UMARKOSI 16 - IsiNdebele 2012 Translation

Ukuvuka kwakaJesu

¹ Kuthe bona iSabatha lidlule, uMariya Magdalina, uMariya unina kaJakopo kanye noSalome, bathenga iinthako ukuze bayokuzesa umzimba kaJesu.

² Ekuseni ngelanga lokuthoma leveke, ngemva kobana kuphume ilanga bangena indlela eya ethuneni.

³ Babuzana bathi: “Ngubani ozasigedela ilitje ebungenweni bethuna na?”

⁴ Kodwana bathi nabaqalako babona ilitje ebegade lilikhulu ligediwe.

⁵ Kuthe nabangena ngethuneni babona isokana lihlezi ngesigomeni lembethe izambatho ezimhlophe, bethuka.

⁶ Lathi kibo: “Ningethuki. Nifuna uJesu weNazaretha obekabethelwe esiphambanweni na? Awa, uvukile, akakho lapha! Qalani indawo lapha bekabekwe khona.

⁷ Nje-ke khambani niyokutjela abafundi bakhe noPitrosi nithi, ‘Ungaphambi kwenu endleleni eya eGalile. Nizambona lapho njengombana bekanitjelile.’ ”

⁸ Baphuma ngethuneni bathathela ngebelo ngombana bebaqhaqhazela begodu bararekile. Azange batjho ilitho ebantwini ngombana bebathukile.

Ukuziveza kwakaJesu ngemva kokuvuka kwakhe

⁹ UJesu navuka ekuseni elangeni lokuthoma leveke, waziveza qangi kuMariya Magdalina aqotjha kuye amadimoni alikhomba.

¹⁰ Wakhamba wayokubikela labo ebegade banaye nebegade bahloboka, balila.

¹¹ Kuthe bona bezwe ukuthi uJesu uyaphila, nokobana umbonile, akhange bamkholwe.

¹² Emva kwalokho, uJesu waziveza ngobunye ubujamo ebafundini bakhe ababili lokha nagade basendleleni eya emaphandleni.

¹³ Bona-ke babuyela emuva bayokubikela abanye, kodwana nabo akhange babakholwe.

¹⁴ Ngemva kwesikhathi uJesu waziveza kabalitjhumi nanye basagoma. Wabasola ngokutlhoga kwabo ukukholwa kanye nangekanabo yokwala ukukholwa labo abambonileko ngemva kokuvuka kwakhe.

¹⁵ Wathi kibo: “Khambani iphasi loke, nitjhumayele ivangeli kikho koke okudaliweko.

¹⁶ Loyo okholwako abhajadiswe, uzakusindiswa kodwana loyo ongakholwako, uzakulahlwa.

¹⁷ Iimbonakaliswezi zizakulandela labo abakholwako: Ebizweni lami bazakuqotjha amadimoni, bazakukhuluma ngeenlimi ezitjha;

¹⁸ bazakudobha iinyoka ngezandla zabo, nabasela okubulalako, abazokwenzeka ilitho; bazakubeka izandla phezu kwabagulako, baphole.”

UJesu unyukela ezulwini

¹⁹ Emva kobana iKosi uJesu sele ikhulumile nabo, yanyuselwa ezulwini, yayokuhlala ngesigomeni sakaZimu.

²⁰ Abafundi baphuma bayokutjhumayela yoke indawo. IKosi yasebenza nabo, yafakazela ilizwi layo ngeembonakaliso ezalilandelako.