UMARKOSI 4 - IsiNdebele 2012 Translation

Umfanekiso ngomtjali

¹ Godu uJesu wathoma ukufundisa elwandle, isiqubuthu ebesimbungelele besisikhulu kangangombana wangena ngemkhunjini wahlala ngakiwo ngaphandle kwelwandle. Boke abantu bebagege neligu eduze kwamanzi.

² Wafundisa izinto ezinengi ngemifanekiso; ekufundiseni kwakhe wathi:

³ “Lalelani! Kwaphuma umtjali wayokutjala.

⁴ Kwathi nakarhatjha imbewu, enye yawela endleleni, iinyoni zafika zayigobola.

⁵ Enye yawela eendaweni ezinamatje lapha bekunganaqulwani enengi khona. Yamila masinyana ngombana iqulwani beyiyincani.

⁶ Kodwana kwathi nakuphuma ilanga, iintjalo zatjha bezatjhwaba ngombana bezinganamirabhu.

⁷ Enye imbewu yawela hlangana nameva, akhula aminyanisa iintjalo, ngalokho azange zithele.

⁸ Khonapho enye yawela equlwanini ehle. Yamila, yakhula yabe yathela, yabuyelela ngamatjhumi amathathu, amatjhumi asithandathu ngitjho nangekhulu.”

⁹ Yeke uJesu wathi: “Oneendlebe akezwe!”

Isizathu semifanekiso

¹⁰ Kwathi nasele ayedwa, abalitjhumi nambili kanye nabanye ebebanaye bambuza ngemifanekiso le.

¹¹ Wathi kibo: “Nina ninikelwe ifihlo yombuso kaZimu, kodwana kilabo abangaphandle, yoke into kibo itjhiwo ngemifanekiso

¹² ukuze “bahlale babona kodwana bangabonisisi, bahlale basizwa kodwana bangezwisisi, nakungasinjalo, bangatjhuguluka, balitjalelwe.”

UJesu uhlathulula umfanekiso ngomtjali

¹³ UJesu wababuza wathi: “Aniwuzwisisi umfanekiso lo na? Alo-ke nizayizwisisa njani eminye imifanekiso na?

¹⁴ Umtjali utjala ilizwi.

¹⁵ Abanye abantu banjengembewu esendleleni, lokha nakutjalwa ilizwi. Bathi bangalizwa, uSathana afike alithathe ilizwi elitjelwe kibo.

¹⁶ Abanye banjengembewu etjalwe eendaweni ezinamatje, bezwa ilizwi, balamukele ngethabo.

¹⁷ Kodwana njengombana banganamirabhu, babambelela isikhatjhana nje kwaphela. Nakufika iintjhijilo nokuzunywa, barhirika msinyana.

¹⁸ Khonapho abanye banjengembewu etjalwe hlangana nameva. Bezwa ilizwi,

¹⁹ kodwana iinhlupheko zobuphilobu nokukhohliswa lithando lobugwili kanye neenkanuko zezinto ezinye, kuyafika kubhibhe ilizwi, kulenze lingatheli.

²⁰ Abanye banjengembewu etjalwe ehlabathini ehle. Bayalizwa ilizwi, balamukele, bathele iinthelo ezibuyelelwe ngamatjhumi amathathu, ngamatjhumi asithandathu ngitjho nangekhulu.”

Isibani ngaphasi kwesitja

²¹ UJesu wababuza wathi: “Nibeka isibani ngaphasi kwesitja namkha ngaphasi kombhede na? Azakhe nisibeke phezu kwesitja saso na?

²² Ngambala nanyana yini efihlekileko izakuvela emkhanyweni, nalokho okusithekileko kuzakwambulwa.

²³ Nakukhona oneendlebe, akezwe!”

²⁴ Waraga wathi kibo: “Yelelani kuhle lokho enikuzwako! Isilinganiso enahlulela ngaso abanye, nani nizakwahlulelwa ngaso, ngitjho nangaphezulu.

²⁵ Onelitho uzakwengezelwa, loyo onganalitho, uzakwemukwa nalokho anakho.”

Umfanekiso ngembewu ekhulako

²⁶ UJesu godu wathi: “Umbuso kaZimu unje: Umuntu urhatjha imbewu esimini.

²⁷ Ubusuku nemini, nanyana uyalala namkha uyavuka, imbewu yona iyahluma beyikhule, ije angazi bonyana kwenzeka bunjani lokho.

²⁸ Iqulwani ngokwayo iveza ikoroyi, kuthoma kube lihlanga, kube litjhakazo bese kuba siqwambi esipheleleko.

²⁹ Nasele ikoroyi ivuthiwe, uyigweba ngesegere ngombana sekusikhathi sokuvuna.”

Umfanekiso ngembewu yesinapu

³⁰ UJesu wabuza wathi: “Umbuso kaZimu ungafaniswa nani na? Singawuhlathulula ngamuphi umfanekiso na?

³¹ Ufana nembewu yesinapu encancani kiyo yoke imihlobo yembewu etjalwa equlwanini.

³² Kodwana nasele itjelwe, ikhula ibe sitjalo esikhulu kinazo zoke esimini, sibe neempande ezikulu, iinyoni zomkayi zikhosele emthunzinaso.”

³³ UJesu wakhuluma ilizwi kibo ngemifanekiso eminengi efana nale ngendlela ebebangazwisisa ngayo.

³⁴ Akhange atjho ilitho kibo ngaphandle kokusebenzisa imifanekiso. Kodwana kwathi nasele ayedwa nabafundi bakhe, wabahlathululela koke.

UJesu uthulisa isiwuruwuru

³⁵ Mhlokho nakuhlwako wathi ebafundini bakhe: “Nambani siyameleni ngaphetjheya.”

³⁶ Batjhiya isiqubuthu bakhamba naye solo angemkhunjini. Neminye imikhumbi yakhamba nabo.

³⁷ Kwavuka isiwuruwuru esikhulu namaza angena ngemkhunjini, wapheze wazala amanzi.

³⁸ UJesu gade angemkhunjinapho alele emfotjhofotjhweni emsamo. Abafundi bamvusa bathi kuye: “Mfundisi, awutjhiswa bona siyaminza na?”

³⁹ Wavuka, wakhalimela isiwuruwuru namaza wathi: “Thula uthi du!” Yeke isiwuruwuru sarhobha, sakanye sathula du.

⁴⁰ Alo-ke wathi ebafundini bakhe: “Nethuswe yini kangaka na? Nisenakho ukukholwa nje na?”

⁴¹ Bathuka khulu bebabuzana bathi: “Kanti ngubani umuntu lo na? Ulalelwa ngitjho nangani mumoya nelwandle!”