UMARKOSI 3 - IsiNdebele 2012 Translation

Indoda enesandla esirholopheleko

¹ UJesu godu wangena ngesinagogini. Ngaphakathapho gade kukhona indoda enesandla esirholopheleko.

² Khonapho bekunabanye abantu ebebafunana nesizathu sokusola uJesu, yeke bamqala ngelihlo elibukhali ukubona bonyana uzakuphilisa umuntu loyo ije kuliSabatha njalo na.

³ UJesu wathi emuntwini orholophele isandla loyo: “Sikima ujame phakathi.”

⁴ UJesu wathi kibo: “Ngikuphi okuvumelekileko ngeSabatha: ukwenza okuhle namkha ukwenza okumbi, ukusindisa ipilo namkha ukubulala na?” Kodwana bathula bathi du.

⁵ Waqala kibo ngapha nangapha ngokuthukuthela nangokukhathazeka okukhulu ngebanga leenhliziyo zabo ezilikhuni, yeke wathi endodeni: “Thabulula isandla sakho.” Yasithabulula, saphola pholi.

⁶ Khonokho abaFarisi baphumela ngaphandle, benza isicathana nabantu bakaHerode sokobana bangambulala njani uJesu.

Iinqubuthu zilandela uJesu

⁷ UJesu wathatha abafundi bakhe baya elwandle. Isiqubuthu esikhulu esivela eGalile samlandela.

⁸ Kwathi bona bezwe ngakho koke ebegade akwenza, abantu abanengi beza kuye bavela eJudiya, eJerusalema, e-Idumiya neemfundeni ezingaphetjheya kweJordani namagegana neTirosi neTsidoni.

⁹ Ngebanga lesiqubuthu esikhulu, uJesu watjela abafundi bakhe bona bamlungisele umkhumbi khona abantu bangazukghona ukumbungelela.

¹⁰ Njengombana apholisa abantu abanengi nje, boke abagulako bebasunduzana, balinga ukumkghwatha.

¹¹ Bekuthi njalo lokha imimoya emimbi nayimbonako, idusuke phasi phambi kwakhe irhuwelele ithi: “Wena uyiNdodana kaZimu!”

¹² Kodwana wayidosa ngendlebe bona ingatjeli namunye bona ungubani.

Ukukhethwa kwabapostoli abalitjhumi nambili

¹³ UJesu wenyukela entabeni, wabizela kuye labo abafunako nje-ke beza kuye.

¹⁴ Wakhetha abalitjhumi nambili, wababiza bona babapostoli ukuze babe naye, abathume bona bayokutjhumayela,

¹⁵ begodu babe negunya lokuqotjha amadimoni.

¹⁶ Laba ngabalitjhumi nambili abakhethako: NguSimoni, amthiya bona nguPitrosi;

¹⁷ uJakopo nomnakwabo uJwanisi, abamadodana kaZebediya, bona wabathiya bona nguBhowanerigesi, okutjho bona madodana womdumo;

¹⁸ u-Andrisi; uFlebhe; uBharitholomeyusi; uMatewu; uTomasi; uJakopo umsa ka-Alfiyosi; uTadiyosi; uSimoni umZelothe

¹⁹ noJudasi Iskariyodi owakhaphela uJesu.

UJesu noBhelzabhulu

²⁰ UJesu wangena ngekumbeni, godu isiqubuthu sabuthana kangangoba yena nabafundi bakhe babhalelwa kugoma isikwa.

²¹ Kuthe bona bomndenakhe bezwe ngalokho, beza kobana bamthathe bathi: “Uhlangene ihloko.”

²² Abafundisi bomthetho ebebavela eJerusalema nabo bathi: “Ungenwe nguBhelzabhulu. Uqotjha amadimoni ngekosana yamadimoni.”

²³ Yeke uJesu wababiza wakhuluma nabo ngemifanekiso wathi: “USathana angamqotjha njani uSathana na?

²⁴ Nakube umbuso wehlukene ngokwawo, kutjho bona umbuso lowo angeze wajama.

²⁵ Nakube umndeni wehlukene ngokwawo, umndeni lowo angeze wajama.

²⁶ NoSathana nakube uziphikisa yena ngokwakhe begodu wehlukene phakathi, angeze ajama nesiphetho sakhe sifikile.

²⁷ “Emanyeni akakho umuntu ongangena emzini wetsitsirimba afese athathe ipahlayo ngaphandle kobana athome ngokuyibopha qangi, kukhona angadleleza ikumbayo.

²⁸ “Kwamambala ngiyanitjela bona zoke izono kanye neenhlamba zabantu bazakulitjalelwa zona.

²⁹ Kodwana nanyana ngubani ohlambalaza uMoya oCwengileko angekhe alitjalelwa, unomlandu wokona kwamlibe.”

³⁰ UJesu watjho njalo ngombana bebasithi: “Unommoya omumbi.”

Unina nabafowabo kaJesu

³¹ Yeke unina nabafowabo kaJesu bafika bajama ngaphandle, bathumela othileko ngaphakathi bona ayombiza.

³² Bekabungelelwe siqubuthu, abantu bathi kuye: “Unyoko nabafowenu babawa ukukubona ngaphandle.”

³³ UJesu waphendula wathi: “Ngubani umma nabafowethu na?”

³⁴ Waqala labo ebebahlezi bambungelele wathi: “Nangu umma nabafowethu!

³⁵ Nanyana ngubani owenza intando kaZimu ungumfowethu, nodadwethu nomma.”