UMARKOSI 14 - IsiNdebele 2012 Translation

Amaqhinga wokubulala uJesu

¹ Nje-ke besele kumalanga amabili kwaphela bona kube liPhasika kanye nomnyanya wesiKwa esinganaNgumelo. Abaphristi abakhulu nabafundisi bomthetho bebathiya amaqhinga wokubamba uJesu ngesidu, bambulale.

² Bakhuluma bodwa bathi: “Akungabi ngesikhathi somnyanya ngombana abantu bangaguruzela.”

UJesu uzeswa ngamafutha eBhethaniya

³ Kwathi uJesu aseBhethaniya azigedle ngekumbeni yendoda ebekuthiwa nguSimoni onekhwekhwe, kweza umfazi aphethe isikurwana se-alabhastara sinamakha wentengo ephezulu, enziwe ngenarada yamambala. Wephula isikurwaneso, wathela amakha phezu kwehlokwakhe.

⁴ Abanye egade bakhona basilingeka bathi: “Kudlalelwani ngamakha kangaka na?

⁵ Amakha la, bekangathengiswa ngemali engaphezu komrholo womnyaka bese imali leyo inikelwa abadududu.” Yeke bamkhalimela ngokumkhahlameza.

⁶ UJesu wathi: “Mliseni, nimtshwenyelani na? Ungenzele into ehle.

⁷ Abadududu nizokuhlala ninabo njalo phakathi kwenu, yeke ningabasiza ngesinye nesinye isikhathi enifuna ngaso. Kodwana mina angeze naba nami njalo.

⁸ Wenze akghona ukukwenza: Uzese umzimbami ngamakha ngaphambi kwesikhathi, walungiselela ukubulungwa kwami.

⁹ Ngiqinisile ngiyanitjela bona kuphi nakuphi lapha kutjhunyayelwa khona ivangeli ephasini loke, lokho akwenzileko kuzakhulunywa ngakho kube sikhumbuzo ngaye.”

UJudasi uvuma ukuthengisa uJesu

¹⁰ UJudasi Iskariyodi ongomunye wabalitjhumi nambili, watjhinga kubaphristi abakhulu kobana akhaphele uJesu kibo.

¹¹ Bakuthabela khulu ukuzwa lokho, bebamethembisa ukumnikela imali. Yeke walindela ithuba lokumkhaphela.

UJesu ugoma iPhasika nabafundi bakhe

¹² Ngelanga lokuthoma lomnyanya wesiKwa esinganaNgumelo, nabegade kumkhuba wokuhlaba imvana yePhasika, abafundi bakaJesu bambuza bathi: “Ufuna siyokulungiselela kuphi lapha uzakugomela khona iPhasika na?”

¹³ Yeke wathumela ababili ebafundini bakhe, wathi kibo: “Khambani niye ngedorobheni, nizakuhlangatjezwa mumuntu otjethe umjeka wamanzi ehlombe. Mlandeleni.

¹⁴ Lapha angena khona, nithi kumninimuzi, ‘Umfundisi uyabuza bona liphi ilawu labayeni, lapha yena nabafundi bakhe bazakugomela khona iPhasika na?’

¹⁵ Uzanitjengisa ilawu elikhulu elingaphezulu, elilungeselelwe ngakho koke. Yenisilungiselele lapho-ke.”

¹⁶ Abafundi bakhamba-ke, baya ngedorobheni, bafumana kunjengombana uJesu bekabatjelile. Yeke balungiselela iPhasika.

¹⁷ Kuthe bona kuhlwe, uJesu wafika nabafundi bakhe.

¹⁸ Kwathi basazigedle etafuleni bagoma, uJesu wathi: “Ngiqinisile ngiyanitjela bona omunye kinapha uzongikhaphela; iye, loyo onghwatha nami.”

¹⁹ Bathoma ukutlhuwa, bambuza ngokulandelana bathi: “Kungaba ngimi loyo na?”

²⁰ Wathi kibo: “Ngomunye wabalitjhumi nambili, ngiloyo otjheba isikwa ngesitjeni sinye nami.

²¹ INdodana yoMuntu izakukhamba njengombana kutloliwe ngayo. Kodwana maye emuntwini okhaphela iNdodana yoMuntu! Bekuzakuba ngcono kuye thana ubengakabelethwa!”

