UMARKOSI 2 - IsiNdebele 2012 Translation

UJesu upholisa umuntu okhubazekileko

¹ Amalangana ngemva kwalokho lokha uJesu nangena eKapernawumi, abantu bezwa bonyana uze ngekhaya.

² Abantu bahlangana ngobunengi kangangobana kwatlhogeka indawo yokuhlala ngitjho nangaphandle komnyango. Yeke wabatjhumayeza ilizwi.

³ Beza kuye bathwele umuntu okhubazekileko. Bekathwelwe madoda amane.

⁴ Ngebanga lokobana angazange akghone ukumfikisa kuJesu ngenca yesiqubuthu ebesilapho, amadoda lawo afuza iphahla ngehla kwalapho bekujame khona uJesu. Kwathi bona avule indlela, ehlisela umuntu okhubazekileko loyo phasi ngomkghadi ebegade alele kiwo.

⁵ UJesu wathi nabona ukukholwa kwawo, wathi emuntwini okhubazekileko: “Ndodanami, izono zakho zilitjalelwe.”

⁶ Nje-ke abafundisi abanye bomthetho bebahlezi lapho badlumbana basithi:

⁷ “Kubayini umrhali lo akhuluma ngalendlela? Uyahlambalaza! Ngubani ongalibalela izono ngaphandle kwakaZimu kwaphela na?”

⁸ Khonokho uJesu wazi emmoyenakhe bonyana lokhu ngilokho ebebakucabanga eenhliziyweni zabo, nje-ke wathi kibo: “Kubayini nicabanga izintwezi na?

⁹ Ngikuphi okulula ukuthi kokhubazekileko, ‘Izono zakho zilitjalelwe,’ namkha ukuthi, ‘Sikima uthathe umkghadi wakho ukhambe,’ na?

¹⁰ Ngizanibonisa-ke bona iNdodana yoMuntu inamandla ephasinapha wokucolela izono.” Yeke wathi kokhubazekileko:

¹¹ “Ngithi kuwe, ‘Sikima uthathe umkghadi wakho, ukhambe uye ekhaya!’ ”

¹² Wasikima wadobha umkghadi wakhe, waphuma wakhamba abantu boke bamqalile. Lokhu kwamangaza woke umuntu, nje-ke badumisa uZimu bathi: “Into enje azange khesiyibone!”

Ukubizwa kwakaLevi

¹³ Godu uJesu waya magegana nelwandle, soke isiqubuthu seza kuye wasifundisa.

¹⁴ Kwathi nasakhamba lapho wabona uLevi umsa ka-Alfiyosi ahlezi ngendlini yomthelo, wathi kuye: “Ngilandela.” ULevi wasikima wamlandela.

¹⁵ Kuthe uJesu asahlezi etafuleni ngendlini kaLevi, abathelisi abanengi kanye nezoni bagoma naye kanye nabafundi bakhe ngombana bebabanengi abamlandelako.

¹⁶ Lokha abafundisi bomthetho ababaFarisi nababona uJesu agoma nezoni kanye nabathelisi, babuza abafundi bakhe bathi: “Kanti kubayini agoma nabathelisi nezoni na?”

¹⁷ UJesu nezwa lokho wathi kibo: “Akusibo abaphilileko abafuna inyanga, kodwana ifunwa ngabagulako. Angikezi ukuzokubiza abalungileko kodwana izoni.”

Umbuzo ngokuzila ukudla

¹⁸ Abafundi bakaJwanisi uMbhabhadisi nabaFarisi bebazilile. Abanye abantu beza kuJesu bambuza bathi: “Kuzanjani bona abafundi bakaJwanisi nebabaFarisi bazile ukudla khibe bakho bona abakazili na?”

¹⁹ UJesu waphendula wathi: “Abayeni bomkhwenyana bangazila njani asesenabo na? Angeze bakghona ikani nje asesenabo.

²⁰ Kodwana isikhathi sizakufika lapho umkhwenyani azakususwa khona phakathi kwabo, yeke ngesikhatheso-ke bazakuzila.

²¹ “Akakho umuntu othungelela isitjheza esitjha esingarhunyeliko esambathweni esidala. Nakube wenza njalo, isitjheza esitjha sizakudoseka sisuke esambathweni esidaleso bese sikhambiselela ukudabuka.

²² Godu akakho othela iwayini elitjha ngeenkhwameni zesikhumba ezidala. Nakube wenza njalo, iwayini lingadabula iinkhwamezo bese kokubili iwayini neenkhwama zesikhumba konakale. Awa, uthela iwayini elitjha ngeenkhwameni zesikhumba ezitjha.”

Umbuzo ngeSabatha

²³ Kwathi ngelinye ilanga kuliSabatha, uJesu waratha esimini yekoroyi, abafundi bakhe bamlandela, khonapho bathoma bakha iinqwambi zekoroyi.

²⁴ AbaFarisi bathi kuye: “Qala, benzelani okungakavunyelwa ngeSabatha na?”

²⁵ Wathi kibo: “Akhange khenifunde bona uDavida wenzani lokha yena nabakhambisani bakhe baphethwe yindlala begodu baswela na?

²⁶ Angithi emihleni ka-Abiyathari umphristi omkhulu, wangena ngethempelini lakaZimu wagoma isikwa esahlukaniselweko, esigonywa baphristi kwaphela. Khonapho wapha nabakhambisani bakhe bona nabo bagome.”

²⁷ UJesu waqeda ngokuthi: “ISabatha lenzelwe abantu, ingasi bona abantu benzelwa iSabatha.

²⁸ Ngokunjalo-ke, iNdodana yoMuntu yiKosi ngitjho naphezu kweSabatha.”