UMARKOSI 15 - IsiNdebele 2012 Translation

UJesu phambi kwakaPilatu

¹ Kwathi ngamasa ekuseni, abaphristi abakhulu, abaphathi, abafundisi bomthetho kanye nebandla loke, bathatha isiqunto. Babopha uJesu, bakhamba naye bebamusa kuPilatu.

² UPilatu wambuza wathi: “Uyikosi yamaJuda na?” UJesu wamphendula wathi: “Sewutjhwile.”

³ Abaphristi abakhulu bamthwesa umlandu ngezinto ezinengi.

⁴ UPilatu wambuza godu wathi: “Awuphenduli na? Qala bona bakuthwese umlandu ngezinto ezinengi kangangani!”

⁵ Kodwana uJesu nanyana kunjalo akhange amphendule. UPilatu warareka.

UJesu ugwetjelwa ukufa

⁶ Besele kumkhuba bonyana emnyanyeni, uPilatu utjhaphulula isibotjhwa esikhonjelwa babantu.

⁷ Ngesikhatheso umuntu obekuthiwa nguBharabhasi gade angesikhungweni. Bekangesinye seenlelesi ezavukela umbuso, yena wabe wabulala umuntu emgurugurwini lowo.

⁸ Isiqubuthu senyuka sazokukhombela uPilatu bona enze njengombana aqhele ukwenza.

⁹ Wasibuza wathi: “Nifuna bona nginitjhaphululele ikosi yamaJuda na?”

¹⁰ Wabona bona abaphristi abakhulu banikele ngoJesu ngebanga lomona.

¹¹ Kodwana abaphristi abakhulu batjitjizela isiqubuthu bona sikhombele uPilatu abatjhaphululele uBharabhasi.

¹² UPilatu wabuza isiqubuthu godu wathi: “Alo-ke, nithi ngenzeni ngalo enimbiza ngekosi yamaJuda na?”

¹³ Sarhuwelela sathi: “Mbethele esiphambanweni!”

¹⁴ UPilatu wasibuza wathi: “Kubayini? Kunobulelesi abenzileko na?” Sarhuwelela khulu sathi: “Mbethele esiphambanweni!”

¹⁵ Njengombana uPilatu bekathanda ukukara abantu, wamtjhaphulula-ke uBharabhasi. UPilatu wayala bona uJesu abethwe bewamnikela bona abethelwe esiphambanweni.

Amajoni abukisa ngoJesu

¹⁶ Amajoni angenisa uJesu ngesigodlweni sombusi, abiza amanye amajoni amanengi.

¹⁷ Amembesa ingubo ebubende, eluka isihlohlo sameva amthwesa sona.

¹⁸ Athoma amkhulekela athi: “Bayede ngwenyama, kosi yamaJuda!”

¹⁹ Abuyelela kanenginengi ambetha ehloko ngomhlanga, amkhafulela. Aguqa ngamadolo enza sengathi ayamhlonipha.

²⁰ Nasele aqedile ukubukisa ngaye, amhlubulisa ingubo ebubende, amembathisa izambatho zakhe. Akhamba naye ayombethela esiphambanweni.

UJesu ubethelwa esiphambanweni

²¹ Endleleni akatelela umdluli ngendlela obegade avela emaphandleni bona atjathe isiphambano sakaJesu. Yena bekunguSimoni weSirene onguyise ka-Alekzandra noRufosi.

²² Aletha uJesu endaweni ebekuthiwa yiGolgotha, okutjho iKhakhayi.

²³ Endaweni leyo alinga ukumseza iwayini elivanganiswe nemire, kodwana wabhala ukulisela.

²⁴ Ambethela esiphambanweni. Ahlukaniselana izambatho zakhe, aphosa nefumbe ukuze azi bona elinye nelinye lithatheni.

²⁵ Bekuyisimbi yethoba ekuseni nakambethelako esiphambanweni.