Isidlo seKosi sakusihlwa

²² Kuthe basagoma, uJesu wathatha isikwa, wathokoza, wasihlephula wapha abafundi bakhe, wathi: “Thathani, lokhu mzimbami.”

²³ Yeke wathatha ikapho, wathokoza kuZimu, wabanikela, boke basela.

²⁴ Wathi kibo: “Lokhu ziingazi zami zesivumelwano eziphalakele abanengi.

²⁵ Ngiqinisile ngiyanitjela bona angekhe bengisasela godu isithelo sesidiribe bekube kumhlana ngisisela sisitjha embusweni kaZimu.”

²⁶ Kwathi sele bavume ingoma yokuthokoza, baphuma baya entabeni ye-Oliva.

UJesu ubona ngaphambili ukuphikwa nguPitrosi

²⁷ UJesu wathi kibo: “Nizokukhubeka noke ngombana kutloliwe bona: “ ‘Ngizakumadlha umelusi, izimvu ziphadlhalale.’

²⁸ Kodwana emva kobana ngivukile, ngizanandulela ngiye eGalile.”

²⁹ UPitrosi wathi kuye: “Nanyana boke bangakhubeka, kodwana mina angekhe.”

³⁰ UJesu wathi: “Ngiqinisile ngiyakutjela bona ngobusukobu, ngaphambi kobana umkukurumbu ulile kabili, uzabe ungiphike kathathu.”

³¹ Kodwana uPitrosi waphikelela wathi: “Ngitjho nanyana sele kungibiza bona ngife nawe, angekhe ngakuphika.” Boke batjho njalo.

UJesu uthandaza eGetsemani

³² Baya endaweni ebizwa bona yiGetsemani, uJesu wathi ebafundini bakhe: “Hlalani lapha ngisayokuthandaza.”

³³ Wathatha uPitrosi, uJakopo kanye noJwanisi wakhamba nabo. Wathoma ukukhathazeka khulu, waba lisizi.

³⁴ Wathi kibo: “Ummoyami ulisizi khulu bekube sekufeni. Salani lapha nihlale niqaphile.”

³⁵ Wadlulela phambidlana wawela phasi, wathandaza bonyana nakukghonekako i-awara leli limdlule.

³⁶ Wathi: “Aba! Baba! Zoke izinto ziyenzeka kuwe. Susa ikapho le kimapha, nokho akungabi ngokwentandwami kodwana kube ngeyakho.”

³⁷ Yeke wabuyela ebafundini bakhe, wabafumana balele. Wathi kuPitrosi: “Simoni, ulele na? Ubhalelwe kulinda i-awara linye nje na?

³⁸ Lindani, nithandaze ukuze ningangeni ekulingweni. Ummoya uyavuma, kodwana inyama ibuthakathaka.”

³⁹ Wakhamba godu wayokuthandaza, watjho godu amezwi lawo.

⁴⁰ Wathi nabuyako godu wabafumana balele ngombana amehlwabo gade azele ubuthongo. Azange bazi bona bangathini kuye.

⁴¹ Wabuya kwesithathu wathi kibo: “Nisalele, nisaphumule na? Kuhlezi kwanjesi! Isikhathi sesifikile. Qalani, iNdodana yoMuntu ikhatjhelwe ezandleni zezoni.

⁴² Vukani! Nambani sikhambeni! Nangu umkhaphelami asiza!”

Ukubotjhwa kwakaJesu

⁴³ Kwathi asakhuluma njalo, veliyani uJudasi ongomunye wabafundi bakhe abalitjhumi nambili. Begade akhamba nesiqubuthu esihlome ngeensabula nangeembhuku sithunywe baphristi abakhulu, abafundisi bomthetho kanye nabaphathi.

⁴⁴ Yeke umkhapheli bekabanikela isiboniso wathi: “Loyo engizamcwanga nguye, mbambeni, nikhambe naye nimqaphile.”

⁴⁵ Khonapho uJudasi waya kuJesu wathi: “Rabi!” wamcwanga.

⁴⁶ Amadoda lawo ambamba uJesu, ambopha.

⁴⁷ Omunye walabo ebebajame lapho warhwatjha isabulakhe, wamadlha inceku yomphristi omkhulu, wasusa indlebayo.

