UMARKOSI 13 - IsiNdebele 2012 Translation

UJesu ukhuluma ngokugirizwa kwethempeli

¹ Kuthe uJesu nasele aphuma ngethempelini, omunye wabafundi bakhe wathi kuye: “Mfundisi, akhese uthi uyaqala amatje la! Nakumumakhiwo wona, maye ubuhle obulapha!”

² UJesu waphendula wathi: “Uyayibona yoke imakhiwo emikhulu le na? Angekhe kwasala nelilodwa ilitje phezu kwelinye. Elinye nelinye lizakugirizelwa phasi.”

Iinhlupheko nobudisi obuzako

³ Kwathi uJesu asahlezi entabeni ye-Oliva aqalane nethempeli, uPitrosi, uJakopo, uJwanisi no-Andrisi bambuza babodwa bathi:

⁴ “Sitjela bona lokhu kuzakwenzeka nini na? Sizakuba yini isibonakaliso sokobana isikhathi sesifikile sokwenzeka kwezintwezi na?”

⁵ UJesu wabaphendula wathi: “Yelelani bona kungabikhona namunye onikhohlisako.

⁶ Abanengi bazakuza ebizweni lami bathi, ‘Nginguye’ bese bakhohlisa abanengi.

⁷ Nanizwa ngezipi neendumela zezipi, ningesabi. Izinto ezinjalo kufanele bona zenzeke, kodwana isiphetho siseza.

⁸ Isizwe sizakuvukela isizwe nombuso uvukele umbuso. Kuzakuba nokusikinyeka kwephasi eendaweni ezahlukeneko kanye nendlala. Lokho kukuthoma kwemirhelo.

⁹ “Yeke ziyeleleni nina ngombana nizokudoselwa emabandla benimadlhwe ngemasinagogini. Nizakujama phambi kwababusi namakhosi ngesimanga sami ninikele ubufakazi ngami kibo.

¹⁰ Ivangeli lifanele litjhunyayelwe kizo zoke izizwe qangi.

¹¹ Lokha nabanibambako banisa ebandla, ningathomi nikhathazeke bona nizakuthini. Khulumani lokho eninikelwe khona ngesikhatheso ngombana akusini enikhulumako, kukhuluma uMoya oCwengileko.

¹² Umfo uzakukhaphela umfo ekufeni nobaba akhaphele umntwanakhe. Abantwana bazakuvukela ababelethi babo bebabakhaphele ekufeni.

¹³ Boke abantu bazanihloya ngebanga lami kodwana loyo obambelela bekube sekupheleni uzakusindiswa.”

Iinhlupheko ezibuhlungu

¹⁴ “Lokha nanibona isinyenyiso esibhubhisako esijanyiswe endaweni engasi ngeyaso, umfundi akazwisise; kuthi labo abaseJudiya babalekele eentabeni.

¹⁵ Loyo ophezu kwephahla lekumbakhe akangehli namkha angene ngekumbeni ayokuthatha okuthileko.

¹⁶ Osemasimini akangabuyeli emuva ayokuthatha isambatho sakhe.

¹⁷ Maye kuzokuba buhlungu kangangani mhlokho ebafazini abazithweleko kanye nabamunyisako!

¹⁸ Thandazani bona lokhu kungenzeki ebusika

¹⁹ ngombana leyo kuzokuba mimihla yesizi engafani neyaphambilini lokha uZimu nakadala iphasi, bekube kunamhlanje, begodu nengasoze yabuye yafana nayo.

²⁰ Ngathana uSomnini akhange anciphise amalanga lawo, bekungekhe kwaphunyurha muntu. Kodwana ngebanga labakhethiweko, iye labo uSomnini abakhethileko, uwanciphisile amalanga lawo.

²¹ “Ngesikhatheso nanyana ngubani othi kini, ‘Qalani nanguKrestu!’ namkha, ‘Qalani nanguya lapha akhona!’, ningakukholwa lokho.

²² Kuzokuvela abosingaKrestu nabaphorofidi bamanga, benze iimbonakaliso neemangaliso kobana bakhohlise abakhethiweko nakube bayakghona.

²³ Yeke tjhejani, sele nginitjele koke ngaphambi kwesikhathi.”

Ukuza kweNdodana yoMuntu

²⁴ “Kodwana emihleni leyo ngemva kwesizi lelo, “ilanga lizakufiphala nenyezi ingakhanyisi.

²⁵ Iinkwekwezi zizokukhithika emkayini, amandla asezulwini asikinywe.

²⁶ “Ngesikhatheso abantu bazakubona iNdodana yoMuntu isiza emafini ngamandla amakhulu nangephazimulo.

²⁷ Izokuthumela iingilozi zayo beyibuthele ndawonye abakhethiweko bayo emajikeni womane wephasi, epelazwe nemaphelelweni womkayi.”

Ifundiso ngomuthi wamakhiwani

²⁸ “Yeke fundani isifundwesi ngomuthi wamakhiwani: Msinyana ngemva kobana amahlumelawo aba buthakathakana bese kutlhurhe amakari, seniyazi bonyana ihlobo litjhidele.

²⁹ Kunjalo-ke, nanibona izintwezi zisenzeka, nizokwazi bona isikhathi sesitjhidele, sele sisemnyango.

³⁰ Ngiqinisile ngiyanitjela bona isizukulwanesi ngambala asisoze sadlula kungakenzeki zoke izintwezi.

³¹ Izulu nephasi kuzokudlula, kodwana amezwami angekhe adlula.

Akakho owaziko ilanga nesikhathi

³² “Akakho owaziko ngelangelo namkha nge-awarelo, ngitjho neengilozi ezulwini neNdodana ngokwayo, kodwana nguBaba kwaphela owaziko.

³³ Qaphelani! Yelelani! Anazi bona isikhatheso sizokufika nini.

³⁴ Kuzokuba njengendoda enekhambo: Itjhiya umzayo ezandleni zeensebenzi zayo, esinye nesinye isisebenzi sinomsebenzaso bese itjela leso esisesangweni bona sibeke ilihlo.

³⁵ Ngalokho-ke hlalani niqaphile ngombana anazi bona umninimuzi uzokufika nini, kungaba sentambama, phakathi kobusuku, ngamasa namkha ekuseni.

³⁶ Nakeza ningakatjheji, anganifumani nilele.

³⁷ Lokho engikutjho kini, ngikutjho kibo boke: Qaphelani!”