²⁶ Isaziso esitloliweko somlandu abekwa wona besifundeka bunje: IKOSI YAMAJUDA.

²⁷ Abethela kanye naye iinlelesi ezimbili, esinye ngesigomeni, esinye ngesinceleni.

²⁸ Ngaleyondlela kwazaliseka umtlolo othi: “Wabalwa kanye neenlelesi.”

²⁹ Labo abadlulako bathintitha iinhloko bamhlambalaza bathi: “Arha! Wena owathi uzakugiriza ithempeli ulakhe ngobutjha ngamalanga amathathu,

³⁰ zisindise-ke, wehle esiphambanwenapho!”

³¹ Ngokunjalo nabaphristi abakhulu nabafundisi bomthetho bamphoqa babodwa bathi: “Wasindisa abanye kodwana yena akakwazi ukuzisindisa!

³² UKrestu lo, oyiKosi yama-Israyeli akehle esiphambanweni ukuze sibone bese siyakholwa.” Nalabo ababethelwe naye nabo bamhlambalaza.

Ukufa kwakaJesu

³³ Kwathi ngesimbi yetjhumi nambili emini, ubumnyama bembatha iphasi loke bekwaba yisimbi yesithathu ngemva kwedina.

³⁴ Ngesimbi yesithathu ntambama, uJesu warhuwelela ngelizwi elikhulu wathi: “Eloyi, Eloyi, lama sabarhithani?” Nakutjhugululwako kutjho bona “Zimami, Zimami, ungitjhiyeleni na?”

³⁵ Kwathi abanye ebebajame lapho nabezwa lokho bathi: “Lalelani, ubiza u-Eliya!”

³⁶ Omunye wabo wagijima wazalisa isimunyo ngewayini elimunyu wasihloma elithini, wasinikela uJesu bona asele, bewathi: “Kwanjesi akhese nimliseni. Akhesibone bona u-Eliya loyo uzakuza azomehlisa esiphambanwenapha na?”

³⁷ UJesu warhuwelela ngelizwi elikhulu, waphefumula kokugcina.

³⁸ Irharideni lethempeli latlebhuka phakathi ukusuka phezulu ukuya phasi.

³⁹ Kwathi lokha umphathimabutho obekajame lapho phambi kwakaJesu nezwa ukurhuwelela kwakhe nangendlela ahlongakele ngayo, wathi: “Ngambala indoda le beyiyiNdodana kaZimu!”

⁴⁰ Bekunabesifazana abathileko ebebabukela bajame kudanyana. Hlangana nabo bekunoMariya Magdalina, uMariya unina kaJakopo omncani noJosisi kanye noSalome.

⁴¹ EGalile, besifazanaba bamlandela bebatjheja iindingo zakhe. Abanye besifazana abanengi ebebakhuphuke naye eJerusalema nabo bebakhona.

Ukubulungwa kwakaJesu

⁴² Bekulilanga lamalungiselelo, okutjho ilanga ngaphambi kweSabatha. Kuthe bona kuhlwe,

⁴³ uJosefa we-Arimathiya, olilunga elidumileko lomKhandlu nobegade alinde umbuso kaZimu, wanqopha kuPilatu ngesibindi wayokukhombela umzimba kaJesu.

⁴⁴ UPilatu wamangala ukuzwa bona uJesu sele ahlongakele. Wabiza umphathimabutho wambuza bona uJesu sele ahlongakele na?

⁴⁵ Kwathi bona afumane kumphathimabutho bonyana kunjalo, wavumela uJosefa bona athathe umzimba lowo.

⁴⁶ Yeke uJosefa wathenga itjhila lelineni, wethula umzimba kaJesu, wawuphuthela ngelineni lelo, wawubulunga ngethuneni ebelikghedlhwe edwaleni. Wageda ilitje elikhulu wavala ithuna.

⁴⁷ UMariya Magdalina noMariya unina kaJosisi, babona lapha abekwe khona.