⁴⁸ UJesu wathi kibo: “Alo-ke bekufanele bona nize neensabula neembhuku ukuzongibamba sengathi ngimhlanguli na?

⁴⁹ Imihla yoke benginani, ngifundisa ngeenrhodlweni zethempeli, akhange ningibambe. Kodwana kufanele bona imitlolo izaliseke.”

⁵⁰ Khonapho boke bamtjhiya babaleka.

⁵¹ Kwaba nesokana elalingakembathi ilitho kwaphela lizisonge ngelineni, elalandela uJesu. Kwathi lokha nabambambako,

⁵² isokanelo labaleka labe latjhiya nelinenanyana leyo lapho.

UJesu phambi kwebandla labaphristi

⁵³ Basa uJesu kumphristi omkhulu. Boke abaphristi abakhulu, abaphathi, nabafundisi bomthetho bahlangana.

⁵⁴ UPitrosi wamlandela kudanyana, wabe wayokungena ngesirhodlweni somphristi omkhulu. Wahlala lapho nabaqaphi, azothisa emlilweni.

⁵⁵ Abaphristi abakhulu kanye nebandla loke bafuna ubufakazi ngoJesu ukuze bambulale, kodwana babutlhoga.

⁵⁶ Abofakazi abanengi bafakaza amanga ngoJesu, kodwana ubufakazi babo akhange buthomane.

⁵⁷ Yeke amadoda athileko asikima, ethula ubufakazi bamala ngoJesu athi:

⁵⁸ “Simzwile nakasithi: ‘Ngizakugiriza ithempeli elakhiwe ngezandla kuthi ngamalanga amathathu ngakhe elinye elingakakhiwa ngezandla!’ ”

⁵⁹ Khonapho ubufakazi babo akhange buthomane.

⁶⁰ Umphristi omkhulu wasikima hlangana nabo, wabuza uJesu wathi: “Awuzukuphendula na? Yini into abantwaba abayifakaza ngawe le na?”

⁶¹ Kodwana uJesu wazithulela, akhange aphendule. Umphristi omkhulu wambuza godu wathi: “UnguKrestu, iNdodana yoBusisiweko na?”

⁶² UJesu waphendula wathi: “Iye nginguye; “begodu nizakubona iNdodana yoMuntu ihlezi ngesigomeni sakaSomandla, isiza ngamafu wezulwini.”

⁶³ Umphristi omkhulu watlebhula izambatho zakhe, wathi: “Sisabafunelani abofakazi abanye na?

⁶⁴ Nizizwele ukunyefula kwakhe. Alo, nithini na?” Boke bamlahla ngomlandu wokubulawa.

⁶⁵ Yeke abanye bathoma ukumkhafulela, bamvala amehlo, bamphosa amaguduva, bathi kuye: “Phorofida!” Boke abaqaphi bamthatha, bamdula.

UPitrosi uphika uJesu

⁶⁶ Kwathi uPitrosi asese senzasi ngesirhodlweni, kweza omunye wabantazana abaziinsebenzi zomphristi omkhulu.

⁶⁷ Kuthe lokha nabona uPitrosi azothisa, wamqalela eduze wathi: “Nawe gade unoJesu umNazaretha loya.”

⁶⁸ Kodwana wakuphika lokho, wathi: “Angazi begodu angilemuki bona ukhuluma ngani.” Watjho njalo wabe waphuma ngesango.

⁶⁹ Kwathi lokha umntazana osisebenzi nambonako, wathi ebantwini ebebajame lapho: “Ngambala umrhali lo ungomunye wabo.”

⁷⁰ Godu uPitrosi waphika. Ngemva kwesikhatjhana abantu ebebajame lapho, bathi kuPitrosi: “Kwamambala ungomunye wabo ngombana ungumGalile.”

⁷¹ Wathoma ukuthukana, wafunga wathi: “Ngithi angiyazi indoda enikhuluma ngayo le!”

⁷² Khonokho umkukurumbu walila kwesibili. UPitrosi wakhumbula ilizwi uJesu ebegade alikhulume kuye lokuthi: “Ngaphambi kobana umkukurumbu ulile kabili, uzabe sewungiphike kathathu bona awungazi.” Waphahluka, walila.