithumela ezavukazaneni, usivumele singene kizo.”

¹³ Wawavumela, aphuma-ke endodeni leyo angena ezavukazaneni. Umhlambi woke, ongaba zizavukazana eziziinkulungwana ezimbili, wagijimela emehlelweni wesebe, wadlhumukela ngelwandle, wacwila!

¹⁴ Abelusi bezavukazana babaleka, babika isigesi ngedorobheni nemaphandleni. Abantu baphuma bazokubona okwenzekileko.

¹⁵ Kwathi nabafika kuJesu, babona indoda ebegade ingenwe liwoma lamadimoni, ihlezi lapho, yembethe begodu seyibuyelwe mkhumbulo, yeke besaba.

¹⁶ Labo ababonileko batjela abantu bona kwenzekeni endodeni engenwe mimoya emimbi, babatjela nangezavukazana.

¹⁷ Yeke abantu babawa uJesu bona akhambe enarhenabo.

¹⁸ Kwathi uJesu nangena ngemkhunjini, umuntu obegade angenwe madimoni wakhombela ukukhamba naye.

¹⁹ UJesu azange amvumele kodwana wathi kuye: “Khamba uye ekhaya emndeninakho ufese ubatjele bona kungangani okwenzelwe nguSomnini nokobana ukurhawukele kangangani.”

²⁰ Yakhamba-ke indoda leyo beyathoma ukubika iindabezo eDekapolisi, kobana kungangani ekwenzelwe nguJesu. Boke barareka khulu.

Umntazanyana ohlongakeleko nomfazi ogulako

²¹ Kwathi bona uJesu godu ayamele ngaphetjheya kwelwandle ngomkhumbi, wabungelelwa siqubuthu esikhulu eqadi kwelwandle.

²² Yeke omunye wabaphathi besinagogi ebekuthiwa nguJayirosi weza lapho. Wathi nakabona uJesu, wawela eenyaweni zakhe,

²³ wamrabhela khulu wathi: “Indodakazami encani iyahlongakala. Akhese uze uzoyibeka izandla ukuze iphole beyiphile!”

²⁴ Yeke uJesu wakhamba naye. Isiqubuthu esikhulu samlandela sisunduzelana kuye.

²⁵ Bekunomfazi ogade aphopha iingazi, sele kuminyaka elitjhumi nambili anjalo.

²⁶ Wagula khulu akhamba iinyanga ezinengi, waphelelwa ngikho koke agade anakho. Kodwana kunobana aphole, ukugula kwarhagala.

²⁷ Kwathi bona ezwe ngoJesu, weza ngemva kwakhe hlangana nesiqubuthu wafese wakghwatha isambatho sakhe,

²⁸ ngombana ubegade azitjele wathi: “Nange ngingasengikghwathe nje isambatho sakhe kwaphela, ngizokuphola.”

²⁹ Khonokho ukuphopha kwakhawuka, wazizwa emzimbenakhe bona utjhaphulukile emtlhagwenakhe.

³⁰ Msinyazana uJesu walemuka bona kunamandla aphumileko kuye, waphendukela ngesiqubuthwini wathi: “Ngubani othinte isambatho sami?”

³¹ Abafundi bakhe bathi kuye: “Uyabona bona isiqubuthu sabantu sisunduzelana phezu kwakho kodwana khonapho ubuza bona ngubani okuthintileko?”

³² Kodwana uJesu waragela phambili waqala ngapha nangapha ukubona bonyana ngubani omthintileko.

³³ Yeke umfazi loyo, ngokwazi bonyana kwenzekeni kuye, weza wafese wawela eenyaweni zakaJesu, athuthumela ngokwesaba; wamtjela loke iqiniso.

³⁴ UJesu wathi kuye: “Ndodakazi, ukukholwa kwakho kukusindisile. Khamba ngokuthula, utjhaphuluke eenhlungwini zakho.”

³⁵ Kwathi uJesu asakhuluma njalo, kwafika amadoda athileko abuya kwaJayirosi umphathi wesinagogi athi kuye: “Indodakazakho ihlongakele, usamtshwenyelani umfundisi na?”

³⁶ UJesu akhange ayelele abakutjhoko, wathi kumphathi wesinagogi: “Ungesabi, kholwa nje kwaphela.”

³⁷ Akhange avumele namunye bona akhambe naye, ngaphandle koPitrosi, uJakopo nomfowabo uJwanisi.

³⁸ Kuthe nabafika emzini womphathi wesinagogi, uJesu wabona isiphithiphithi sabantu balila barhahlawula.

³⁹ Wangena wathi kibo: “Siphithiphithi sani lesi kanye nokurhahlawula okungaka na? Umntwana akakahlongakali kodwana ulele.”

⁴⁰ Kodwana bamhleka. Wabakhuphela ngaphandle, wathatha uyise lomntwana nonina kanye nabafundi eze nabo, bangena ngapha kunomntwana khona.

⁴¹ Wambamba ngesandla wathi kuye: “Thalitha kumi!” Nakutjhugululwako kutjho bona “Mntazanyana, ngithi kuwe, sikima!”

⁴² Khonokho umntazana wasikima wakhambakhamba. Gade aneminyaka elitjhumi nambili. Abantu barareka khulu ngalokho.

⁴³ UJesu wabadosa ngendlebe bona bangatjeli noyedwa ngalokho okwenzekileko. Godu wabayala bona baphe umntazanyana loyo okugonywako.